Mark 14 — Umbundu Bible (Embimbiliya - Bíblia Sagrada em Umbundu)

1Kaliye kua kamba oloneke vivali oku pitila ko Pascoa kuenda kofesta yombolo ka yi kuete etumbisa. Kuenje ovitunda vinene la vakuavisonehua va kala loku sanda ndeci va tẽla oku u kuata latutu ha vo wipaya,

2momo vati, Kofesta yo Pascoa hakoko sanga kuiya ema pokati komanu.

3Kuenje eci Yesu a kala vo Betánia, vonjo ya Simono ukuavilundu, osimbu a tumala kokulia, kueya ukãi wambata okambutika konguendu yocili ya tĩla ca lua, yu wa teya okambutika, wa itila onguendu yaco vutue waye.

4Puãi kua kala vamue va ci funguila pokati kavo, vati, Onguendu ya pesekela nye?

5Momo nda ca tava okuti onguendu eyi yi landisiwa ovita vitatu vialusendu, ha vi eciwa kolosuke. Kuenje vo popia.

6Puãi Yesu wa popia hati, A kale. Vu u sakalasaila nye? Momo wa ndingila upange uwa.

7Momo olosuke vu kasi lavio ño-o hũ, kuenje eci vu ci panga, vu tẽla oku vi linga ohenda; puãi ame ko kasi ño-o hũ lame.

8Eye wa linga eci a tẽla, wa wavekela etimba liange okukendiwa kualio osimbu ka lia file.

9Kuenje mopia lene siti, Ocili, kuoha ondaka yiwa yi kundilua, kuosi kilu lieve, eci ukãi u a linga cu ko tukuilua onjivaluko yaye.

10Oco Yuda Isikariote, umue pokati kekui liaco la vavali, wa enda kovitunda vinene, ho pakuila kokuavo.

11Kuenje eci va ci yeva va yolela, yu va likuminya oku wiha olombongo. Kuenje wa sanda evelo lia sunguluka lioku u pakula.

12Keteke liatete liofesta yombolo ka yi kuete etumbisa, hailio eteke va ipa okameme ko Pascoa, olondonge viaye vio pula viti, Ku pi o yongola okuti oko tu ka ku yalela oku lia o Pascoa?

13Kuenje wa tuma vavali kolondonge viaye, wa va sapuila hati, Kuendi vimbo, omo vu ñualehela lulume wa ambata esanga liovava, u kuami,

14Kuenje muosi a iñila, popia la muẽlaeanjo yaco, hoti, Ulongisi hati, Onjo omu ndi lila o Pascoa kumue lolondonge viange, yi kasi pi?

15Kuenje eye muẽle u lekisa ohondo yinene yi kasi kosapalalo, lovikuata viaco, cosi ca angiliyiwa ale, omo vu tu yalela.

16Oco olondonge via tunda, via iñila vimbo, yu via sanga ndeci a popia lavio, kuenje via angiliya o Pascoa.

17Koñolosi weya lekui la vavali.

18Osimbu va tumala kuenje va kala loku lia, Yesu wa popia lavo hati, Mopia lene siti, Ocili, umue wene o makula, haeye o kasi loku lia kumue lame.

19Va fetika oku sumua, yu vo pula, omunu omunu, vati, Ame?

20Kuenje wa popia lavo hati, Umue pekui la vavali, haeye o miñila kumue lame.

21Mõlomanu enda ndeci co sonehiwila, puãi omunu Mõlomanu a pakuiwa laye, ngongo yaye! Omunu waco hise nda ka vo citile.

22Osimbu va kala loku lia oco wa nyañula ombolo, wa yi sumuluisa kuenje wa yi timbula, yu wa yi eca kokuavo, kuenje hati, Tambuli, eyi etimba liange.

23Wa nyañula okopo, eci a yi panduila, wa yi eca kokuavo kuenje vosi va nyuako.

24Yu wa popia lavo hati, Eyi osonde yange yocisila yi pesilua va lua.

25Mopia lene siti, Ocili si nyui vali kepako liuyuva, te keteke ndi nyuila epako liokaliye vusoma wa Suku.

26Eci va imba ocisungo oco va tunda, kuenje va enda komunda yo Oliveira.

27Oco Yesu wa popia lavo hati, Ene vosi vu njanduluka, momo ca sonehiwa citi, Mbeta ungombo okuti olomeme vi sandoka.

28Puãi, eci okuti nda pinduka, ndu tetekeli ko Galilea.

29Petulu wa popia laye hati, Ndaño vosi va ku yanduluka haimo ame siu ku yanduluka.

30Kuenje Yesu wa popia laye hati, Mopia love siti, Ocili, ove, etaili, uteke ulo, osimbu ekondombolo ka lia lilile luvali, o liñala lutatu.

31Puãi Petulu oku popia, wa panamala ca lua hati, Ndaño ci ñokela oku fila kumue love, haimo si ku likali. Kuenje haico va popia vosi.

32Oco veya vocumbo ca tukuiwa Gesemane, kuenje wa popia lolondonge viaye, hati, Tumali kulo osimbu ndi likutilila.

33Kuenje wa enda la Petulu la Tiago la Yoano, oco wa fetika oku tokotelua loku sakalala.

34Kuenje wa popia lavo hati, Utima wa tekela kokufa. Kali kulo. Lavululi.

