Amos 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1以色列人啊，你等愛聽上主攻擊你等全國人民所講个話。上主識對埃及將你等𢱋出來；

2佢講：「在全世界恁多國家中，𠊎只有選你等，你等還犯恁多个罪；所以𠊎一定愛責罰你等。」

3兩儕若毋相湊，樣會共下行呢？

4獅仔若無捉到獵物，樣會在樹林中吼吼滾？勇壯个獅仔無捉到東西，樣會在窿肚盡吼？

5若係捉鳥仔个機關無放食物，樣般捉得到鳥仔？若係無東西動到機關，它樣會跳起來？

6作戰个警報一響，城肚个人敢會毋驚？若毋係上主个旨意，災禍會臨到該城嗎？

7至高个上主愛有行動个時，一定先將計劃㧯佢个僕人 — 該兜先知講。

8獅仔吼吼滾个時，麼人毋驚？至高个上主講話个時，麼人敢毋傳預言呢？

9你去向該兜住在埃及㧯亞實突王宮肚个人宣佈：「你等愛在撒馬利亞个山頂集合，看城肚所發生混亂、欺壓个事。」

10上主恁樣講：「該兜人在佢等个城堡堆滿搶來㧯剝削个財物；佢等毋知麼介安到公當。

11所以，敵人會包圍佢等个城市，破壞佢等个防線，搶佢等个城堡。」

12上主恁樣講：「就像牧羊人只有對獅仔个嘴肚搶轉兩支羊腳抑係半隻耳公定定，在撒馬利亞過奢華生活个以色列人也只有少數有可能對災難中得到拯救。」

13至高个上主 — 萬軍个元帥上帝講：「愛聽！愛警告雅各个後代：

14𠊎責罰以色列所犯个罪時，𠊎愛拆掉伯特利城个祭壇；祭壇个四隻角會被人敲掉，跌在地上。

15𠊎愛拆掉佢等避暑个別莊㧯避寒个暖房；象牙裝璜个屋㧯盡靚个大屋全部會橫到貼貼。」上主恁樣宣佈了。

← Chapter 2 Jump to: Chapter 4 →