Micah 6

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 5 Jump to: Chapter 7 →

1愛聽上主个話。佢講：「彌迦啊，䟘起來！愛在大山㧯細山面前講𠊎个案情。」

2群山哪，大地堅固个基石啊！你等愛聽上主所講个案情！上主愛告佢个子民，愛告以色列。

3上主恁樣講：「𠊎个子民啊，𠊎有麼介對毋起你等个？𠊎敢恁得人惱？你等放勢講啊！

4𠊎對埃及將你等𢱋出來，拯救你等脫離做奴才个所在。𠊎派摩西、亞倫、美莉安去領導你等。

5𠊎个子民啊，愛回想該時摩押王巴勒个陰謀㧯比珥个孻仔巴蘭應佢个話；愛回想對什亭到吉甲當中所發生个事。你等就明白𠊎所做个全部係為到拯救你等。」

6有人問：「𠊎應該帶麼介禮物來見上主呢？𠊎應該樣般來敬拜天頂个上帝呢？𠊎帶最好个細牛牯做燒化祭來獻給佢，做得麼？

7上主敢會歡喜𠊎獻幾千隻羊牯，抑係幾萬條河壩恁多个橄欖油？佢敢會歡喜𠊎獻長子來代𠊎贖罪？」

8世間人啊，上主已經指示你麼介係良善。佢對你个要求係：行公義，好憐憫，存謙卑㧯你个上帝共下行。

9敬畏上主係最聰明个。上主向城肚个眾人呼喊：「在城肚个眾支族㧯議會，你等愛聽！

10壞人屋下个財物係用無誠實个手段得來个。佢等使用兩樣个秤仔㧯升斗；這係𠊎盡惱个。

11用兩樣秤仔、袋等詭詐秤砣个人，𠊎樣能算佢無罪呢？

12城肚个有錢人剝削窮人；底背个人民全部係落仔，緊講花撩。

13因為你等犯罪，𠊎已經開始打擊你等，使你等受重傷。

14你等食，總係食毋飽，肚笥還係空个。你等搶東西，總係保毋住；因為你等搶出來个，𠊎愛用戰爭來毀滅。

15你等委種，總係無收成；你等榨橄欖油，總係無機會用；你等焗酒，總係享受毋到。

16你等學暗利王㧯厥孻仔亞哈王个壞行為，繼續佢等个作風。所以𠊎愛使你等衰敗；別人愛藐視你等，侮辱你等。」

← Chapter 5 Jump to: Chapter 7 →