Proverbs 8

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 7 Jump to: Chapter 9 →

1聽噢，智慧呼喊，聰明出聲緊喊。

2姖在山岡頂个路堘，又在十字路口企等；

3姖在城門口，在城門堘，大聲喊講：

4「眾人啊，𠊎向你等呼喊；𠊎向世間人出聲盡喊。

5你等戇直个人啊，愛學較精兜仔！你等戇檔个人啊，愛較上教兜仔！

6聽噢，因為𠊎愛講高貴个話；𠊎㧯你等講个係正直个事。

7𠊎嘴所講个攏總係真理；𠊎絕對無愛講邪惡个話。

8𠊎个話攏係真實無假，無彎曲，無乖僻。

9對聰明个人來講，一切清楚；對通達个人來講，全部正確。

10應當擇𠊎个教訓，無愛拿白銀；應當選智識，無愛拿黃金；

11因為智慧好過珠寶；你所想愛个無一項比抑得。

12「𠊎係智慧，𠊎有見識；𠊎有智識㧯正確个判斷力。

13敬畏上主就係怨恨邪惡；驕傲、拗蠻、惡霸㧯花撩，𠊎全部盡惱。

14𠊎有計劃㧯真智識；𠊎有聰明，𠊎有能力。

15𠊎幫助君王統治，協助掌權者定公當个法律。

16所有个統治者攏總倚靠𠊎；執政者㧯審判官通過𠊎掌權。

17惜𠊎个，𠊎也惜佢；迫切尋𠊎个，一定尋得到。

18好額㧯好名聲係𠊎賞賜；富貴㧯成功也在𠊎手中。

19𠊎所結出个果子贏過純金；𠊎个出產贏過最好个銀仔。

20𠊎在正直个路上行，在公義个路項前進。

21𠊎賜財富給惜𠊎个人；𠊎使佢等个倉庫滿滿。

22「上主在太初創造个時，佢在起頭創造萬物以前，已經有𠊎。

23在太初，大地吂成形以前，對盡古早，𠊎已經受設立。

24大海還吂出現，大水个泉源吂有以前，𠊎已經𫱔出來。

25大山還吂堅定，細山還吂有以前，𠊎已經𫱔出來。

26該時，上主還吂造大地㧯田園，連一揢泥都還吂有。

27佢設立天空，佢在海面定地平線个時，𠊎已經在該位。

28佢在天空佈置雲，在海底開發水源，

29佢為大海定出界限，使海水毋會超出範圍；佢為大地建立根基，該時，𠊎已經在該位。

30𠊎在佢个塍頭像一個工程師逐日給佢歡喜；𠊎一直在佢面前盡快樂，

31當歡喜佢个世界，盡歡喜世上个人。

32「孻仔啊，你等這下愛聽𠊎个話；遵守𠊎道个人，就會得到幸福。

33愛聽從𠊎个教訓成做有智慧，毋好忽略它。

34聽從𠊎个話，逐日在𠊎門口仰望，在𠊎屋下門邊等候个，這人實在有福氣噢！

35因為尋到𠊎个，就係尋到生命；佢也會得到上主个恩惠。

36無尋到𠊎个，就係自家害自家；怨恨𠊎个，攏總係想愛死个人。」

← Chapter 7 Jump to: Chapter 9 →