Mark 3

Umbundu Bible (Embimbiliya - Bíblia Sagrada em Umbundu)

← Chapter 2 Jump to: Chapter 4 →

1Yesu wa iñila vali vosunangonga omu mua kala omunu leka lia siõsia.

2Kuenje vo lavulula nda u sakula kesambata okuti oco vo vele.

3Eye wa popia lomunu o kasi leka lia siõsia, hati, Votokela vowiñi.

4Oco wa va pula hati, Kesambata hẽ, ci tava oku linga ciwa ale, ele oku linga cĩvi? oku popela omuenyo ale, ele oku ipa? Puãi voha ño.

5Eci a va pukukila lonyeño, momo co vala omo ovitima viavo via siva, oco wa popia lomunu waco hati, Olõla eka liove. Oco wa li olõla, kuenje eka liaye lia ñuaima.

6Haico va Fariseo va tunda, kuenje va tumbika ongombo la vakua Herode ha vo wipa.

7Yesu wa tiukila kokalunga kumue lolondonge viaye, kuenje ocipikiti ca lua co kuama. Va tunda ko Galilea loko Yudea,

8loko Yerusalãi, lo ki Idumea, lo kesinya lia Yordão, lo vofeka ya Turo, lo ko Sidono, ocipikiti caco ca lua. Omo va yeva ovina viosi a linga oco veya kokuaye.

9Yu wa sapuila olondonge viaye hati, Ngangiliyili okawato sanga owiñi u sinda enene.

10Omo a sakula va lua oco vosi va kala lovoveyi aiñi aiñi vo lipungikila oku u lamba.

11Kuenje, eci ovilũlu via viha vio mola, via wila posi kuenje via liyula, viti, Ove vumõla a Suku.

12Oco wa vi kandangiya ca lua, hati, Ko ka sapuli.

13Noke wa londa komunda, yu wa pañinya ava a yongola, kuenje veya kokuaye.

14Oco wa tukula ekui la vavali oku kala laye okuti o va tuma oku kunda,

15loku kala lomoko yoku tundisa ovilũlu.

16Ekui liaco la vavali vava: Simono, u a luka Petulu;

17kuenda Tiago omõla a Sebedeo, la Yoano manja a Tiago vana a luka va Boanarges, ca lomboloka Mãlavondindimo,

18kuenda Andereu la Filipu, Bartolomeu la Mateo la Tomasi la Tiago omõla a Alfeo, la Tadeo la Simono u Kanana;

19kuenda Yuda Isikariote u wo pakula. Noke Yesu wa tiukila konjo.

20Yu owiñi wa liongolola vali okuti ka va tẽlele oku lia.

21Oco eci vangandiaye va ci yeva, va tunda oku u kuata vati, Wa linga eyui.

22Kuenje vakuavisonehua va tunda ko Yerusalãi vati, O kasi la Belesevulu, kuenda o tundaisa ovilũlu longusu ya soma yovilũlu.

23Oco wa va pañinya kuenje wa popia lavo lolosapo hati, Satana o tundisa ndati Satana?

24Usoma nda wa litepa usoma waco ka u kala longusu.

25Onjo nda ya litepa, onjo yaco ka yi talama.

26Satana nda wa likatukila, okuti wa litepa, ka tẽla oku kala longusu, puãi o nyõleha.

27Puãi lomue o tẽla oku iñila vonjo yocindululu ho pundi ovikuata viaye, te tete wa kuta ocindululu caco, oco a punda noke onjo yaye.

28Mopia lene siti, Ocili akandu osi a ecelua omãla vomanu, letonãi liavo liosi va popia.

29Puãi u o popia Espiritu Sandu etonãi ka ecelua, puãi o pia ekandu ka li pui.

30Wa ci popela omo va linga vati, O kuetiwe locilũlu ca vĩha.

31Kuenje kueya inaye la vamanjaye, yu va talama posamua, oco va tuma oku u pañinya.

32Kua kala owiñi wa tumala laye, yu vo sapuila, vati, Tala, nyoho la vamanjove vava posamua, va ku sanda.

33Eye wa va kumbulula hati, Mai elie? Vamanjange velie?

34Oku pukukila komanu vo ñuala, wa popia hati, Tali mai la vamanjange.

35U o linga ocipango ca Suku eye manjange, haeye mukãi wange, haeye mai.

← Chapter 2 Jump to: Chapter 4 →