1 Chronicles 13

Umbundu Bible (Embimbiliya - Bíblia Sagrada em Umbundu)

← Chapter 12 Jump to: Chapter 14 →

1Daviti wa pula vakesongo liolohũlũkãi lava vovita, kuenda asongui vosi.

2Oco Daviti wa popia lohongele yosi ya Isareli, hati, Nda vu sima okuti ca sunguluka kuenda ca tunda ku Yehova Suku yetu, tu tumi kuosi kuvakuetu va siala kofeka yosi ya Isareli, kuenda vali kovitunda loko va Lewi vovaimbo ana a va ihiwa kumue lovisenge viavo, oco va likongele letu,

3ha tu kopa ocikasa covisila via Suku yetu, momo koloneke via Saulu tua ci pukuile.

4Oco ohongele yosi ya tava oku linga ndoco, momo ca sunguluka komanu vosi.

5Oco Daviti wongolola Isareli yosi, tunde ko Sihore yokEgito toke koku panda ko Hamati, ha va kopa ocikasa ca Yehova ko Kiriyata Yeari.

6Daviti kumue la Isareli Vosi wa lamanela ko Baala ko Kiriyata Yeari, yi tiamẽla ko Yuda, ha va kopako ocikasa covisila via Suku Yehova, cina ca tukuiwa londuko ya Yehova, Ukuakutumãla pokati ka va Keruvi.

7Yu vambatela ocikasa ca Suku vekalu liokaliye, va cupa vonjo ya Avinadava. Usa la Ahiyo ovo va songuila ekalu.

8Daviti la Isareli yosi va cilila kovaso a Suku longusu yavo yosi, loku imba ovisungo, loku sika olohalupa lovisumba, loloñoma layundu kuenda olombeta.

9Eci va pitila kocimbandi ca Kidono, oco Usa wa alũla eka liaye, ha yakela ocikasa, momo olongombe via likonjoka.

10Kuenje onyeño ya Yehova ya wengukila Usa, yu wo veta momo wa alũila eka liaye kocikasa. Haipo muẽle a fila, kovaso a Suku.

11Daviti wa sumua calua, omo Yehova a veta Usa. Yu wa luka usenge waco hati, Perece Usa, toke etaili lilo.

12Keteke liaco, Daviti wa yokokela Suku kuenje hati, Ndi nena ndati ocikasa ca Suku konjo yange?

13Oco Daviti ka tualele ocikasa kimbo liaye muẽle, kimbo lia Daviti, puãi wa ci tuala konjo ya Oved Edome, u Giti.

14Ocikasa ca Suku ca tumãla lepata lia Oved Edome, vonjo yaye, olosãi vitatu. Kuenje Yehova wa sumuluĩsa onjo ya Oved Edome, la cosi caye.

← Chapter 12 Jump to: Chapter 14 →