Hosea 9

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 8 Jump to: Chapter 10 →

1Ai Isráíl, dúsrí qaumoṉ kí tarah ḳhushí o shádmání na kar, kyúṉki tú ne apne Ḳhudá se bewafáí kí hai; tú ne har ek khalíhán meṉ ujrat talásh kí hai.

2Khalíhán aur mai ke hauz un kí parwarish ke liye káfí na hoṉge, aur nayí mai kifáyat na karegí.

3Wuh Ḳhudáwand ke mulk meṉ na baseṉge; balki Ifráím Misr ko wápas jáegá, aur wuh Asúr meṉ nápák chízeṉ kháeṉge.

4Wuh mai ko Ḳhudáwand ke liye na tapáeṉge, aur wuh us ke maqbúl na hoṉge: un kí qurbáníáṉ un ke liye nauhagaroṉ kí roṭí kí mánind hoṉgí; un ko khánewále nápák hoṉge: kyúṉki un kí roṭiyáṉ un hí kí bhúk ke liye hoṉgí; aur Ḳhudáwand ke ghar meṉ dáḳhil na hoṉgí.

5Majma‘ e muqaddas ke roz, aur Ḳhudáwand kí ‘íd ke roz kyá karoge?

6Kyúṉki wuh tabáhí ke ḳhauf se chale gaye, lekin Misr un ko sameṭegá; Mof un ko dafn karegá; un kí chándí ke achchhe ḳhazánoṉ par bichchhú búṭí qábiz hogí; un ke ḳhaimoṉ meṉ káṉṭe ugeṉge.

7Sazá ke din á gaye, jazá ká waqt á pahuṉchá; Isráíl ko ma‘lúm ho jáegá: ki us kí badkirdárí kí kasrat aur ‘adáwat kí ziyádatí ke bá‘is nabí bewuqúf hai; rúhání ádmí díwána hai.

8Ifráím mere Ḳhudá kí taraf se nigahbán hai: nabí apní tamám ráhoṉ meṉ chiṛímár ká jál hai, wuh apne Ḳhudá ke ghar meṉ ‘adáwat hai.

9Unhoṉ ne apne áp ko niháyat ḳharáb kiyá, jaisá Jibi‘ah ke aiyám meṉ húá thá; wuh un kí badkirdárí ko yád karegá aur un ke gunáhoṉ kí sazá degá

10Maiṉ ne Isráíl ko biyábání angúroṉ kí mánind páyá; tumháre bápdádá ko anjír ke pahle pakke phal kí mánind dekhá, jo daraḳht ke pahle mausim meṉ lagá ho; lekin wuh Ba‘l Fag̣úr ke pás gaye, aur apne áp ko us bá‘is i ruswáí ke liye maḳhsús kiyá, aur apne us mahbúb kí mánind makrúh húe.

11Ahl i Ifráím kí shaukat parande kí mánind uṛ jáegí; wiládat o hámila ká wujúd un meṉ na hogá, aur qarár i haml mauqúf ho jáegá.

12Agarchi wuh apne bachchoṉ ko páleṉ, taubhí maiṉ un ko chhín lúṉgá, táki koí ádmí báqí na rahe; kyúṉki jab maiṉ bhí un se dúr ho jáúṉ to un kí hálat qábil i afsos hogí!

13Ifráím ko maiṉ dekhtá húṉ ki wuh Súr kí tarah nafís jagah meṉ lagáyá gayá; lekin Ifráím apne bachchoṉ ko qátil ke sámne le jáegá.

14Ai Ḳhudáwand, un ko de; tú un ko kyá degá? Un ko asqát i haml aur ḳhushk pistán de.

15Un kí sárí sharárat Jiljál meṉ hai; háṉ, waháṉ maiṉ ne un se nafrat kí; un kí bada‘málí ke sabab se maiṉ un ko apne ghar se nikál dúṉgá; aur phir un se mahabbat na rakkhúṉgá; un ke sab umará bág̣í haiṉ.

16Baní Ifráím tabáh ho gaye; un kí jaṛ súkh gayí; un ke háṉ aulád na hogí; aur agar aulád ho bhí, to maiṉ un ke piyáre bachchoṉ ko halák karúṉgá.

17Merá Ḳhudá un ko radd kar degá, kyúṉki wuh us ke shinawá nahíṉ húe: aur wuh aqwám i ‘álam meṉ awára phireṉge.

← Chapter 8 Jump to: Chapter 10 →