Hosea 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Sháhán i Yahúdáh ‘Uzziyáh, aur Yútám, aur Áḳhaz, aur Hizqiyáh, aur sháh i Isráíl Yarubi‘ám bin Yúás ke aiyám meṉ Ḳhudáwand ká kalám Húsí‘a bin Baírí par názil húá.

2Jab Ḳhudáwand ne shurú‘ meṉ Húsí‘a kí ma‘rifat kalám kiyá, to us ko farmáyá, ki Já, ek badkár bíwí aur badkárí kí aulád apne liye le; kyúṉki mulk ne Ḳhudáwand ko chhoṛkar baṛí badkárí kí hai.

3Pas us ne jákar Jumar bint Dibláim ko liyá; wuh hámila húí, aur beṭá paidá húá.

4Aur Ḳhudáwand ne use kahá, Us ká nám Yazra‘el rakh; kyúṉki maiṉ ‘anqaríb hí Yáhú ke gharáne se Yazra‘el ke ḳhún ká badla lúṉgá, aur Isráíl ke gharáne kí saltanat ko tamám karúṉgá,

5aur usí waqt Yazra‘el kí wádí meṉ Isráíl kí kamán toṛúṉgá.

6Aur wuh phir hámila húí, aur beṭí paidá húí. Aur Ḳhudáwand ne use farmáyá, ki Us ká nám Loruhámah rakh; kyúṉki maiṉ Isráíl ke gharáne par phir rahm na karúṉgá, ki un ko mu‘áf karúṉ.

7Lekin Yahúdáh ke gharáne par rahm karúṉgá, aur maiṉ Ḳhudáwand un ká Ḳhudá un ko riháí dúṉgá, aur un ko kamán, aur talwár, aur laṛáí, aur ghoṛoṉ, aur sawároṉ ke wasíle se nahíṉ chhuṛáúṉgá.

8Aur Loruhámah ká dúdh chhuṛáne ke ba‘d wuh phir hámila húí, aur beṭá paidá húá.

9Aur us ne farmáyá, ki Us ká nám Lo‘ammí rakh; kyúṉki tum mere log nahíṉ ho, aur maiṉ tumhárá nahíṉ húṉgá.

10Taubhí baní Isráíl daryá kí ret kí mánind beshumár o beqiyás hoṉge; aur jaháṉ un se yih kahá játá thá, ki Tum mere log nahíṉ ho, Zinda Ḳhudá ke farzand kahláeṉge.

11Aur baní Yahúdáh aur baní Isráíl báham faráham hoṉge, aur apne liye ek hí sardár muqarrar kareṉge, aur is mulk se ḳhurúj kareṉge; kyúṉki Yazra‘el ká din ‘azím hogá.

Jump to: Chapter 2 →