1 Samuel 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1細阿哥仔撒母耳在以利个教導之下事奉上主。該期間，盡少有對上主來个信息，無常常有異象。

2有一暗晡，目珠花花个以利在自家个房間睡目；

3撒母耳睡在上主个聖帳篷中，就係放上帝約櫃个所在。上帝个燈還𤏸等，

4上主喊撒母耳。撒母耳應講：「𠊎在這位！」

5佢就走到以利該位，講：「你喊𠊎係麼？𠊎在這位。」以利講：「𠊎無喊你，倒轉去睡！」撒母耳就倒轉去睡。

6上主又喊撒母耳。該時撒母耳還毋識上主，因為上主吂識向佢顯現。佢又䟘起來，到以利該位，講：「你喊𠊎係麼？𠊎在這位。」以利講：「吾孻仔啊，𠊎無喊你，倒轉去睡！」

8上主第三擺喊撒母耳。佢又再䟘起來，到以利該位，講：「你喊𠊎係麼？𠊎在這位。」以利正知該係上主喊這細阿哥仔。

9以利就對撒母耳講：「倒轉去睡；若係佢再喊你，你就講：『上主啊，請講！僕人在這位聽！』」撒母耳就轉去睡目。

10上主來，企在該位，像先前共樣喊：「撒母耳！撒母耳！」撒母耳應講：「請講！僕人在這位聽！」

11上主對佢講：「無幾久，𠊎愛在以色列人當中做一件事，使逐個聽到个人全部著驚、耳公咻咻滾。

12該日，𠊎愛從頭到尾實行𠊎向以利个家所講過个話。

13𠊎已經㧯佢講過，𠊎愛因為佢兩個孻仔咒詛𠊎，來永遠責罰佢一家。以利知佢等做壞事，總係無禁止佢等。

14所以，𠊎嚴嚴向以利个家宣告：佢等獻麼介祭抑係牲儀，永遠無辦法贖這恁重个罪。」

15撒母耳睡到天光，䟘起來開上主殿个門；佢毋敢向以利提起這異象。

16以利喊佢：「吾孻仔撒母耳！」撒母耳應講：「𠊎在這位！」

17以利問佢：「上主對你講麼介？毋好瞞騙𠊎。若係你無全部講出來，願上帝重重罰你！」

18所以，撒母耳就全部講出來，全無騙佢。以利講：「佢係上主；願佢照佢自家个旨意去行！」

19撒母耳緊來緊大；上主㧯佢共下，使佢所講个逐句話全部實現。

20全以色列人民，對但到別是巴，全部知撒母耳係上主所立忠心个先知。

21上主繼續在示羅 — 就係佢向撒母耳講話个地方顯現。撒母耳个話傳到以色列全地。

← Chapter 2 Jump to: Chapter 4 →