Revelation 15

Umbundu Bible (Embimbiliya - Bíblia Sagrada em Umbundu)

← Chapter 14 Jump to: Chapter 16 →

1Noke nda mola owima ukuavo kilu. Owima waco unene haiwo u komohisa. Ovangelo epanduvali vambata afengi epanduvali, hao a sulako, momo kokuao oko onyeño ya Suku ya tẽlisiwila.

2Oco nda mola cimue ca soka ndokalunga kovitulu ya litenga londalu. Ava va yula ocinyama lociñumañuma caco kuenda o número yonduko yaco, va talama ocipepi lokalunga kovitulu. Vambata povaka olohalupa via Suku,

3kuenje va imba ocisungo ca Mose, ukuenje wa Suku, locisungo ca Kameme, vati, A Yehova Suku Tõlo, ovilinga viove vinene, kuenda vi komohisa cimue. A Soma yolofeka, olonjila viove via suñama kuenda viocili.

4A Yehova, u ka tava oku ku sumbila loku tumbangiya onduko yove, helie? Momo ove lika o kola. Olofeka viosi viya, vi ku fendela, momo okutetulula kuove kua moleha.

5Kovaso yovina evi nda vanja, kuenje kilu kua yikuluiwa ohondo yi kola yotavernakulu yovisila.

6Vohondo yaco yi kola mua tunda ovangelo epanduvali vana vambata afengi epanduvali. Va wala olonanga vi vela haivio vi nina. Va litika volonulo lovivia viulu.

7Oco cimue koviendalomuenyo viaco vikuãla ca eca kovangelo vaco epanduvali atiyela epanduvali ulu, hao e yuka onyeño ya Suku o kasi lomuenyo oloneke vi enda ño-o hũ.

8Ohondo yi kola ye yuka owisi wa tunda kulamba wa Suku kuenda kunene waye. Kuenje lomue o tẽla oku iñila vohondo yi kola toke afengi ana epanduvali ovangelo epanduvali a pita.

← Chapter 14 Jump to: Chapter 16 →