Micah 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1𠊎講：以色列个領袖啊，你等愛聽！你等本來就應該主持正義，

2總係你等反轉惱善良，歡喜罪惡。你等將𠊎个子民生生剝皮，又對佢等个骨頭刮下肉來。

3你等食𠊎子民个肉，剝佢等个皮，打碎佢等个骨頭，像切肉落鑊恁樣剁糜糜。

4有一日，你等愛求喊上主，總係佢毋搭你等。該時佢會揞面毋聽你等个祈禱，因為你等做當多壞事。

5該兜先知迷惑𠊎个子民。有一口飯好食，佢等就講：「天下太平」；總係對該兜無給佢等飯食个，佢等就用戰爭來嚇人。上主對這種先知講：

6「先知啊，日頭落山了，你等个好日仔過掉了。你等烏暗个日仔到了，你等會無異象好看，無預言好講。」

7該兜行邪術个㧯卜卦个，會因為所預言个事無實現就失面子，因為所求个事無得到上帝个應答就當見笑。

8論到𠊎，上主个靈㧯能力充滿𠊎。佢賜給𠊎正義㧯勇氣，來指責以色列人个罪。

9以色列个領袖啊，聽𠊎講！你等惱正義，顛倒是非。

10你等將上帝个城耶路撒冷改建做流人血㧯罪惡个城。

11城肚个官員為到紅包辦事，祭司為到工錢講解法律，先知為到金錢卜卦。佢等還恅到上主係佢等个靠山。佢等講：「上主敢毋係㧯𠊎等共下？𠊎等毋會堵到災難。」

12所以，因為你等，錫安會像田地被人犁揙轉來；耶路撒冷會變做荒埔；起聖殿个山會變做樹林。

← Chapter 2 Jump to: Chapter 4 →