35Oco wamako kamue, kuenje wa wila posi, wa likutilila okuti, nda ci tava, ola yu lomboke.

36Kuenje wa linga hati, Aba, a Tate, ovina viosi vi tẽliwa love. Njupe okopo eyi, haimo eci manga hacoko, te eci ove wa panga.

37Kuenje weya, wa va sanga va pekela, yu wa popia la Petulu hati, A Simono, wa pekela? Kua tẽlele oku lavuluila kumue lame ola yimuamue?

38Lavululi, kuenda likutilili okuti eyonjo ka liu sangi. Ocili, utima u kasi lombili puãi etimba lia leñela.

39Kuenje wa enda vali, wa likutilila, olondaka viaco haivio a popia.

40Kuenje weya vali, yu wa va sanga va pekela, momo ovaso avo a lemiwa. Ka va kũlĩhile ndeci vo kumbulula.

41Oco weya vali onjanja yatatu, yu wa popia lavo hati, Haimo vu pekelela loku puyuka? Ci tẽla! Ola ya pitila. Mõlomanu wa pakuiwa povaka a vakuakandu.

42Pasuki. Tu endi. Tali, u o makula o kasi ocipepi.

43Osimbu a kala loku popia, haico Yuda eya, haeye umue pokati kekui liaco la vavali. Weya lowiñi wambata olosipata lolohunya, wa tunda kovitunda vinene lo ku vakuavisonehua lo kakulu.

44Puãi u wo pakula wa va iha ale ondimbukiso, hati, U sipula, eye. U kuati. Kuendi laye lutate.

45Kuenje eci a keya, wa suñama kokuaye, yu wa linga hati, A Rambei, kuenje wo sipula.

46Yu vo kuata.

47Puãi umue wa kala kumue lavo wa pola osipata yaye, kuenje wa veta ukuenje wocitunda cinene, wo sonja etui liaye.

48Yesu wa popia lavo hati, Wa tundi lolosipata lolombueti oku ñuata ndocingumba?

49Nda kala lene eteke leteke oku longisa vonembele kuenje ka wa ñuateli. Puãi ca lingiwila ndoco okuti ovisonehua vi lingiwa.

50Kuenje vosi vo sia, va tila.

51Ukuneje umue wo kuama ocituanyima, wa lisikilila ño onanga yovalatanya, yu vo kuata.

52Puãi eye wa sia onanga yovalatanya, wa tila ño ndoto.

53Oco va tuala Yesu kocitunda cinene. Ovitunda viosi vinene, lakulu, la vakuavisonehua, yongoloka ale.

54Kuenje Petulu wo kuama ocituanyima, toke vokati kocitali cocitunda cinene. Wa tumalela kumue lakuenje vaco oku yota ondalu.

55Kaliye ovitunda vinene lekanga liosi lia sanda uvangi woku pisila Yesu okufa, puãi ka vo sangele.

56Momo va lua vo wimbila uvangi wesanda, puãi ovovangi avo ka a lisokaile.

57Kuenje vamue va votoka oku u wimbila uvangi wesanda, vati,

58Tuo yeva wa linga hati, Nyõla onembele eyi ya tungiwa lovaka, kuenje voloneke vitatu nunga yikuavo ka yi tungiwa lovaka.

59Haimo, ndaño ovovangi avo ka a lisokaile.

60Ocitunda cinene ca votoka pokati kavo, kuenje ca pula Yesu, citi, Ku kumbulula cime? Ava va ku pindikila nye?

61Puãi Yesu woha ño, ka kumbuluile cimue. Ocitunda cinene co pula vali citi, Ove vu Kristu, Omõla U o sivayiwa, ale?

62Yesu hati, Ame, kuenje vu mola Mõlomanu oku tumala kondio yu Unene, loku iya lalende okilu.

63Oco ocitunda cinene ca tola onanga yaye, citi, Tu yonguila nye vali olombangi?

64Wa yevi etonãi. Wa soki nye? Kuenje vosi vo pisa vati, Wa sesamela okufa.

65Oco vamue va fetika oku u siyila kuenje, oku sitika ocipala caye, vo veta loku linga vati, U pilula. Akuenje vaco, eci vo tambula, vo tendula ovikusi.

66Eci Petulu a kala kombuelo vocitali, kueya ukãi upika wokonjo yocitunda cinene.

67Oku mola Petulu o yota, wo vanja, hati, Lovevo wa kala lu Nasara, Yesu.

68Puãi eye wa ci likala hati, Eci o popia si ci, si ci yevite. Kuenje wa tunda, wa enda pombundi, oco ekondombolo lia lila.

69Kuenje ukãi waco upika wo mola, yu wa fetika vali oku popia lava va tãi hati, U, umue wavo.

70Puãi Petulu wa ci likala vali. Kuenje okasimbu naito ño ava va tãiko va popia la Petulu, vati, Ocili vu wavo momo u Galilea.

71Puãi eye wa fetika oku ci lisiñalela loku lisinga hati, Omunu waco wa tukuli ame siu wi.

72Haico ekondombolo lia lila vali. Kuenje Petulu wa ivaluka ondaka yina Yesu a popia laye, hati, Osimbu ekondombolo ka lia lilile luvali o liñala lutata. Oku ci sokolola wa lila ca lua.