Hosea 7

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 6 Jump to: Chapter 8 →

1Jab maiṉ Isráíl ko shifá baḳhshne ko thá, to Ifráím kí badkirdárí aur Sámariya kí sharárat záhir húí, kyúṉki wuh dag̣á karte the: andar chor ghus áe haiṉ, aur báhar ḍákúoṉ ká g̣ol lúṭ rahá hai.

2Wuh yih nahíṉ sochte ki mujhe un kí sárí sharárat ma‘lúm hai; ab un ke a‘mál ne, jo mujh par ‘ayán haiṉ, un ko gher liyá hai.

3Wuh bádsháh ko apní sharárat aur umará ko darog̣goí se ḳhush karte haiṉ.

4Wuh sab ke sab badkár haiṉ; wuh us tanúr kí mánind haiṉ jis ko nánbáí garm kartá hai, aur áṭá gúṉdhne ke waqt se ḳhamír uṭhne tak ág bhaṛkáne se báz rahtá hai.

5Hamáre bádsháh ke jashn ke roz umará to garmí e mai se bímár húe, aur wuh ṭhaṭṭhebázoṉ ke sáth betakalluf húá.

6Ghát meṉ baiṭhe un ke dil tanúr kí mánind haiṉ: un ká qahr rát bhar sulagtá rahtá hai; wuh subh ke waqt ág kí mánind bhaṛaktá hai.

7Wuh sab ke sab tanúr kí mánind dekhte haiṉ, aur apne qázíoṉ ko khá játe haiṉ; un ke sab bádsháh máre gaye, un meṉ koí na rahá jo mujh se du‘á kare.

8Ifráím dúsre logoṉ se mil jul gayá; Ifráím ek chapátí hai jo ulṭáí na gayí.

9Ajnabí us kí tawánáí ko nigal gaye, aur us ko ḳhabar nahíṉ; aur bál safed hone lage, par wuh beḳhabar hai.

10Aur faḳhr i Isráíl us ke muṉh par gawáhí detá hai, taubhí wuh Ḳhudáwand apne Ḳhudá kí taraf rujú‘ nahíṉ láe, aur báwujúd is sab ke us ke tálib nahíṉ húe.

11Ifráím bewuqúf o bedánish fáḳhta hai; wuh Misr kí duháí dete, aur Asúr ko játe haiṉ.

12Jab wuh jáeṉge, to maiṉ un par apná jál phailá dúṉgá; un ko hawá ke parandoṉ kí mánind níche utárúṉgá, aur jaisá un kí jamá‘at sun chukí hai, un kí tádíb karúṉgá.

13Un par afsos! kyúṉki wuh mujh se áwára ho gaye; wuh barbád hoṉ! kyúṉki wuh mujh se bág̣í húe; agarchi maiṉ un ká fidya dená cháhtá húṉ, wuh mere ḳhiláf darog̣goí karte haiṉ.

14Aur wuh huzúr i qalab ke sáth mujh se faryád nahíṉ karte, balki apne bistaroṉ par paṛe chilláte haiṉ; wuh anáj aur mai ke liye to jama‘ ho játe haiṉ, par mujh se bág̣í rahte haiṉ.

15Agarchi maiṉ ne un kí tarbiyat kí, aur un ko qawí bázú kiyá, taubhí wuh mere haqq meṉ badandeshí karte haiṉ.

16Wuh rujú‘ hote haiṉ, par Haqq Ta‘álá kí taraf nahíṉ; wuh dag̣á denewálí kamán kí mánind haiṉ; un ke umará apní zabán kí gustáḳhí ke sabab se tah i teg̣ hoṉge; is se mulk i Misr meṉ un kí haṉsí hogí.

← Chapter 6 Jump to: Chapter 8 →