Romans 15

Umbundu Bible (Embimbiliya - Bíblia Sagrada em Umbundu)

← Chapter 14 Jump to: Chapter 16 →

1Oco, etu tua pama, ca tu sesamela oku ambatisako ava va hongua okuleñela kuavo, haku lisokololako etu muẽle.

2Etu vosi omunu omunu a sokoluile ukuavo eci ciwa coku u kolisa.

3Momo Kristu ka lisokoluile eye muẽle, puãi, ndeci ca sonehiwa okuti, Efuki liava va ku fũkĩlisa lia mbuila.

4Momo cosi ca sonehiwa kosiahũlu ca sonehiwila oku tu longisa okuti, epandi kuenda okukolisiwa lovisonehua ku tu kokela elavoko.

5Oco Suku yepandi, haeye ukuakukolisa, a tave okuti, pokati kene vu sima sima cimuamue, ndeci ca Kristu Yesu,

6okuti lutima umuamue, lomẽla umuamue, vu sivaya Suku haeye Isia ya Ñala yetu Yesu Kristu.

7Oco litambuli pokati ndeci Kristu o tambuli, okuti Suku o muisua ulamba.

8Mopia siti, Kristu wa lingisua oñuatisi ya vakuevamba oku lekisa ocili ca Suku, okuti o kolisa olohuminyo via eciwa ku vakukululu,

9kuenda okuti vakualofeka va kemainya Suku mekonda liohenda yaye. Ndeci ca sonehiwa okuti, Oco hu sivayaila pokati ka vakualofeka. Njimbila onduko yove ovisungo.

10Kuenda vali hati, A vakualofeka, yoleleli kumue lomanu vaye.

11Kuenda vali hati, A vakualofeka vosi, pandiyi Ñala. Omanu vosi vo sivaye.

12Kuenda vali Isaya wa linga hati, Ocikoti ca Jese ciya. Vakualofeka va lavokaila ku o katuka oku viala vakualofeka.

13Suku yelavoko o yukisi esanju liosi lombembua vekolelo liene okuti, longusu ye Espiritu Sandu, vu supoka lelavoko.

14A vamanji, ame muẽle nda kolela okuti ene we yuki esunga, haene we yuki ukũlĩhiso wosi, kuenje vu tẽla oku lilungula pokati.

15Puãi kolondaka vimue, mekonda liocali ca nyihiwa la Suku, ndu soneheli lutõi wa lua oku wivaluisi. Ocali ca Suku ca nyihiwila

16okuti ndinga oñuatisi ya Kristu Yesu yoku kuatisa vakualofeka vupange wefendelo liondaka yiwa ya Suku, okuti vakualofeka, eci va eciwa ndocilumba ku Suku, oco vo sesamela omo va kolisua le Espiritu Sandu.

17Oco, ndi lipandiyila upange nda lingila Suku vu Yesu Kristu.

18Si lukuta oku popia cimue, te eci Kristu, poku talavaya lame, a linga oku koka epokolo lia vakualofeka. Olondaka lovilinga,

19lunene wovilimbu, lovikomo, lunene we Espiritu Sandu, Kristu a talavaya lavio viosi, okuti tunde ko Yerusalãi, ñuale-e toke ki Iliriku, nda sapula cosi condaka yiwa ya Kristu.

20Ocimaho cange ca kala muẽle oku kunda ondaka yiwa. Haku yi kundilako kuna Kristu a kundiwile ale, sanga nunga kociseveto ca sevetiwa lukuavo.

21Puãi, ndeci ca sonehiwa okuti, Ava ka va lo kundiwila va mola, lava ka va lo yeva ci va lomboloka.

22Oco ci lombolola ndomo olonjanja via lua nda tatekiwa oku iya kokuene.

23Puãi kaliye, omo si kuete vali ocitumalo kolofeka vilo, lomo anyamo a lua nda livelavela oku iya kokuene,

24oco cilo ndavoka oku vu mola eci mita poku enda ke Espanha. Elavoko liange lieli, oku lipasula lene otuneke tumue, noke, kovaso yaco, ene muẽle vu mbuilisa vonjila yoku enda ke Espanha.

25Puãi, cilo ngenda ko Yerusalãi oku kuatisa olosandu.

26Momo va Makedonia la va Akaia va soka okuti ciwa oku konguisa olombongo vioku kuatisa olosuke vi kasi pokati kolosandu ko Yerusalãi.

27Va ci linga lesanju, kuenje ocili, va va kuetele ofuka. Momo, nda vakualofeka va kuete onepa yavo yasumũlũho avo Espiritu, ca va sesamelavo oku va kuatisa kovina vietimba.

28Oco, eci ndi ci linga, leci ndi va iha ombanjaile yaco, oco mita kokuene oku enda ke Espanha.

29Kuenda vali, ndi ci okuti, eci njiya kokuene, njiya tupu nde yuka esumũlũho lia Kristu.

30A vamanji, ndu peyi la Ñala yetu Kristu, locisola ce Espiritu, okuti vu kolisako kumue lame volohutililo viene ku Suku oku liñutilila.

31Tu likutilila okuti mopelua kuava ka va tavele vo Yudea, kuenda okuti, ombanjaile ñasi loku ambata yi tambuiwa lesanju lolosandu vio ko Yerusalãi.

32Nda oco, njiya kokuene lonjolela locipango ca Suku, si puyukila kokuene.

33Suku yombembua a kale lene vosi. Amene.

← Chapter 14 Jump to: Chapter 16 →