Esther 8

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 7 Jump to: Chapter 9 →

1Usí din Aḳhasúerus bádsháh ne Yahúdíoṉ ke dushman Hámán ká ghar Ástar malika ko baḳhshá. Aur Mardakí bádsháh ke sámne áyá, kyúṉki Ástar ne batá diyá thá, ki us ká us se kyá rishta thá.

2Aur bádsháh ne apní angúṭhí jo us ne Hámán se le lí thí utárkar Mardakí ko dí. Aur Ástar ne Mardakí ko Hámán ke ghar par muḳhtár baná diyá.

3Aur Ástar ne phir bádsháh ke huzúr ‘arz kí, aur us ke qadamoṉ par girí aur áṉsú bahá bahákar us kí minnat kí, ki Hámán Ajájí kí badḳhwáhí aur sázish ko jo us ne Yahúdíoṉ ke barḳhiláf kí thí bátil kar de.

4Tab bádsháh ne Ástar kí taraf sunahlá ‘asá baṛháyá; so Ástar bádsháh ke huzúr uṭh khaṛí húí;

5aur kahne lagí, ki Agar bádsháh ko manzúr ho, aur maiṉ us kí nazar meṉ maqbúl húṉ, aur yih bát bádsháh ko munásib ma‘lúm ho, aur maiṉ us kí nigáh meṉ piyárí húṉ, to un farmánoṉ ko mansúḳh karne ko likhá jáe, jin ko Ajájí Hammadátá ke beṭe Hámán ne un sab Yahúdíoṉ ko halák karne ke liye jo bádsháh ke sab súboṉ meṉ baste haiṉ tajwíz kiyá thá:

6kyúṉki maiṉ us balá ko jo merí qaum par názil hogí, kyúṉkar dekh saktí húṉ? yá kaise maiṉ apne rishtadároṉ kí halákat dekh saktí húṉ?

7Tab Aḳhasúerus bádsháh ne Ástar malika, aur Mardakí Yahúdí se kahá, ki Dekho, maiṉ ne Hámán ká ghar Ástar ko baḳhshá hai, aur use unhoṉ ne súlí par ṭáṉg diyá hai, is liye ki us ne Yahúdíoṉ par háth chaláyá.

8Tum bhí bádsháh ke nám se Yahúdíoṉ ko jaisá cháhte ho likho, aur us par bádsháh kí angúṭhí se muhr karo: kyúṉki jo nawishta bádsháh ke nám se likhá játá hai, aur us par bádsháh kí angúṭhí se muhr kí játí hai, use koí mansúḳh nahíṉ kar saktá.

9So usí waqt tísre mahíne, ya‘ní Saiwán mahíne kí teíswíṉ táríḳh ko bádsháh ke munshí talab kiye gaye, aur jo kuchh Mardakí ne Hindostán se Kúsh tak ek sau sattáís súboṉ ke Yahúdíoṉ aur nawwáboṉ, aur hákimoṉ aur súboṉ ke amíroṉ ko hukm diyá, wuh sab har súbe ko usí ke hurúf, aur har qaum ko usí kí zabán, aur Yahúdíoṉ ko un ke hurúf aur un kí zabán ke mutábiq likhá gayá.

10Aur us ne Aḳhasúerus bádsháh ke nám se ḳhatt likhe, aur bádsháh kí angúṭhí se un par muhr kí, aur un ko sawár harkároṉ ke háth rawána kiyá jo ‘umda nasl ke tezraftár sháhí ghoṛoṉ par sawár the.

11In meṉ bádsháh ne Yahúdíoṉ ko, jo har shahr meṉ the, ijázat dí ki ikaṭṭhe hokar apní ján bacháne ke liye muqábale par aṛ jáeṉ, aur us qaum aur us súbe kí sárí fauj ko jo un par aur un ke chhoṭe bachchoṉ par hamlaáwar ho halák aur qatl kareṉ, aur nest o nábúd kar deṉ, aur un ká mál lúṭ leṉ,

12yih Aḳhasúerus bádsháh ke sab súboṉ meṉ bárahweṉ mahíne ya‘ní Adár mahíne kí terahwíṉ táríḳh ko ek hí din meṉ ho.

13Is tahrír kí ek ek naql sab qaumoṉ ke liye shá‘i kí gayí, ki is farmán ká i‘lán har súbe meṉ kiyá jáe, táki Yahúdí log us din apne dushmanoṉ se apná intiqám lene ko taiyár raheṉ.

14So wuh harkáre jo tezraftár sháhí ghoṛoṉ par sawár the rawána húe, aur bádsháh ke hukm kí wajh se tez nikle chale gaye. Aur wuh farmán qasr i Sosan meṉ diyá gayá.

15Aur Mardakí bádsháh ke huzúr se ásmání aur safed rang ká sháhána libás aur sone ká ek baṛá táj, aur katání aur arg̣awání ḳhil‘at pahine niklá. Aur Sosan shahr ne na‘ra márá aur ḳhushí manáí.

16Yahúdíoṉ ko raunaq, aur ḳhushí, aur shádmání, aur ‘izzat hásil húí.

17Aur har súbe aur har shahr meṉ, jaháṉ kahíṉ bádsháh ká hukm aur us ká farmán pahuṉchá, Yahúdíoṉ ko ḳhurramí aur shádmání, aur ‘íd aur ḳhushí ká din nasíb húá. Aur us mulk ke logoṉ meṉ se bahutere Yahúdí ho gaye; kyúṉki Yahúdíoṉ ká ḳhauf un par chhá gayá thá.

← Chapter 7 Jump to: Chapter 9 →