Esther 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1In bátoṉ ke ba‘d Aḳhasúerus bádsháh ne Ajájí Hammadátá ke beṭe Hámán ko mumtáz aur sarfaráz kiyá, aur us kí kursí ko sab umará se jo us ke sáth the bartar kiyá.

2Aur bádsháh ke sab mulázim jo bádsháh ke pháṭak par the Hámán ke áge jhukkar us kí ta‘zím karte the; kyúṉki bádsháh ne us ke báre meṉ aisá hí hukm kiyá thá. Par Mardakí na jhuktá, na us kí ta‘zím kartá thá.

3Tab bádsháh ke mulázimoṉ ne jo bádsháh ke pháṭak par the Mardakí se kahá, Tú kyúṉ bádsháh ke hukm ko toṛtá hai?

4Jab wuh us se roz kahte rahe, aur us ne un kí na mání, to unhoṉ ne Hámán ko batá diyá, táki dekheṉ ki Mardakí kí bát chalegí, yá nahíṉ: kyúṉki us ne un se kah diyá thá, ki Maiṉ Yahúdí húṉ.

5Jab Hámán ne dekhá ki Mardakí na jhuktá, na merí ta‘zím kartá hai, to Hámán g̣usse se bhar gayá.

6Lekin faqat Mardakí hí par háth chaláná apní shán se níche samjhá; kyúṉki unhoṉ ne use Mardakí kí qaum batá dí thí; is liye Hámán ne cháhá ki Mardakí kí qaum, ya‘ní sab Yahúdíoṉ ko jo Aḳhasúerus kí púrí mamlukat meṉ rahte the halák kare.

7Aur Aḳhasúerus bádsháh kí saltanat ke bárahweṉ baras ke pahle mahíne meṉ jo Nísán mahína hai wuh roz ba roz aur máh ba máh bárahweṉ mahína ya‘ní Adár ke mahíne tak Hámán ke sámne púr ya‘ní qur‘a ḍálte rahe.

8Aur Hámán ne Aḳhasúerus bádsháh se ‘arz kí, ki Huzúr kí mamlukat ke sab súboṉ meṉ ek qaum sab qaumoṉ ke darmiyán paráganda aur phailí húí hai; us ke dastúr har qaum se nirále haiṉ, aur wuh bádsháh ke qawánín nahíṉ mánte haiṉ; so un ko rahne dená bádsháh ke liye fáidamand nahíṉ.

9Agar bádsháh ko manzúr ho, to un ko halák karne ká hukm likhá jáe; aur maiṉ tahsíldároṉ ke háth meṉ sháhí ḳhazánoṉ meṉ dáḳhil karne ke liye chándí ke das hazár toṛe dúṉgá.

10Aur bádsháh ne apne háth se angúṭhí utárkar Yahúdíoṉ ke dushman Ajájí Hammadátá ke beṭe Hámán ko dí.

11Aur bádsháh ne Hámán se kahá, ki Wuh chándí tujhe baḳhshí gayí, aur wuh log bhí, táki jo tujhe achchhá ma‘lúm ho un se kare.

12Tab bádsháh ke munshí pahle mahíne kí terahwíṉ táríḳh ko buláe gaye, aur jo kuchh Hámán ne bádsháh ke nawwáboṉ, aur har súbe ke hákimoṉ, aur har qaum ke sardároṉ ko hukm kiyá us ke mutábiq likhá gayá: súbe súbe ke hurúf aur qaum qaum kí zabán meṉ sháh i Aḳhasúerus ke nám se yih likhá gayá, aur us par bádsháh kí angúṭhí kí muhr kí gayí.

13Aur harkároṉ ke háth bádsháh ke sab súboṉ meṉ ḳhatt bheje gaye, ki bárahweṉ mahíne ya‘ní Adár mahíne kí terahwíṉ táríḳh ko sab Yahúdíoṉ ko, kyá jawán, kyá buḍḍhe, kyá bachche, kyá ‘aurateṉ ek hí din meṉ halák aur qatl kareṉ, aur nábúd kar deṉ, aur un ká mál lúṭ leṉ.

14Is tahrír kí ek ek naql sab qaumoṉ ke liye shá‘i kí gayí, ki is farmán ká i‘lán har súbe meṉ kiyá jáe, táki us din ke liye taiyár ho jáeṉ.

15Bádsháh ke hukm se harkáre fauran rawána húe, aur wuh hukm qasr i Sosan meṉ diyá gayá. Aur bádsháh aur Hámán mainoshí karne ko baiṭh gaye; par Sosan shahr pareshán thá.

← Chapter 2 Jump to: Chapter 4 →