Numbers 28

Tsonga Xitsonga (Bibele) 1929

← Chapter 27 Jump to: Chapter 29 →

1Yehovha a byela Muxe, a ku:

2“Lerisa vana va Israele, u ku eka vona: ‘Mi ta ndzi humesela nhlengo hi nkarhi wa wona, swi ri swakudya swa mina leswi hisiwaka, leswi nga ni risuna leri nun'hwelaka eka mina.’

3“U ta ku eka vona: magandzelo lama hisiwaka hi ndzilo, lawa mi nga ta ma humesela Yehovha, hi lawa: “Siku rin'wana ni rin'wana, swinyimpfana swimbirhi swa lembe rin'we leswi nga riki na xivati, yi va holokosta ya masiku ni masiku.

4U ta humesa xinyimpfana nimixo, ni xinyimpfana xin'wana nimadyambu;

5ni nyiko ya vukhume bya efa ya mapa layo saseka, lama pfuviweke hi ku avanyisa ka vumune bya hini ya mafurha lamanene.

6I holokosta ya masiku leyi humesiweke entshaveni ya Sinayi, i gandzelo leri nga ni risuna, leri hiseriwaka Yehovha.

7Vucheleto bya rona byi ta va bya ku avanyisa ka vumune bya hini, swi ri swa xinyimpfana xo sungula: vuchelo bya vhinyo leyinene byi ta cheleriwa Yehovha evukwetsimelweni.

8U ta humesa xinyimpfana xa vumbirhi nimadyambu; xi ta humesiwa xi ri ni nyiko ni vucheleto kukotisa xa nimixo: i gandzelo leri hisiwaka, leri nga ni risuna leri nun'hwelaka eka Yehovha.

9“Siku ra Savata ku ta humesiwa swinyimpfana swimbirhi swa lembe rin'we leswi nga riki na xivati, ni nyiko ya ku avanyisa ka vumbirhi bya mapa layo saseka, lama pfuviweke hi mafurha, ni vucheleto bya yona.

10I holokosta ya Savata yin'wana ni yin'wana: swi ri ehenhla ka holokosta ya masiku, ni vucheleto bya yona.

11“Eku sunguleni ka tin'hweti ta n'wina, mi ta humesela Yehovha holokosta ya tinkunzi timbirhi, ni khuna, ni swinyimpfana swa 7 swa lembe rin'we, leswi nga riki na xivati;

12ni ku avanyisa ka khume loku hlayiweke kanharhu, ka mapa layo saseka, lama pfuviweke hi mafurha, yi va nyiko leyi lulamelaka nkunzi yin'wana ni yin'wana, ni ku avanyisa ka vukhume loku hlayiweke kambirhi ka mapa layo saseka, lama pfuviweke hi mafurha, yi va nyiko leyi lulamelaka khuna rin'wana ni rin'wana;

13ni ku avanyisa ka vukhume bya mapa layo saseka, lama pfuviweke ni mafurha, yi va nyiko leyi lulamelaka xinyimpfana xin'wana ni xin'wana; i holokosta leyi nga ni risuna le ri nun'hwelaka, ni gandzelo leri hiseriwaka Yehovha.

14Vucheleto bya swona i hafu ya hini ya vhinyo hi nkunzi yin'wana ni yin'wana, ni ku avanyisa ka vunharhu bya hini hi khuna rin'wana ni rin'wana, ni ka avanyisa ka vumune ka hini hi xinyimpfana xin'wana ni xin'wana. Hi yona holokosta ya n'hweti yi va ya tin'hweti hinkwato ta Lembe.

15Ku ta humeseriwa Yehovha ni xiphongo, ri va gandzelo ra xidyoho, ehenhla ka holokosta ya masiku hinkwawo, ni vucheleto bya yona.

16“Hi n'hweti yo sungula, hi siku ra 14, yi ta va Paseka ya Yehovha.

17Siku ra 15 ra n'hweti leyi ku ta va ni nkhuvo. Hi masiku ya 7 ku ta dyiwa xinkwa lexo kala comela.

18Siku ro rhanga, ku ta va ni nhlengeletano leyo kwetsima; mi nga tshuki mi tirha ntirho lowo tika ha rona.

19Mi ta humesela Yehovha magandzelo lama hisiwaka, ti va tiholokosta: mi humesa tinkunzi timbirhi, ni khuna, ni swinyimpfana swa 7 swa lembe rin'we; mi swi teka swi nga ri na xivati;

20nyiko ya swona ma ta va mapa layo saseka lama pfuviweke hi mafurha; mi ta humesa ku avanyisa kanharhu ka vukhume hi nkunzi yin'wana ni yin'wana; ni ku avanyisa kambirhi ka vukhume hi khuna rin'wana ni rin'wana;

21u ta humesela xinyimpfana xin'wana ni xin'wana ku avanyisa ka vukhume bya wona.

22Mi ta humesa ni xiphongo, ri va gandzelo ra xidyoho, mi tiphahlela mhamba ha xona.

23Mi ta xi humesa ehenhla ka holokosta ya nimixo, yi nga holokosta leyi nga heriki.

24“Mi ta humesa swilo leswi siku rin'wana ni rin'wana hi masiku ya 7 swi ri swakudya ni gandzelo leri hisiwaka ri va risuna eka Yehovha. Mi ta swi humesa ehenhla ka holokosta leyi nga heriki ni vucheleto bya yona.

25Hi siku ra ntlhanu na mambirhi, mi ta va ni nhlengeletano leyo kwetsima; mi nga tshuki mi tirha mi ntirho leyo tika.

26“Hi siku ra swirhangana, kutakuloko mi humesela Yehovha nhlengo lowuntshwa, enkhubyeni wa n'wina wa mavhiki, mi ta va ni nhlengeletano leyi hlawuriweke; mi nga tshuki mi tirha ntirho ni wun'we lowo tika.

27Mi ta humesa holokosta leyi nga ni risuna leri nun'hwelaka eka Yehovha, ti va tinkunzi timbirhi, ni khuna, ni swinyimpfana swa 7, swa lembe.

28Nyiko ya swona ma ta va mapa layo saseka, lama pfuviweke hi mafurha, ku avanyisa kanharhu ka vukhume hi nkunzi yin'wana ni yin'wana, ni ku avanyisa kambirhi ka vukhume hi khuna rin'wana ni rin'wana;

29ni ku avanyisa ka vukhume hi xinyimpfana xin'wana ni xin'wana xa leswi swa 7;

30mi ta humesa ni xiphongo ku tiphahlela mhamba ha xona:

31Mi ta humesa swilo leswi ehenhla ka holokosta leyi nga heriki, ni nyiko ya yona; mi ta swi hlawula, swi nga ri na xivati, swi va ni vucheleto bya swona.

← Chapter 27 Jump to: Chapter 29 →