1 Corinthians 8

Umbundu Bible (Embimbiliya - Bíblia Sagrada em Umbundu)

← Chapter 7 Jump to: Chapter 9 →

1Kaliye, kondaka yokulia ku lumbiwa koviteka: Tua kũlĩha okuti vosi tu kuete ukũlĩhiso. Ukũlĩhiso u koka oku lipanda, ocisola puãi ci kolisa.

2Nda umue wa soka okuti wa loñoloha ca piãla, ka loñolohele handi ndeci co sesamela oku loñoloha.

3Umue puãi, nda o sole Suku, eye wa kũlĩhiwa laye.

4Oco, kondaka yoku lia okulia kua lumbiwa koviteka, tua kũlĩha okuti ka kuli ociteka ci linga cimue koluali, kuenje ka kuli Suku, te umosi lika.

5Ndaño kuli evi va vi tukula olosuku, ci kale kilu, ci kale posi, ndomo kuli olosuku via lua lovoñala va lua,

6haimo lumue, kokuetu kuli Suku umosi lika, eye Isietu. Kokuaye kua tunda ovina viosi, letu tua tiamela kokuaye. Kulivo Ñala umosi lika, Yesu Kristu, ovina viosi via lulikiwa laye, ndaño etu.

7Hamanu vosiko puãi va kuete ukũlĩhiso waco. Vamue va lia okulia kua lumbiwa kociteka omo oviteka via va ika toke etaili lilo, oco ovitima viavo, omo ka via kolele, vi vĩhisua.

8Okulia puãi ka ku tu muisa esunga ku Suku. Ndaño ka tu li, ka tu sule, ndaño tu lia, ka tu piãla.

9Lunguki puãi, sanga oku linga ocipango cene ci lingila ocilondokua ava va leñela.

10Umue nda o ku mola, ove ukuokũlĩhiso, wa tumala komesa vonembele yociteka, eye nda wa leñela, utima waye ko lukuta hẽ oku lia evi via lumbiwa kociteka?

11U wa leñela o nyõleha lukũlĩhiso wove, eye manjove muẽle, haeye Kristu a fila.

12Oco, loku lingila vamanji akandu, loku valula ovitima viavo ka via kolele, wu lingila Kristu akandu.

13Oco, nda oku lia ositu ku konyuisa manjange, si li vali ositu oloneke viosi, sanga ñonyuisa manjange.

← Chapter 7 Jump to: Chapter 9 →