1 Corinthians 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Ocili, ca yevala okuti pokati kene pali ukahonga, lukahonga waco, ndaño pokati ka vakualofeka, ka upo, okuti kuli umue o kasi lukãi wa isiaye.

2Lene wu kasi loku lipandiya! Ka co sesameleli hẽ oku lila? U wa ci linga a tundisue pokati kene.

3Momo, ndaño si kasiko letimba, haimo lutima ñasi, kuenje nda tetuluila ale u wa linga ocina caco ndu ñasiko.

4Ndo pisila vonduko ya Ñala yetu Yesu. Oco, eci wongoloki, lame ñasiko lutima kuenda lunene wa Ñala yetu Yesu, oco,

5omunu waco weci ku Satana okuti etimba liaye li nyõleha, oco espiritu liaye li popeliwe veteke lia Ñala Yesu.

6Okulipandiya kuene kakuwako. Ka wa kũlĩhili hẽ okuti etumbisa litito li tumbisa ombolo yosi?

7Upi etumbisa liosi liale ho lingi ombolo yokaliye, ndomo ene muẽle wa pui ale etumbisa. Momo Kristu, eye Okameme ketu ko Pascoa ka lumbiwa ale.

8Oco, ka tu ka pitisi o Pascoa letumbisa liale okuti etumbisa lionya levĩho, te lombolo ka yi kuete etumbisa, yokuti yesunguluko locili.

9Ndo soneheli vukanda wange siti, Ko ka liki la vakuokahonga.

10Sia ci tualele ku vakuokahonga woluali lulo, pamue vakuacipululu, lolondiandia la vakuaviteka, momo, oco ka ci tava te nda wa tundi voluali.

11Eci ndo soneheli ceci, siti, Nda kuli umue ukuẽle ketavo wa pia kukahonga, pamue kocipululu, pamue koku fendela oviteka pamue koku imbula, pamue koku kolua, pamue kundiandia, ndaño oku lia laye ko ka li laye.

12Ñasilili nye locikele coku tetuluila ava havakuetuko? Haceneko he oku tetuluila vakuekongelo?

13Ava puai, havakuekongeloko, Suku o va tetuluila, oco, tundisi pokati kene omunu waco ukuahole.

← Chapter 4 Jump to: Chapter 6 →