Numbers 32

Tsonga Xitsonga (Bibele) 1929

← Chapter 31 Jump to: Chapter 33 →

1Vana va Rhuveni ni vana va Gadi a va ri ni mitlhambi leyo tala ngopfungopfu; kutani va vona tiko ra Yazere, ni tiko ra Giliyadi leswaku i tiko leri sasekelaka swifuwo.

2Hi sweswo vana va Gadi ni vana va Rhuveni va ta eka Muxe ni ka Eliyazara, muprista, ni ka tihosi ta nhlengeletano, va ku eka vona:

3“Miti ya Ataroti na Diboni, na Yazere, na Nimra, na Hexiboni, na Eleyale, na Sebamu, na Nebo, na Beyoni,

4tiko leri Yehovha a ri hlaseleke emahlweni ka nhlengeletano ya Israele, i tiko leri sasekelaka swifuwo, kutani hina, malandza ya wena hi ni mitlhambi.”

5Va engeta, va ku: “Loko hi kumile tintswalo emahlweni ka wena, tiko leri a ri nyikiwe malandza ya wena, ri va tiko ra wona; u nga hi perisi Yordani.”

6Muxe a ku eka vana va Gadi ni ka vana va Rhuveni: “Xana vamakwenu va ta huma nyimpi, kasi n'wina mi ta tshama kwala xana?

7Mi herisela yini timbilu ta vana va Israele leswaku va nga peleli etikweni leri Yehovha a va nyikeke rona?

8Vatata wa n'wina va endlile sweswo loko ndzi va rhumile va ri eKadexe-Bariniya ku ya vona tiko.

9Va khandziya ku ya fika enkoveni wa Exikolo, va vona tiko, kutani va herisa timbilu ta vana va Israele, leswaku va nga ngheni etikweni leri Yehovha a va nyikeke rona.

10Yehovha a kariha siku lero, kutani a hlambanya, a ku:

11‘Vanhu lava humeke eEgipta, ku suka eka va malembe ya makume mambirhi, ni lava tlulaka, va nga ka va nga voni tiko leri ndzi ri hlambanyeleke Abrahama na Isaka, na Yakobo, hikuva a va ndzi landzanga swinene;

12loko a nga ri Kalebe, n'wana Yefune, Mukenizi, na Yoxuwa, n'wana Nuni, lava landzeke Yehovha kunene.’

13Kutani Yehovha a karihela Israele, a n'wi fambisa emananga hi malembe ya mune wa makume, ku ko ku hela rixaka hinkwaro leri endleke swo biha emahlweni ka Yehovha.

14Kutani sweswi mi yima ematshan'weni ya vatata wa n'wina, mi ri rixaka ra vadyohi, mi lavela Israele ku engetela ku kariha ha Yehovha.

15Hikuva loko mi n'wi hundzukela, u ta tshama a mi tshika emananga, kutani mi ta herisa tiko leri hinkwaro.”

16Kavaloko va tshinela eka Muxe va ku: “Hi ta akela mitlhambi ya hina kwala matshanga, ni miti ya vana va hina:

17loko hi ri hina hi ta hloma sweswi ku famba emahlweni ka vana va Israele, hi ko hi va nghenisa eka rikwavo; vananyana va hina va ta tshama emitini leyi tiyeke hikwalaho ka vaaki va tiko.

18Hi nga ka hi nga muki ekaya, vana va Israele va nga si nghena un'wana ni un'wana endzhakeni ya yena;

19hi nga ka hi nga vi na ndzhaka ehase ka Yordani, hambi ku ri emahlweni, leswi hi averiweke ndzhaka ya hina ehaleni ka Yordani, evuxeni.”

20Muxe a ku eka vona: “Loko mi endla sweswo, loko mi hloma ku ya lwa emahlweni, ka Yehovha,

21ni loko un'wana ni un'wana la hlomaka exikarhi ka n'wina a wela eYordani emahlweni ka Yehovha, a ko a hlongola valala va yena emahlweni ka mombo wa yena,

22kutani mi vuya ntsena loko tiko ri etlele emahlweni ka Yehovha, a mi nga vi na nandzu eka Yehovha ni le ka Israele, kutani tiko leri, yi ta va ndzhaka ya n'wina emahlweni ka Yehovha.

23Kambe loko mi nga endlisi sweswo, mi ta dyohela Yehovha; kutani tivani leswaku nandzu wa n'wina wu ta mi kuma.

24Tiakeleni miti ya vana va n'wina, ni matshanga ya mitlhambi ya n'wina; mi va mi endla leswi humeke emilon'wini ya n'wina.”

25Kavaloko vana va Gadi, ni vana va Rhuveni va byela Muxe va ku: “Malandza ya wena ma ta endla hilaha hosi yanga yi leriseke hakona.

26Vana va hina ni vasati va hina, ni mitlhambi ya hina, ni swifuwo swa hina hinkwaswo swi ta tshama emitini ya Giliyadi,

27kambe malandza ya wena, va ri hinkwavo lava hlomaka, va ta famba eku lweni emahlweni ka Yehovha, hilaha hosi yanga yi vulaka hakona.”

28Muxe a lerisa timhaka ta vona eka Eliyazara, muprista, ni ka Yoxuwa, n'wana Nuni, ni ka tihosi ta tindlu ta tinyimba ta vana va Israele.

29Kutani Muxe a ku eka vona: “Kungakuloko vana va Gadi ni vana va Rhuveni va wela eYordani na n'wina, emahlweni ka Yehovha, ni loko tiko ri rhula emahlweni ka n'wina, mi ta va nyika tiko ra Giliyadi, yi va ndzhaka ya vona.

30Kambe loko va nga weli na n'wina va hlomile, va ta aka exikarhi ka n'wina etikweni ra Kanana.”

31Vana va Gadi ni vana va Rhuveni va hlamula, va ku: “Hi ta endla hilaha Yehovha a byeleke malandza ya wena hakona.

32Hi ta wela hi hlomile emahlweni ka Yehovha, etikweni ra Kanana, kambe ndzhaka ya hina yi ta va entlhandlukweni wa Yordani.”

33Kavaloko Muxe a nyika vana va Gadi, ni vana va Rhuveni, ni hafu ya nyimba ya Manase, n'wana Yosefa, tiko ra vuhosi bya Sihoni, hosi ya Vaamori, ni tiko ra vukosi bya Ogo, hosi ya Baxani, ni miti ya kona, ni masimu ya miti ya tiko, ku rhendzeleka hinkwako.

34Vana va Gadi va aka Diboni, na Ataroti, na Arowere,

35na Atiroto-Xofana, na Yazere, na Yogibeha,

36na Beta-Nimra, na Beta-Harana, yi ri miti ya makhokholo ni ya matshanga ya tinyimpfu.

37Vana va Rhuveni va aka Hexiboni, na Eleyale na Kiriyatayimi, na Nebo, na Baala-Meoni (mavito ya miti leyi ma hundzuluxiwile),

38va aka na Sibima, kutani va thya miti leyi va yi akeke mavito man'wana.

39Vana va Makiri, n'wana Manase va ya lwa na Giliyadi, kutani va teka tiko va hlongola Vaamori lava akeke kona.

40Kutani Muxe a nyika Makiri, n'wana Manase, tiko ra Giliyadi, a aka kona.

41Yayiro, n'wana Manase, a famba a ya teka miti ya vona, kutani a yi thya miti ya Yayiro.

42Noba a famba, a ya teka Kenata ni miti leyi nga ehansi ka wona, kutani a wu thya Noba, hi vito ra yena.

← Chapter 31 Jump to: Chapter 33 →