Revelation 10

Umbundu Bible (Embimbiliya - Bíblia Sagrada em Umbundu)

← Chapter 9 Jump to: Chapter 11 →

1Oco nda mola ungelo ukuavo wa pama wa tunda kilu, wa wala elende, lo kutue waye kua kala olukongolo. Ocipala caye ca soka ndekumbi, lovolu aye a soka ndolongunji viondalu.

2Peka liaye pa kala okaciña ka nyanyumuha. Wa liata kokalunga lomãi yaye yondio kuenda lomãi yepĩli wa liata kongongo.

3Wa vilikiya lolukandi lua lisoka ndohosi yi koma. Eci a vilikiya, oco ovilemĩlo epanduvali via lemĩla.

4Leci via lemĩla ovilemĩlo epanduvali nda si oku soneha, puãi nda yeva ondaka ya tunda kilu, yiti, Sitikako ovina via popia ovilemĩlo epanduvali. Ku ka vi sonehe.

5Oco ungelo ndo mola wa liata kokalunga lo kongongo, wa tulika eka liaye liondio kilu,

6kuenje wa lisinga lu o kasi lomuenyo wolotembo ka vi pui, haeye wa lulika ilu levi vi kasimo, losi levi vi kasi kilu liayo, lokalunga levi vi kasimo, hati, Ka ku kala vali oku amisapo,

7puãi kotembo yondaka yungelo wepanduvali, eci a sika, oco ku lumbuluiwa elumbu lia Suku, ndeci a longaisa akuenje vaye ovaprofeto.

8Oco ondaka nda yeva, yina ya tunda kilu, ya popia vali lame, yiti, Kuende, ka tambule ociña ca nyanyumuha peka liungelo wa liata kokalunga lo kongongo.

9Oco nda pitila kungelo, nda popia laye siti, Va nyihe okaciña. Eye wa popia lame hati, Ka tambula, ka lia. Ka lula vimo liove, vomẽla puãi ka sosa ndowiki.

10Oco, nda tambula okaciña peka liungelo, kuenje nda ka lia. Vomẽla mua sosa ndowiki, puãi, eci nda ka lia, vimo liange mua lula.

11Kuenje va sapuila vati, Pa ku kambela vali oku imba owanji weci ciya komanu va lua, lo kolofeka via lua, kuenda ku vakualimi aiñi aiñi lo kolosoma via lua.

← Chapter 9 Jump to: Chapter 11 →