Micah 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to: Chapter 5 →

1到最尾个日仔，上主聖殿个山定著會建立在群山个頂高，高高在上，超過眾山。盡多民族全部會流向這山；

2萬國會聚集前來，講：來啊，𠊎等共下上去上主个山，共下來去雅各上帝个聖殿。佢會指教𠊎等應該行个道；𠊎等也愛行佢所指示个路。上主个教訓對錫安發出；佢个信息對耶路撒冷傳出來。

3佢會解決民族間个糾紛，為遠方強盛个國調解爭端。佢等會將刀劍打做犁頭，將矛槍打做鐮仔。國際間毋會有相㓾，佢等也毋使再學習戰爭。

4逐儕愛在自家个葡萄園中，在無花果樹下，享受太平；無人會害佢等著驚。上主 — 萬軍个元帥恁樣應許了。

5雖然列國全部敬拜、服事佢等自家个神明，總係𠊎等愛敬拜、服事上主 — 𠊎等个上帝，直到永永遠遠。

6上主講：「𠊎責罰𠊎个子民，總係到該日，𠊎愛將流亡在各國个子民聚集做一下。

7𠊎愛使所賸个子民成做復興个種子，軟弱失散个，成做強盛个國家。𠊎自家愛在錫安山統治佢等，從今直到永遠。」

8耶路撒冷啊，你像守望台㧯城堡保護上帝个羊群；你將來會復國；你愛重新成做京城。

9這下你做麼介大聲盡噭？做麼介像產婦陣痛到無葛無煞？你無君王係麼？你个參謀全部死淨淨係麼？

10錫安个人民啊，你等愛像產婦陣痛，非常痛苦；因為你等就愛離開這城，去住在荒地。你等一定會被人捉到巴比倫去；總係在該位，上主會拯救你等，對敵人手中將你等救贖出來。

11這下盡多國家聯合起來攻擊你。佢等講：「𠊎等來打垃圾耶路撒冷！𠊎等愛看等錫安毀滅！」

12總係佢等毋知上主个計劃，毋知上主將佢等聚集共下係愛責罰佢等，像農民將禾把收到打榖場去打共樣。

13上主講：「錫安个人民啊，䟘起來！像牛踏榖恁樣去刑罰你等个敵人！𠊎愛使你等強壯到像生鐵角銅蹄个牛牯。你等愛消滅盡多國家，將佢等用暴力搶來个財物獻給𠊎 — 天下个主宰。」

← Chapter 3 Jump to: Chapter 5 →