1 Peter 1

Xhosa 2024 (ITestamente Entsha)

Jump to: Chapter 2 →

1uPetros, umpostile kaYesu Kristu, ubhalela abasemzini abachithachitheke kuyo yonke iPonto, neGalati, neKapadoki, neAsiya, neBhithiniya;

2nabanyuliweyo ngokokwazi kwenxa engaphambili kukaThixo uYise, ebungcweleni boMoya, kuse ekululameleni nasekufefweni kwegazi likaYesu Kristu: uthi, Makwandiswe kuni ubabalo noxolo.

3Makabongwe uThixo, uYise weNkosi yethu uYesu Kristu, othe ngokobuninzi benceba yakhe, wasizala ngokutsha, ukuba sibe nethemba eliphilileyo ngokuvuka kukaYesu Kristu kwabafileyo;

4ukuba sibe nelifa elingenakonakala, elingenakudyobheka, elingenakubuna, eligcinelwe nina emazulwini;

5nina bathe ngamandla kaThixo ngokholo bagcinelwa usindiso olulungiselwe ukutyhilwa ngexesha lokugqibela.

6Enigcoba ngalo, nokuba nithe naba buhlungu umzuzwana ngoku, ukuba nimelwe kuko, phakathi kwezilingo ngezilingo;

7ukuze ukucikideka kokholo lwenu kufunyanwe kunqabile kakhulu, ngaphezu kwegolide le itshabalalayo, noko icikidwa ngomlilo; kuse kuyo indumiso nembeko nozuko ekutyhilekeni kukaYesu Kristu.

8Enithi ningambonanga, niyamthanda; enithi ke nikholwa kuye, noko ngoku ningamboniyo, nigcobe ngovuyo olungathethekiyo, oluzukisiweyo;

9nisamkela isiphelo sokholo lwenu, usindiso ke lwemiphefumlo yenu.

10Usindiso olo babuphengulula, baphengulula ngalo abaprofeti, ababeprofeta ngobabalo oluya kunifikela;

11bephengulula ukuba wayesalatha xesha lini na, linjani na, uMoya kaKristu, awayezingqinela kubo ngenxa engaphambili iintlungu ezamiselwa uKristu, nozuko oluya kuzilandela.

12Batyhilelwa ukuba ezo ndaba zazishunyayelwa ngabo bazivakalisayo kuni ngoku iindaba ezimnandi ngoMoya oyiNgcwele owavela ezulwini; izinto ezo ezizinqwenelayo izithunywa zezulu ukuqondela kuzo.

13Ngoko, bhinqani izinqe zengqondo yenu, ninobungcathu, niluthembe ngokugqibeleleyo ubabalo oluziswa kuni ekutyhilekeni kukaYesu Kristu;

14ngokwabantwana bolulamo, ningazimimeli ngokweenkanuko zangaphambili ekungazini kwenu;

15nithi ke, ngokokwalowo ungcwele wanibizayo, nibe ngcwele nani ngokwenu kuyo yonke ihambo.

16Ngenxa yokuba kubhaliwe kwathiwa, Yibani ngcwele; ngokuba ndingcwele mna.

17Nani nimnqula nithi uYihlo, lowo ugwebayo ngokokwenza komntu wonke, engakhethi buso, lihlaleni ixesha lokuphambukela kwenu apha ninoloyiko;

18nisazi nje ukuba anihlawulelwanga nikhululwe ngazinto zinakonakala, oozisilivere noozigolide, kuyo ihambo yenu engento, enayinikelwayo ngooyihlo.

19Kungegazi elinqabileyo likaKristu, njengelemvana engenasiphako, engenasiphako;

20owathi okunene wanyulwa ngenxa engaphambili, lingekasekwa ihlabathi, wabonakalaliswa kuni ekupheleni kwala maxesha;

21enithi ngaye nakholwa kuye uThixo, owamvusayo kwabafileyo, wamnika uzuko; ukuze ukholo lwakho nethemba lakho libe kuThixo.

22Niyenze nyulu nje imiphefumlo yenu ngokuyilulamela inyaniso ngoMoya, kuse ekuthandeni abazalwana okungenaluhanahaniso, thandanani ke ngokwasentliziyweni ehlambulukileyo;

23Nizelwe ngokutsha, kungengokwasembewini enokonakala, kungokwasembewini engenakonakala, ngelizwi likaThixo eliphilileyo, elihleliyo ngonaphakade.

24Kuba Yonke inyama injengengca, Nabo bonke ubuqaqawuli bomntu bunjengentyantyambo yengca. Ingca iyoma, ivuthuluke nentyantyambo yayo;

25Ke lona ilizwi leNkosi lihleli ngonaphakade. Elo ke leli lizwi lashunyayelwayo kuni ngeendaba ezilungileyo.

Jump to: Chapter 2 →