Amos 7

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 6 Jump to: Chapter 8 →

1至高个上主俾𠊎看到一個光景：佢造一群草蜢。該時，第一期納給王个農作物已經收割，第二期个新筍當抽芽。

2𠊎看到草蜢飛來，將地上个農作物全部食淨淨。所以𠊎講：「至高个上主啊，求你赦免你个子民！雅各个後代又微細又軟弱，樣般受得住呢？」

3上主个心就軟下來。上主講：「恁樣，你所看到个事毋會發生了！」

4至高个上主俾𠊎看到一個光景：佢愛用火來責罰佢个子民。火將地泥底下个水源全部燒燥以後，又開始燒地面上所有个東西。

5所以𠊎講：「至高个上主啊，請停下來！你个子民 — 雅各个後代又微細又軟弱，樣般受得住呢？」

6上主个心就軟下來。至高个上主講：「恁樣，你所看到个事毋會發生了！」

7主俾𠊎看到一個光景：𠊎看到主企在一扇起好个牆頭堘，手項拿等線鉈。

8上主問𠊎：「阿摩司，你看到麼介？」𠊎應講：「線鉈！」所以主講：「𠊎愛將線鉈吊起來，俾𠊎个子民以色列知佢等就像一扇會橫个牆。這擺𠊎絕對毋會赦免佢等了！

9以撒後代禮拜个所在一定會被人拆掉；以色列人个聖所全部會受到破壞。𠊎愛用戰爭使耶羅波安个王朝滅亡。」

10伯特利城个祭司亞瑪謝派人去向以色列王耶羅波安報告，講：「阿摩司在煽動你个人民，愛佢等悖逆你；佢个言論對國家傷害相當大。

11佢講：『耶羅波安會在戰場被人㓾死；以色列人一定會被人逐出本地，捉到外國去。』」

12亞瑪謝向阿摩司講：「先見啊，好走了！轉猶大去講預言，在該位賺口飯食！

13伯特利係宮廷个聖殿，係國家禮拜个中心，毋准你繼續在這位講預言。」

14阿摩司應亞瑪謝講：「𠊎原來毋係先知，𠊎也毋係先知个學生。𠊎係牧羊人，也係管理無花果樹㧯桑樹个農民。

15總係，在𠊎掌羊个時，上主親身呼召𠊎，對𠊎講：『愛去向𠊎个子民以色列講預言。』

16所以，亞瑪謝啊，你愛聽上主對𠊎講个話。你毋准𠊎向以色列人講預言，也毋准𠊎向以撒个後代講攻擊个話。

17所以上主恁樣講：『若𡜵娘會在城肚做娼妓；你个子女全部會在戰場死掉。你个田地會被人丈量分掉；你本人會死在外邦。以色列人一定會被人逐出本地，捉到外國去。』」

← Chapter 6 Jump to: Chapter 8 →