Revelation 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Oco, nda mola peka liondio liu wa tumala kocalo ociña ca sonehiwa vokati lo konyima, haico ca sitikua lasitikilo epanduvali.

2Nda mola ungelo wa pama wa vilikiya lolukandi hati, U wa sesamela oku iñulula ociña loku situlula asitikilo aco, helie?

3Lomue wa ci pondola, ndaño umue wo kilu, ndaño umue wo posi, ndaño umue wo vemehi liosi, lomue wa tẽla oku iñulula ociña pamue oku vanjamo.

4Oco nda lila ca lua, momo ka kua molehele umue wa sesamela oku iñulula ociña pamue oku vanjamo.

5Oco umue pokati kakulu wa popia lame hati, Ku ka lile. Ota, Hosi yokepata lia Yuda, haeye ukuambuto ya Daviti, eye wa yula, kuenje wa sesamela oku iñulula ociña lasitikilo aco epanduvali.

6Oco, pokati kocalo loviendalomuenyo vikuãla, kuenda pokati kakulu, nda muilapo Okameme ka tãi, huti ño ka ipaiwa, ka kuete olombinga epanduvali lovaso epanduvali, o-o aspiritu epanduvali a Suku, ana a tumiwa kuosi kilu lieve.

7Kameme weya, eye wa tambula ociña peka liondio liu wa tumala kocalo.

8Eci a tambula ociña, oco oviendalomuenyo viaco vikuãla, lakulu vaco akui avali la vakuãla, va wila posi kovaso a Kameme, va kuete omunu ohalupa, omunu ohalupa, latiyela ulu e yuka insensu, o-o alombelo olosandu.

9Va imba ocisungo cokaliye, vati, Ove wa sesamela oku tambula ociña, loku situlula asitikilo aco; momo wa pondiwa, kuenje wa yovola omanu losonde yove, noke wa va nena ku Suku. Omanu va yovuiwa va tunda kapata osi, lo kalimi aiñi aiñi osi, lo kovositue osi, lo kolofeka viosi.

10Haive wa va lingisa vakuosoma wa Suku yetu, lovitunda viaye, kuenje va viala kilu lieve.

11Nda vanja vali kuenje nda yeva onjuvungo yovangelo va lua va ñuala ocalo, loviendalomuenyo lakulu, lowiñi wavo wa soka ohuluwa yolohuluwa, lohũlũkãi yolohũlũkãi.

12Va popia lolukandi, vati, Okameme ka ipaiwa ka posokela oku mola unene lukuasi luloño lolohõlo kuenda esumbilo lulamba lesivayo.

13Nda yeva evi via lulikiwa viosi, evi vi kasi kilu, levi vi kasi posi vemehi liosi, levi viovokalunga, lovina viosi vi kasimo, via popia viti, Ku-u wa tumala kocalo kuenda ku Kameme, ku kale esivayo lesumbilo kuenda ulamba loku viala oloneke vi enda ño-o hũ, ka vi pui.

14Kuenje oviendalomuenyo viaco vikuãla via linga viti, Amene. Akulu vaco va wila posi, va fendela.

← Chapter 4 Jump to: Chapter 6 →