Hebrews 5

Xhosa XHO96 (IBHAYIBHILE)

← Chapter 4 Jump to: Chapter 6 →

1Kaloku wonke umbingeleli omkhulu ukhethwa ebantwini, amiselwe ukuzakuza phakathi kwabantu noThixo. Unikela izipho namadini okungxengxezela izono.

2Uyakwazi ukubanyamezela abo bazizityhifili nabo baphazamayo, kuba kaloku naye ngokwakhe unobuthathaka.

3Ngenxa yaloo nto ke umelwe kukunikela amadini okungxengxezela izono zakhe kwakunye nezabantu.

4Akukho mntu uzithathelayo eli wonga; elowo ubizwa nguThixo njengoAron.

5Kunjalo ke nakuKrestu: naye akazange azithathele iwonga lokuba ngumbingeleli omkhulu. Walinikwa nguThixo, lo wathi kuye: “Wena unguNyana wam; namhlanje ndikuzele.”

6Kwenye indawo uthi: “Wena ungumbingeleli wodidi lukaMelkizedeki, oya kuhlala ehleli.”

7Esadla ubomi apha emhlabeni, wayedla ngokwenza imithandazo nezicelo, ekhala iinyembezi, ebhekisa kuThixo onamandla okumhlangula ekufeni. Wawuva uThixo umthandazo wakhe, ngenxa yokuzimisela kwakhe ukuthobela.

8Ngoku kanye anguNyana kaThixo, intlupheko yamnika amava okuthobela.

9Uthe ke akusulungeka wenziwa umthombo wosindiso olungapheliyo lwabo bamthobelayo,

10emiselwe nguThixo waba ngumbingeleli omkhulu wodidi lukaMelkizedeki.

11Zininzi iindawo ebesinokunichazela ngazo ngoMelkizedeki. Kodwa ke kusuke kwanzima nokunithela gqabagqaba oku, kuba kaloku nisuke naneentloko ezilukhuni.

12Benifanelwe kukuba nifundisa ngokwenu ngoku. Kodwa kusuke kwafuneka ibe nini abafundiswayo, niqaliswe emva kwizifundo zokuqala ezingeendaba zikaThixo. Kusuke kwafuneka nisezwe ubisi endaweni yokuba ninikwe ukutya okuqinileyo.

13Wonke umntu osezwa ubisi lusana; akakwazi okuhle nokubi.

14Ngabantu abadala abatya ukutya okuqinileyo; bona sebenamava, bayawazi umahluko phakathi kokuhle nokubi.

← Chapter 4 Jump to: Chapter 6 →