1 Corinthians 12

Umbundu Bible (Embimbiliya - Bíblia Sagrada em Umbundu)

← Chapter 11 Jump to: Chapter 13 →

1A vamanji, si yongola okuti vu kala lonumbi yolongavelo vie Espiritu.

2Wa kũlĩhi okuti osimbu ka wa fendeleli Suku yocili wa pungukili koku fendela oviteka ka vi popi, yu wa ci lingi loku singila.

3Oco ndu sapuili siti, Lomue ihiwa ondaka le Espiritu lia Suku o popia hati, Yesu a siñaliwe, kuenje lomue o tẽla oku linga hati, Yesu eye Ñala, te nda o kasi le Espiritu Sandu.

4Kaliye kuli olongavelo viñi viñi puãi Espiritu limuamue.

5Kuli ovopange aiñi aiñi, puãi cime umuamue.

6Kuli okutalavaya kuiñi kuiñi, puãi Suku umuamue o talavayisa viosi vomanu vosi.

7Puãi komunu omunu kua eciwa olongavelo vi Espiritu, kuenje via eciwila okuti omanu va likuatisa pokati.

8Omunu umue ihiwa le Espiritu oku popia luloño; ukuavo oku popia lukũlĩhiso, le Espiritu liaco hailio;

9ukuavo ekolelo, le Espiritu liaco hailio; ukuavo ongavelo yoku kayisa, le Espiritu liaco hailio;

10ukuavo oku linga ovilimbu; ukuavo owanji wuprofeto, ukuavo oku limbuka loku tepisa aspiritu, ukuavo alimi aiñi aiñi, ukuavo oku pitiya alimi.

11Puãi olongavelo viaco viosi via eciwa le Espiritu limuamue. Eye avela omanu vosi ndeci a panga, omunu omunu.

12Momo, ndeci etimba limosi li kasi lovimatamata via lua, kuenje ovimatamata viosi vietimba, ndaño via lua, vi linga etimba limosi, haicovo Kristu.

13Momo etu vosi tua papatisiwila le Espiritu limuamue vetimba limuamue, ndaño tu va Yudea, ndaño tu va Helasi, ndaño tuapika, ndaño tumãla vamãle, kuenje vosi tua nyuisua Espiritu limuamue.

14Momo etimba hacimatamata cimosiko, puãi via lua.

15Ndaño omai yi popia yiti, Omo hameko eka, oco siukuetimbako, haimo ukuetimba.

16Etui, ndaño li popia liti, Omo hameko iso, oco siukuetimbako, haimo ukuetimba.

17Nda etimba liosi lia kaile iso, oku yeva nda kua kala pi? Nda liosi lia kaile oku yeva, okulehũla nda kua kala pi?

18Kaliye puãi, Suku wa sokeka vetimba ovimatamata viosi, cimosi cimosi, ndomo a panga.

19Nda viosi via kaile ocimatamata cimosi, etimba hẽ, nda lia kala pi?

20Kaliye puãi ovimatamata via lua, puãi etimba limuamue.

21Ka ci tava iso oku popia leka hati, Siu ku sukila; pamue vali utue oku popia lolomãi hati, Siu u sukili.

22Hacoko. Puãi ovimatamata vietimba vina vi similua okuti via piãla oku leñela, ovio vi sukilua enene.

23Evi vietimba tua soka tuti, Vi sule kesumbilo, ovio tu sumbila ca piãla; levi vietu ka via posokele ovio vi sumbiliwa ca piãla.

24Ovimatamata vietu via posoka ka vi sukila esumbilo ndolio. Puãi Suku wa sokeka etimba, locimatamata ci tukuiwa ci sule oco a muisa esumbilo lia piãla,

25okuti ketimba ka ku keye olonepele; puãi ovimatamata vi likuatele pamosi ohenda.

26Kuenje nda ocimatamata cimosi ci tala ohali, ovimatamata viosi vi talela kumuamue laco ohali. Nda ocimatamata ci pandiyiwa, ovimatamata viosi vi yolelela pamuamue laco.

27Ene wutimba lia Kristu, kuenje omunu omunu wuvimatamata vialio.

28Suku wa kapa vekongelo liaye, tete ovapostolo, vali ovaprofeto, tatu alongisi, noke vakuakulinga ovilimbu, noke vakuakusakula, noke oloñuatisi, noke asongui, noke vava va popia alimi aiñi aiñi.

29Vosi hẽ ovapostolo? Vosi ovaprofeto? Vosi alongisi? Vosi vakuakulinga ovilimbu?

30Vosi hẽ va kuete ongavelo yoku kayisa? Vosi vakualimi aiñi aiñi? Vosi vakuakupitiya?

31Haimo lumue, sandi olongavelo via velapo vie Espiritu. Kuenje ndu lekisi onjila ya velapo vali.

← Chapter 11 Jump to: Chapter 13 →