Amos 6

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 5 Jump to: Chapter 7 →

1住在錫安享受安樂个人，㧯在撒馬利亞山頂恅到安全个人啊，你等慘了！你這兜大以色列國內个名人，受人尊敬个人啊，你等慘了！

2你等到甲尼城去看，也到大哈馬市，然後到非利士人个迦特城去看哪！這兜國家當中，有㖠個無比猶大㧯以色列較強？它兜个土地，㖠個無比你等个較闊？

3你等恅到大難臨頭个日仔還盡遠；事實上，你等使殘暴个統治緊來緊近。

4你這兜人慘了！你等只有知橫在象牙个眠床頂，抑係坐在安樂椅，食等細牛㧯肥羊个肉；

5唱等新編个歌，像大衛恁樣用豎琴伴奏；

6一碗又一碗个好酒緊啉，還膏上等个香水。你等恁樣享福，總係無為約瑟後代个衰微來悲傷。

7所以，你等會最先被人逐出國外去；你等放蕩宴樂个生活就恁樣結束了。

8至高个上主 — 萬軍个元帥上帝指等自家發誓，講：「𠊎盡惱以色列人个驕傲；𠊎盡恨佢等住个像宮殿个屋。𠊎愛將佢等个京城㧯底背所有个交給敵人。」

9若係一間屋還賸十個人，這十個人到尾也會無命。

10死人个親族來拖身屍去燒个時，佢會對屋肚最尾間个人講：「有人㧯你共下麼？」該人會應講：「無了。」親族講：「毋好出聲，𠊎等做毋得講起上主个名。」

11看哪！上主一命令，大間、細間个屋仔全部會橫淨淨，成做垃圾堆。

12馬會在巖石頂走麼？人會在海肚駛牛耕種麼？總係，你等將公平變做毒藥，將正義變做苦藥。

13你等自誇打橫羅‧底巴。你等講：「𠊎等敢毋係靠自家个力量佔領加寧！」

14上主 — 萬軍个元帥上帝恁樣講：「以色列人啊，𠊎愛使外國个軍隊佔領你等个國家；北對哈馬隘口，南到亞拉巴海滣，佢等愛來踐踏你等。」

← Chapter 5 Jump to: Chapter 7 →