Esther 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Aḳhasúerus ke dinoṉ meṉ aisá húá, (yih wuhí Aḳhasúerus hai jo Hindostán se Kúsh tak ek sau sattáís suboṉ par saltanat kartá thá:)

2ki un dinoṉ meṉ jab Aḳhasúerus apne taḳht i saltanat par jo qasr i Sosan meṉ thá baiṭhá,

3to us ne apní saltanat ke tísre sál apne sab hákimoṉ aur ḳhádimoṉ kí ziyáfat kí: aur Fárs aur Mádai kí táqat, aur súboṉ ke umará aur sardár us ke huzúr házir the:

4tab wuh bahut din, ya‘ní ek sau assí din tak apní jalílu’l qadr saltanat kí daulat aur apní a‘lá ‘azmat kí shán un ko dikhátá rahá.

5Jab yih din guzar gaye, to bádsháh ne sab logoṉ kí, kyá baṛe kyá chhoṭe, jo qasr i Sosan meṉ maujúd the, sháhí mahall ke bág̣ ke sahn meṉ sát din tak ziyáfat kí.

6Waháṉ safed, aur sabz, aur ásmání rang ke parde the jo katání aur arg̣awání ḍoriyoṉ se chándí ke halqoṉ aur sang i marmar ke sutúnoṉ se bandhe the; aur surḳh, aur safed, aur zard, aur siyáh sang i marmar ke farsh par sone aur chándí ke taḳht the.

7Aur unhoṉ ne un ko sone ke piyáloṉ meṉ jo muḳhtalif shakloṉ ke the píne ko diyá, aur sháhí mai bádsháh ke karam ke muwáfiq kasrat se piláí.

8Aur mainoshí is qá‘ide se thí, ki koí majbúr nahíṉ kar saktá thá; kyúṉki bádsháh ne apne mahall ke sab ‘uhdadároṉ ko tákíd farmáí thí, ki wuh har shaḳhs kí marzí ke mutábiq kareṉ.

9Aur Washtí malika ne bhí Aḳhasúerus bádsháh ke sháhí mahall meṉ ‘auratoṉ kí ziyáfat kí.

10Sátweṉ din, jab bádsháh ká dil mai se masrúr thá, to us ne sátoṉ ḳhwájasaráoṉ ya‘ní Mahúmán, aur Biztá, aur Ḳharbúnáh, aur Bigtá, aur Abagtá, aur Zitár, aur Karkas ko jo Aḳhasúerus bádsháh ke huzúr ḳhidmat karte the hukm diyá,

11ki Washtí malika ko sháhí táj pahinákar bádsháh ke huzúr láeṉ, táki us ká jamál logoṉ aur umará ko dikháe; kyúṉki wuh dekhne meṉ ḳhúbsúrat thí.

12Lekin Washtí malika ne sháhí hukm par jo ḳhwájasaráoṉ kí ma‘rifat milá thá, áne se inkár kiyá. So bádsháh bahut jhilláyá, aur dil hí dil meṉ us ká g̣azab bhaṛká.

13Tab bádsháh ne un dánishmandoṉ se jin ko waqtoṉ ká imtiyáz thá púchhá, (kyúṉki bádsháh ká dastúr sab qánúndánoṉ aur ‘adlshinásoṉ ke sáth aisá hí thá;

14aur Fárs aur Mádai ke sátoṉ amír, ya‘ní Kárshíná, aur Sitár, aur Admátá, aur Tarsís, aur Maras, aur Marsiná, aur Mamúkán us ke muqarrab the jo bádsháh ká dídár hásil karte, aur mamlukat meṉ sadrnishín the:)

15ki qánún ke mutábiq Washtí malika se kyá karná cháhiye; kyúṉki us ne Aḳhasúerus bádsháh ká hukm jo ḳhwájasaráoṉ kí ma‘rifat milá nahíṉ máná hai?

16Aur Mamúkán ne bádsháh aur amíroṉ ke huzúr jawáb diyá, ki Washtí malika ne faqat bádsháh hí ká nahíṉ, balki sab umará aur sab logoṉ ká bhí jo Aḳhasúerus bádsháh ke kull súboṉ meṉ haiṉ qusúr kiyá hai.

17Kyúṉki malika kí yih bát báhar sab ‘auratoṉ tak pahuṉchegí, jis se un ke shauhar un kí nazar meṉ zalíl ho jáeṉge, jab yih ḳhabar phailegí ki Aḳhasúerus bádsháh ne hukm diyá ki Washtí malika us ke huzúr láí jáe, par wuh na áí;

18aur áj ke din Fárs aur Mádai kí sab begameṉ jo malika kí bát sun chukí haiṉ bádsháh ke sab umará se aisá hí kahne lageṉgí. Yúṉ bahut hiqárat aur taish paidá hogá.

19Agar bádsháh ko manzúr ho, to us kí taraf se sháhí farmán nikle, aur wuh Fársíoṉ aur Mádíoṉ ke áín meṉ mundarj ho táki badlá na jáe, ki Washtí Malika Aḳhasúerus bádsháh ke huzúr phir kabhí na áe, aur bádsháh us ká sháhána rutba kisí âur ko jo us se bihtar hai ‘ináyat kare.

20Aur jab bádsháh ká farmán, jise wuh sádir karegá, us kí sárí saltanat meṉ (jo baṛí hai) shuhrat páegá, to sab bíwiyáṉ apne apne shauhar kí, kyá baṛá kyá chhoṭá, ‘izzat kareṉgí.

21Yih bát bádsháh aur umará ko pasand áí; aur bádsháh ne Mamúkán ke kahne ke mutábiq kiyá:

22kyúṉki us ne sab sháhí súboṉ meṉ súbe súbe ke hurúf, aur qaum qaum kí bolí ke mutábiq ḳhatt bhej diye, ki har mard apne ghar meṉ hukúmat kare, aur apní qaum kí zabán meṉ kalám kare.

Jump to: Chapter 2 →