Amos 9

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 8 Jump to:

1𠊎看到主企在祭壇个堘頭；佢講：「𠊎愛敲聖殿个棟樑，使歸間屋落下來，打爛逐儕个頭那。𠊎愛用刀劍㓾死其他个人，無一儕閃得開，無一儕走得去。

2就算佢等挖地窿，鑽入陰間，𠊎也愛將佢等揪出來！就算佢等跋上天，𠊎也愛將佢等拉下來！

3就係佢等走到迦密山頂，𠊎也愛去搜山，將佢等尋出來！就算佢等囥在海底，𠊎也愛喊海蛇咬佢等！

4就算佢等已經被人捉走，𠊎也愛喊敵人㓾死佢等！𠊎愛用目珠䁯佢等，𠊎愛降災禍，無愛降福氣。」

5至高个上主 — 萬軍个元帥一摸到地，地就鎔掉；地上个人民全部傷心大噭，地像尼羅河个水浮起沈落。

6上主在天頂起宮殿，將穹蒼安在大地个頂高，佢吩咐大海个水，倒在地上。佢个名係上主。

7上主講：「以色列人哪，𠊎乜關心古實人，就像𠊎關心你等。𠊎乜𢱋非利士人出克里特，𢱋敘利亞人出吉珥，就像𠊎對埃及將你等𢱋出來。

8𠊎 — 至高个上主用目珠䁯這罪大惡極个以色列國。𠊎愛對地面上將它除掉，總係𠊎毋會將雅各个後代全部消滅。

9「𠊎愛命令，將以色列人放在列國當中篩，像放入篩仔，將敗類全部篩掉。

10在𠊎个子民當中，該兜講：『苦難毋會臨到𠊎等』个罪人，全部會死在刀劍之下。」

11上主講：「有一日，𠊎愛重建大衛該破碎个王國。𠊎愛修整它个城牆；𠊎愛將它重新起到㧯頭擺完全共樣；

12𠊎愛使以色列人有能力攻打所賸个以東人，收復屬𠊎名下所有个國。」這個話係做這兜事个上主講个。

13上主講：看啊，該日會到了，五榖豐登吂割揪，就到蒔田个時，葡萄滿棚吂踏揪，又到委種个時。大山流出好酒，流過該兜細山。

14𠊎愛𢱋𠊎个子民以色列人轉來本地；佢等愛重建破碎个城市，永久住在該位。佢等愛重新耕種葡萄園，啉自家所焗个酒；佢等愛重新經營果子園，食其中出產个水果。

15𠊎愛將𠊎个子民種在𠊎賜給佢等个土地；佢等絕對毋會再被人連根挷掉。上主 — 你等个上帝恁樣宣佈了。

← Chapter 8 Jump to: