Hosea 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to: Chapter 13 →

1Ifráím hawá, chartá hai, wuh púrabí hawá ke píchhe dauṛtá hai; wuh mutawátir jhúṭh par jhúṭh boltá, aur zulm kartá hai; wuh Asúríoṉ se ‘ahd o paimán karte, aur Misr ko tel bhejte haiṉ.

2Ḳhudáwand ká Yahúdáh ke sáth bhí jhagṛá hai, aur Ya‘qúb kí rawish ke mutábiq us ko sazá degá; aur us ke a‘mál ke muwáfiq us ko jazá degá.

3Us ne rihm meṉ apne bháí kí eṛí pakṛí, aur wuh apní tawánáí ke aiyám meṉ Ḳhudá se kushtí laṛá;

4háṉ, wuh firishte se kushtí laṛá aur g̣álib áyá; us ne rokar munáját kí; us ne use Baitel meṉ páyá, aur waháṉ wuh us se hamkalám húá;

5ya‘ní Ḳhudáwand Rabb u’l afwáj; Yahowáh us kí yádgár hai.

6Pas tú apne Ḳhudá kí taraf rujú‘ lá; nekí aur rástí par qáim, aur hamesha apne Ḳhudá ká ummedwár rah.

7Wuh saudágar hai, aur dag̣á kí tarázú us ke háth meṉ hai; wuh zulmdost hai.

8Ifráím to kahtá hai, Maiṉ daulatmand húṉ, aur maiṉ ne bahut sá mál hásil kiyá hai; merí sárí kamáí meṉ badkirdárí ká gunáh na páeṉge.

9Lekin maiṉ mulk i Misr se Ḳhudáwand terá Ḳhudá húṉ; maiṉ phir tujh ko ‘íd i muqaddas ke aiyám ke dastúr par ḳhaimoṉ meṉ basáúṉgá.

10Maiṉ ne to nabíoṉ se kalám kiyá, aur royá par royá dikháí; aur nabíoṉ ke wasíle se tashbíhát isti‘mál kíṉ.

11Yaqínan Jili‘ád meṉ badkirdárí hai; wuh bi’lkull batálat haiṉ; wuh Jiljál meṉ bail qurbán karte haiṉ; un kí qurbángáheṉ khet kí regháriyoṉ par ke túdoṉ kí mánind haiṉ.

12Aur Ya‘qúb Arám kí zamín ko bhág gayá; háṉ, Isráíl bíwí kí ḳhátir naukar baná; us ne bíwí kí ḳhátir chaupání kí.

13Ek nabí ke wasíle se Ḳhudáwand Isráíl ko Misr se nikál láyá, aur nabí hí ke wasíle se wuh mahfúz rahá.

14Ifráím ne baṛe saḳht g̣azabangez kám kiye; is liye us ká ḳhún usí kí gardan par hogá, aur us ká Ḳhudáwand us kí malámat usí ke sir par láegá.

← Chapter 11 Jump to: Chapter 13 →