Romans 9

Umbundu Bible (Embimbiliya - Bíblia Sagrada em Umbundu)

← Chapter 8 Jump to: Chapter 10 →

1Ñasi loku popia ocili vu Kristu, si kembi. Utima wange u njimbilavo uvangi ve Espiritu Sandu

2okuti nda sumua enene, kuenje vutima nda sakalala olonjanja viosi.

3Momo, nda ca tavele, kuenda nda ci kuatisa vamanjange haivo vangandiange vetimba, nda ndi livela oku siñaliwa ame muẽle loku tepiwa ku Kristu.

4Ovo va Isareli, omangu yumõla, yayo; lulamba, wavo; lovisila, viavo; lokueciwa kuovihandeleko, kuavo; lokuvumba Suku, kuavo; lolohuminyo, viavo;

5vakukululu, vavo; kuenje vepata liavo lietimba mua citiwila Mesiya. Suku, u o viala ovina viosi, a pandiyiwe oloneke vi enda ño-o hu. Amene.

6Puãi, ka ci kasi okuti ondaka ya Suku ya ponya. Momo havosiko vakuambuto ya Isareli okuti va Isareli vocili.

7Ndaño vakuambuto ya Avirahama, havosiko omãla vaye vocili. Puãi, ndeci ca sonehiwa, haico ci kasi, okuti, Ombuto yove yi lukuluiwa la Isake,

8momo oku citiwa letimba hacoko ci lingisa omanu omãla va Suku, puãi omala vu wa citiwa lohuminyo ovo va tendiwa ndombuto.

9Momo ohuminyo ya popia yiti, Enyamuali, koloneke nda vilo, niuka, kuenje Sara o kala lomõla ulume.

10Kuenje hacoko lika, puãi, eci Rebeca a mina olonjamba la kukululu yetu Isake,

11leci omãla ka va citiwile handi, okuti ka va lingile handi ndaño ciwa, ndaño cĩvi, oco

12vo sapuila vati, Ukulu o vumba umalehe. Ca lingiwila oku tẽlisa ocipango ca Suku coku nola, lokunola kuaco ka kuiyilila ovilinga te okukovonga kuaye.

13Ndeci ca sonehiwa citi, Yakoba ndu sole, Esau puãi, ndu suvuka.

14Oco he, tu popia vali nye? Ku Suku hẽ, kuli eci ka ca sungulukile? Ka kuli.

15Momo wa popia la Mose hati, Ndinga ohenda u ndu linga ohenda, ñuatela ocikembe u ñuetele ocikembe.

16Eci cosi ci lingiwila ohenda ya Suku, ocipango comunu, pamue upange waye, hawoko.

17Momo ocisonehua ca popia la Fareo citi, Oku lekisila vokuove unene wange, okuti onduko yange yi tukuiwa voluali luosi, oco muẽle nda ku katuila.

18Oco, o linga ohenda ku wa panga, kuenje u wa panga u sivisa utima.

19Oco o mula huti, Nda oco, Suku o tẽla vali ndati oku veta evelo? Momo helie o tẽla oku tamalala locipango caye?

20Puãi, ove amunu, ove elie okuti o kumbulula Suku? Cimue ca luvikiyiwa hẽ, ci pula u wa ci luvikiya, citi, Nye wa nduvikiyila ndomo?

21Ukuakutunga olombia hẽ, ka kuete omoko yoku linga cosi a panga lotuma? Lombunge yimosi he, ka tẽla oku tunga ombia yimue ya posoka, yikuavo yaño?

22Mbi Suku, omo a yongola oku lekisa onyeño yaye loku limbukisa unene waye, oco wa likandangiya lepandi lia lua oku nyõla olombia via tungiwila onyeño, vina vi sesamela okunyõleha.

23Eci mbi, wa ci lingila olombia via tungiwila ohenda, vina via noliwila ale oku muisua ulamba, okuti o vi muisa muẽle ukuasi wulamba waye.

24Evi via noliwa ca lomboloka etu, kuenje tuopiwa, ha ku va Yudeako lika, puãi lo ku vakualofeka le.

25Ndeci a popia velivulu lia Hosea, hati, Mopia la Hamanuvangeko, siti, Vumanu vange. Lu ka soliwile ndu tukula, siti, Wange wa soliwa.

26Kuenda vali hati, Kuna va sapuililue hati, Hamanuvangeko, haiko va sapuilua, hati, Vumãla va Suku yomuenyo.

27Isaya layevo oco a tukuila Isareli lolukandi hati, A Isareli, ndaño omanu vove va soka ndeseke liokalunga, ocisupe cavo lika ci popeliwa.

28Momo Ñala o tẽlisa ondaka yaye kilu lieve kuenje o yi linga loku teta onimbu.

29Ci kala ndeci Isaya a cimbila ale owanji, wokuti, Nda Ñala yolohoka ka tu sililepo ombuto, nda tua linga nda Sodoma, kuenda nda tua lisoka la Gomora.

30Oco hẽ, tu popia vali nye? Tu popia tuti, Vakualofeka ka va sandele esunga ovo va sanga esunga. Va sanga esunga lia tunda kekolelo,

31osimbu va Isareli va sanda esunga poku pokola kovihandeleko ka va la tẽlisa ovihandeleko viaco.

32Nye ca va tateka oku li sanga? Momo okusanda kuavo ka kua tundile kekolelo, puãi va sima vati, Esunga li tunda kovilinga. Va lilondoka vewe liocilondokua,

33ndeci ca sonehiwa okuti, Ota, vo Siono omo ñapa ewe liocilondokua, hailio ewe lietatamiso. Kuenje u o li kolela, osõi ka yu kuti.

← Chapter 8 Jump to: Chapter 10 →

Recommended Reading

Commentary Romans Commentaries → Devotional Romans Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →