Micah 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1慘了，該兜睡在眠床頂計謀作惡个人！因為佢等手頭揢有權，天一光，就去做壞事。

2佢等貪田地，就去侵佔；愛屋仔，就去霸佔。佢等欺壓人，搶劫人个家庭㧯財產。

3所以，上主恁樣講：「𠊎計劃愛將災難降在你等身上；你等無法度逃走，你等行路無恁威風了，因為你等災禍臨到了。

4該時人家會作詩嘲謔你等、編寫哀歌來唱：𠊎等完全破產了！上主拿走𠊎等个田地，交給將𠊎等捉走个人。」

5所以，上主个子民收轉土地个時，你等全部無份。

6該兜人對𠊎發譴喊講：「毋好向𠊎等說教！毋好講恁衰个事！上帝毋會使𠊎等恁無面子。

7敢講以色列人會受咒詛嗎？上主敢會恁無度量！佢斷真會做這種事嗎？佢个話對行為正直个人敢無好處？」

8上主應講：「你等像敵人共樣攻擊𠊎个子民。對戰場轉來个人，安然經過个時，你等卻將佢等个外衫剝走。

9你等將𠊎子民中个婦人家對姖等快樂个家庭逐走，又將𠊎个福氣對姖等个子女永遠搶走。

10䟘起來！遽遽走噢！這位已經毋係安居个所在！你等个污穢帶給這所在悲慘个大毀滅。

11「若有人到處去講肨風、騙人講：『𠊎預言你等會有啉毋掉个淡酒㧯釅酒』，佢就會成做這民眾所歡喜个先知！

12「雅各个後代、以色列還賸个人民啊，𠊎一定愛將你等集合起來，像掌羊个將羊群帶轉羊欄。你等个土地會再一擺人丁興旺，像牧場有盡多个羊群，盡鬧熱。」

13上帝愛為佢等開路，帶佢等撞開城門，通過城門出去外背。佢等个君王，就係上主，自家會在頭前帶領佢等。

← Chapter 1 Jump to: Chapter 3 →