Esther 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Aur tísre din aisá húá, ki Ástar sháhána libás pahinkar sháhí mahall kí bárgáh i andarúní meṉ sháhí mahall ke sámne khaṛí ho gayí. Aur bádsháh apne sháhí mahall meṉ apní taḳht i saltanat par qasr ke muqábil ke darwáze par baiṭhá thá.

2Aur aisá húá, ki jab bádsháh ne Ástar malika ko bárgáh meṉ khaṛí dekhá, to wuh us kí nazar meṉ maqbúl ṭhahrí; aur bádsháh ne wuh sunahlá ‘asá jo us ke háth meṉ thá Ástar kí taraf baṛháyá. So Ástar ne nazdík jákar ‘asá kí nok ko chhúá.

3Tab bádsháh ne us se kahá, Ástar malika, tú kyá cháhtí hai, aur kis chíz kí darḳhwást kartí hai? ádhí saltanat tak wuh tujhe baḳhshí jáegí.

4Ástar ne ‘arz kí, Agar bádsháh manzúr ho, to bádsháh us jashn meṉ, jo maiṉ ne us ke liye taiyár kiyá hai, Hámán ko sáth lekar áj tashríf láe.

5Bádsháh ne farmáyá, ki Hámán ko jald láo, táki Ástar ke kahe ke muwáfiq kiyá jáe. So bádsháh aur Hámán us jashn meṉ áe, jis kí taiyárí Ástar ne kí thí.

6Aur bádsháh ne jashn meṉ mainoshí ke waqt Ástar se púchhá, ki Terá kyá suwál hai? wuh manzúr hogá; terí kyá darḳhwást hai? ádhí saltanat tak wuh púrí kí jáegí.

7Ástar ne jawáb diyá, Merá suwál aur merí darḳhwást yih hai;

8agar maiṉ bádsháh kí nazar meṉ maqbúl húṉ, aur bádsháh ko manzúr ho ki merá suwál qubúl, aur merí darḳhwást púrí kare, to bádsháh aur Hámán mere jashn meṉ jo maiṉ un ke liye taiyár karúṉgí áeṉ, aur kal jaisá bádsháh ne irshád kiyá hai, maiṉ karúṉgí.

9Us din Hámán shádmán aur ḳhush hokar niklá; par jab Hámán ne bádsháh ke pháṭak par Mardakí ko dekhá, ki us ke liye na khaṛá húá, na haṭá, to Hámán Mardakí ke ḳhiláf g̣usse se bhar gayá.

10Taubhí Hámán apne áp ko zabt karke ghar gayá, aur log bhejkar apne dostoṉ ko aur apní bíwí Zarish ko bulwáyá.

11Aur Hámán un ke áge apní shán o shaukat, aur farzandoṉ kí kasrat ká qissa kahne lagá, aur kis kis tarah bádsháh ne us kí taraqqí kí, aur us ko umará aur bádsháhí mulázimoṉ se ziyáda sarfaráz kiyá.

12Hámán ne yih bhí kahá, Dekho, Ástar malika ne siwá mere kisí ko bádsháh ke sáth apne jashn meṉ jo us ne taiyár kiyá thá áne na diyá; aur kal ke liye bhí us ne bádsháh ke sáth mujhe da‘wat dí hai.

13Taubhí jab tak Mardakí Yahúdí mujhe bádsháh ke pháṭak par baiṭhá dikháí detá hai, in bátoṉ se mujhe kuchh hásil nahíṉ.

14Tab us kí bíwí Zarish aur us ke sab dostoṉ ne us se kahá, ki Pachás háth úṉchí súlí banáí jáe, aur kal bádsháh se ‘arz karke Mardakí us par chaṛháyá jáe: tab ḳhushí ḳhushí bádsháh ke sáth jashn meṉ jáná. Yih bát Hámán ko pasand áí; aur us ne ek súlí banwáí.

← Chapter 4 Jump to: Chapter 6 →