1 Chronicles 14

Umbundu Bible (Embimbiliya - Bíblia Sagrada em Umbundu)

← Chapter 13 Jump to: Chapter 15 →

1Hirama Soma ya Turo wa tuma olomunga ku Daviti. Wa tumavo oviti viovinendele kuenda vakuakusonga ovawe lolokalupindelu, ha vo tungila onjo.

2Daviti wa limbuka okuti Yehova wo vialeka ha lingi Soma ya va Isareli. Wa limbukavo okuti usoma waye wa kemala calua mekonda liomanu vaye va Isareli.

3Ko Yerusalãi, Daviti wa kuela vali akãi. Daviti wa cita vali omãla valume lomãla vakãi.

4Olonduko viomãla a citila vo Yerusalãi vievi: Siamua la Siovava la Natana la Salomone,

5la Ivehari la Elisua la Elipelete

6la Noga la Nefege la Yafiya,

7la Elisiama la Beliada la Elifelete.

8Eci va Filisiti va yeva okuti Daviti wa wavekua ha lingi Soma kIsareli yosi, oco va Filisiti vosi va tunda ha va sandiliya Daviti. Kuenje Daviti wa ci yeva, yu wa va tundila.

9Va Filisiti veya, va pakasa ocimbota ca Refaimi.

10Daviti wa pula Yehova hati, Nundila va Filisiti, ale? O va eca peka liange ale? Yehova wa popia laye hati, Kuende ño momo ndi va eca peka liove.

11Daviti wa enda ko Baale Perasimi kuenje haiko a va yulila. Daviti wa popia hati, Leka liange Yehova wolumula ovanyali vange ndendunde. Oco ocitumãlo caco va ci tukula vati Baale Perasimi.

12Va Filisiti va siako oviteka viavo. Daviti wa tuma oku vi yoka, yu via yokiwa.

13Va Filisiti veya vali, kuenje va pakasa ocimbota ca Refaimi.

14Eci Daviti a pula vali Suku, Suku wa popia laye hati, Ku ka lamane. Ñuala konyima yavo. Lisanga lavo kuna ku kasi oviti viamoreira.

15Eci o yeva kilu lioviti ondukuso ndokuenda kuasualali, oco tundila ocilunga momo Suku wa livanga kovaso yove ha nyõli olohoka via va Filisiti.

16Daviti wa linga ndeci Suku o sapuila, kuenje va nyõla olohoka via va Filisiti tunde ko Giveone toke ko Gesere.

17Oluhimo lua Daviti lua sandokaila kolofeka viosi, kuenda Yehova wa yokokisa olofeka viosi kovaso a Daviti.

← Chapter 13 Jump to: Chapter 15 →