Mark 11

Umbundu Bible (Embimbiliya - Bíblia Sagrada em Umbundu)

← Chapter 10 Jump to: Chapter 12 →

1Eci va pitila ocipepi lo ko Yerusalãi ko Betefage lo ko Betania komunda yo Oliveira, oco a tuma olondonge vivali.

2Wa va sapuila hati, Kuendi kimbo li kasi kovaso yene. Tuli wiñilimo vu sanga okacimbulu ka pandekiwa, lomue wa la endelako handi. Ka kutululi, enjui lako.

3Nda umue wo puli hati, Vu ci lingila nye? oco kumbululi, hoti, Ñala o ka yongola kuenje ndopo o ka tiula vali.

4Kuenje va enda yu va sanga okacimbulu ka pandekiwa puvelo, posamua, voluwa, kuenje va ka pandulula.

5Kuenje vamue va kalako va va pula vati, Nye vu panduluila okacimbulu?

6Ovo va kumbulula ndeci Yesu a va sapuila kuenje va tava okuti va enda.

7Oco va tuala okacimbulu ku Yesu, va yalako olonanga viavo, kuenje Yesu wa endelako.

8Va lua va yala olonanga viavo vonjila, vakuavo va yalamo ovisapa va teta vusenge.

9Kuenje ava va pita kovaso lava vokinyima va vilikiya vati, Hosana. U iyilila onduko ya Ñala a sivayiwe!

10Usoma wa isietu Daviti wiya ndeti u sivayiwe! Kilu va vilikiye vati, Hosana.

11Oco wa pitila ko Yerusalãi kuenje wa iñila vonembele. Eci a vanja ovina via kalamo oco wa tundamo omo ekumbi lia enda. Wa enda ko Betánia kumue lekui liaco la vavali.

12Hẽla yaco eci va tunda ko Betánia, eye wa kala lonjala.

13Oco eci a muila kupãla ukuyu wa pulika amela, oco weya oku kũlihisa nda hẽ o sangako epako limue. Eci eyako ka sangeleko cimue, te amela lika, momo hawoko uvo wakuyu.

14Kuenje wa popia lawo hati, Lomue ka ka lie vali epako liove. Kuenje olondonge viaye via ci yeva.

15Kuenje veya ko Yerusalãi. Eye wa iñila vonembele, kuenje wa fetika oku tundisa vonembele vakuakulandisa la vakuakutolokala olombongo kuenda olomangu via vakuakulandisa olopomba.

16Kuenje ka tavele okuti umue ambata ocikuata o pita vonembele.

17Yu oku longisa wa popia lavo hati, Ka ca sonehiwile citi, Onjo yange yi tukuiwa onjo yolofeka viosi yoku likutilila? Puãi ene wa yi lingisi ocilala covingumba.

18Kuenje ovitunda vinene la vakuavisonehua va ci yeva, oco va sanda ndomo va tẽla oku u nyõla. Momo vo kuatela ohele omo owiñi wosi wa komoha okulongisa kuaye.

19Kuenje oñolosi va tunda vo Yerusalãi.

20Omele eci va pitako va mola ukuyu wa kukuta toke kolombombo.

21Kuenje Petulu oku ci ivaluka, wa popia laye hati, A Rambei, tala, uti wa siñala wa kukuta.

22Yesu oku kumbulula wa popia lavo hati, Koleli Suku.

23Mopia lene siti, Ocili u o popia lomunda eyi hati, Veyuka, limba vokalunga, kuenje ka suma suma vutima waye, puãi o kolela okuti eci a popia ci lingiwa, oco cu lingiwila.

24Oco mopia lene siti, Ovina viosi vu likutilila loku vi pinga, koleli okuti vu vi mola kuenje vu vi mola muẽle.

25Kuenje eci vu tãi oku likutilila, nda vu kuetele umue cimue, u weceli, oco Isiene o kasi kilu a wecelivo ahuku ene.

26Puãi nda ka vu ecela omanu oco Isiene o kasi kilu ka wecela akandu ene.

27Veya vali ko Yerusalãi. Eci a kala loku ñuala ñuala vonembele oco ovitunda vinene, la vakuavisonehua, lakulu, veya kokuaye.

28Vo pula vati, Ovina evi o vi lingainga lomoko ye? Wa ku iha omoko yoku lingainga ovina evi elie?

29Yesu wa va kumbulula hati, Ndu pulivo ondaka yimuamue, nda vu yi ñumbulula, oco ndu sapuilivo omoko ndingainga layo ovina evi.

30Epapatiso lia Yoano, he, liokilu ale, ele liomanu? Ñumbululi.

31Va ci lipulapula pokati vati, Nda tu popia tuti, Liokilu, o linga hati, Nda oco, nye ka wo taveleli?

32Puãi tu popia hẽ tuti, Liomanu? Va kala lusumba womanu, momo vosi va soka vati, Yoano uprofeto muẽle.

33Oco va kumbulula Yesu vati, Ka tu ci. Yu Yesu wa popia lavo hati, Lamevo si vu sapuila omoko ndinga layo ovina evi.

← Chapter 10 Jump to: Chapter 12 →