1 Chronicles 29

Umbundu Bible (Embimbiliya - Bíblia Sagrada em Umbundu)

← Chapter 28 Jump to:

1Soma Daviti wa popia lohongele yosi, hati, Omolange Salomone, eye lika wa noliwa la Suku, haimo umalehe handi, ka kolele, kuenda upange ulo unene. Momo onjo yaco hayomunuko, puãi ya Yehova Suku.

2Oco nda likapela longusu yange yosi, oku angiliyila onjo ya Suku yange ulu wovina vi sesamela oku pangiwa lulu, lopalata yovina vi sesamela oku pangiwa lopapalata, losipi yovina vi sesamela oku pangiwa losipi, lutale wovina vi sesamela oku pangiwa lutale, loviti viovina vi sesamela oku pangiwa loviti, kuenda ovawe a berilo la a oku posuisa apa pa sokotolua, lovawe a nĩna hao ovivalo viñi viñi, lovawe a tĩla aiñi aiñi, kuenda ovawe a sieleña, alua, akahandangala.

3Kuenda vali, loku vokiya kilu lia viosi nda angiliyila ale onjo yi kola, ñuete ukuasi wange muẽle wulu lopalata, kuenje ndu weca konjo ya Suku yange, momo ñuetele onjo ya Suku yange ocisola;

4ndokuti olohulukãi vitatu violotalendo viulu, ulu wOfiri, kuenda olohũlũkãi epanduvali viopalata ya yenguluiwa yoku laña ovimano violonjo.

5Ulu waco wovina vi sesamela oku pangiwa lulu, kuenda opalata yovina vi sesamela oku pangiwa lopalata, leyi yovopange aiñi aiñi osi a lingiwa lovaka olomesele. Oco helie o panga oku lumba, ha litumbika etaili ku Yehova?

6Oco akulu vapata lolombuale viapata a Isareli lavakesongo liolohũlũkãi lava vovita, kuenda vakalei kupange wa Soma, vosi yavo va panga oku lumba.

7Va eca kupange wonjo ya Suku olohũlũkãi vitãlo violotalendo viulu, lolohũlũkãi ekui violombongo viovivela, lolohũlũkãi ekui violotalendo viopalata, lolohũlũkãi ekui lecelala violotalendo viosipi kuenda ocita colohũlũkãi violotalendo viutale.

8Ava va kala lovawe a tĩla, va a eca kukuasi wonjo ya Yehova, peka lia Yehiyele u Gerisiono.

9Oco omanu va sanjuka, momo va panga oku lumba. Lutima wa sunguluka va panga oku lumba ku Yehova. Soma Daviti, leyevo wa ci sanjukila lesanju lia lua.

10Oco Daviti wa tumbangiya Yehova kovaso ohongele yosi. Daviti wa popia hati, A Yehova, Suku ya isietu Isareli, kokuove ku kale etumbangiyo koloneke vienda ño hu!

11A Yehova, ekemalo liove! Unene wove, kuenda ulamba leyulo lunumbu, cosi cove, momo cosi ci kasi kilu leci ci kasi kilu lieve, cove! Usoma wove, a Yehova, kuenda ove wa kemãla, wa tulamela vosi, haive Fu!

12Kokuove ku tunda ukuasi lesivayo, haive o viala ovina viosi. Peka liove pali upami lunene. Peka liove pali omoko yoku kemanyaisa, leyi yoku eca ongusu kovina viosi.

13Kaliye, a Suku yetu, tu ku imbila olopandu, tu sivaya onduko yove ya kemãla.

14Puãi ame hẽ, ame elie, lomanu vange ovo velie, okuti tu tela oku lumba ndoco lutima wosi? Momo ovina viosi vi tunda kokuove, kuenje tua ku iha ño eci cove ale.

15Tuvingendeleyi kovaso ove, tuakombe, ndeci olosekulu vietu viosi. Oloneke vietu kilu lieve vi pita ndocilembo, ka kuli oku tumãla.

16A Yehova Suku yetu, ovina evi viosi viakahandangala tua vi angiliya, ha tu ku tungila onjo, ove londuko yove, viosi via tunda peka liove, kuenda viove muẽle.

17A Suku yange, nda kulihavo okuti wukuakunyika utima, loku sanjukila esunguluko. Ame, nda panga oku lumba ovina evi viosi lesunguluko liutima wange. Kaliye nda kuata onjolela oku mõla ndomo omanu vove va kasi palo loku ku lumbila lutima wosi.

18A Yehova, a Suku yolosekulu vietu Avirahama la Isake la Isareli, lava ño hu onjongole eyi kuenda ovisimilo evi vutima womanu vove. Songuila ovitima viavo kokuove.

19Eca komolange Salomone utima wocili, oco a lave ovihandeleko viove, lovovangi ove lovisila viove loku linga ovina evi viosi loku tunga onjo yulamba, yina nda angiliyila.

20Daviti wa popia lohongele yosi, hati, Sivayi Yehova Suku yene! Oco ohongele yosi ya sivaya Yehova, Suku yolosekulu viavo. Va petamisa ovitue viavo, yu va fendela Suku, kuenda Soma.

21Va lumba ovilumba ku Yehova, kuenda hela liaco va lumba ku Yehova ovilumba vioku pia elisi, ndokuti ohulukãi yolonui, lohũlũkãi yovitupi, lohũlũkãi yolomeme, kumue lovilumba viaco vioku nyua. Va lumbilavo Isareli yosi ovilumba vialua.

22Kuenje keteke liaco, va lia loku nyuila kovaso a Yehova lesanju lia lua. Va vialeka Salomone, omõla a Daviti, onjanja yavali, yu vo wavekela kovaso a Yehova ha lingi osoma, kuenda va waveka Sadoke ha lingi ocitunda.

23Oco Salomone wa tumãla kocalo ca Yehova ndosoma loku piñala komangu ya isiaye Daviti. Yu wa sumuluha, kuenje Isareli yosi ya pokola kokuaye.

24Olombuale viosi lalume vakuotõi, kumue lomãla vosi va Soma Daviti, va vumba Soma Salomone.

25Yehova wa kemalisa calua Salomone kovaso a Isareli yosi, kuenje wa wiha ulamba luwale wa piãla, olosoma viosi viatete ci sule.

26Daviti, omõla a Jese, wa viala kIsareli yosi.

27Oloneke viaye a viala kIsareli via soka akuĩ akuãla kanyamo. Ko Hevirone, wa vialako anyamo epanduvali, ko Yerusalãi anyamo akui atatu la atatu.

28Kuenje wa fa tupu ekongo liocili, ukualoneke vialua, kuenda we yukililua lovokuasi lulamba. Kuenje omolaye Salomone wa piñala komagu yaye.

29Ovilinga via Soma Daviti, evi viatete levi via sulako, tala, via sonehiwa velivulu lia Samuele ukuavitumasuku lo velivulu liuprofeto Natana kuenda velivulu lia Gadi ukuavitumasuku.

30Asapulo uviali waye wosi la a unene waye loviyaneke viosi via pita laye, levi via pita la Isareli, pamue vali lovosoma osi olofeka, cosi muẽle ca sonehiwamovo.

← Chapter 28 Jump to: