Proverbs 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1大衛个孻仔，以色列王所羅門个箴言：

2這兜箴言會俾人認識智慧，得到教訓，理解格言个意思。

3它兜會教人樣般過明智个生活，樣般做公義、公平㧯正直个人。

4它兜會俾戇直个人變做精明，使後生人有智識，曉得分別是非。

5有智慧个聽到，就更加有學問，明理个人聽到，就得到引導，

6來了解箴言㧯比喻，來明白智慧人个話㧯鈴仔。

7敬畏上主係智識个開頭。戇檔人看輕智慧㧯教訓。

8孻仔啊，愛聽若爸个教訓，毋好離開若姆个教示；

9因為它兜像係你所戴盡靚个帽仔，像係你頸項寶貝个脖鍊。

10孻仔啊，若係有壞人來引誘你，千萬毋好跈佢等。

11若係佢等講：「共下來去，埋伏㓾過路人，無論佢係麼人，毋使理由，照打！

12𠊎等愛像陰間將佢等生生吞落去，完全食掉，就像人跌落深坑肚！

13𠊎等會得到各種个財寶，屋肚會裝滿搶來个東西！

14來鬥股噢，大家共下用一隻錢袋！」

15孻仔啊，毋好㧯佢等共下行，愛禁止你个腳行佢等个路；

16佢等个腳走等去行邪路，佢等遽遽想愛害人流血。

17鳥仔看等个時，來設羅網，這係無採工个；

18總係這兜壞人所設个羅網，係流自家个血，害自家个命。

19一切貪財个人所堵到个就係恁樣；貪財个心搶走个係佢等个命。

20智慧在街巷呼喊，在大眾場所緊喊，

21在鬧熱个街頭大聲嘶，在城門旁邊緊出聲講：

22「戇直个人啊，你等歡喜戇直愛到幾時？傲慢人歡喜傲慢，戇檔人惱智識愛到幾久？

23你等愛聽𠊎个勸話；𠊎愛將𠊎个心思對你等顯明，將𠊎个話教你等明白。

24𠊎喊你等，你等毋聽；𠊎擛你等，你等毋搭；

25反轉看輕𠊎一切个勸話，毋願意接受𠊎个責備。

26因為恁樣，你等堵到災難个時，𠊎就愛笑你等；你等驚到愊愊掣，𠊎也愛嘲謔你等。

27著驚像大風臨到你等，災難像狂風來到，急難痛苦降下个時，𠊎還係愛嘲謔你等。

28「該時，佢等會求喊𠊎，總係𠊎無愛應；佢等會尋𠊎，總係尋毋到。

29佢等惱智識，也毋識決心敬畏上主；

30佢等從來毋聽𠊎个勸話，反轉看輕𠊎一切个責備。

31所以，佢等愛食自家所結个果子，被自家所設个計謀撐到飽飽。

32戇直个人因為行歪路喪失生命；戇檔人因為隨便過日害死自家。

33總係聽從𠊎个，會安全過日；佢等會享受平安，毋驚災禍。」

Jump to: Chapter 2 →