Proverbs 14

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 13 Jump to: Chapter 15 →

1智慧个婦女建立家庭；戇檔个婦人親手拆散。

2行為正直个人敬畏上主；行事詭詐个人就藐視佢。

3戇人因為驕傲多嘴受鞭打；智慧人个言語會保護自家。

4無牛好耕種，五榖欠收；有牛𢯭出力，五榖豐登。

5誠實个證人毋會講花撩；做假見證个專門講白賊。

6傲慢人尋智慧總係尋毋到；明理个人較容易得到智識。

7你愛遠離戇檔人，因為對佢个嘴得毋到智識。

8聰明人个智慧使佢知當行个路；戇檔人戇到自家騙自家。

9戇檔人將還罪債看做好笑；正直人曉得互相施恩。

10心肝肚个愁苦自家正知；心肝肚个喜樂別人無份。

11邪惡人个房屋一定橫掉；正直人个屋下定著興旺。

12有一條路看來盡直，總係最尾透到死亡。

13歡笑當中，心也會傷痛；歡樂過去，還係會憂愁。

14惡有惡報；善有善報。

15戇直人事事相信；精明人步步小心。

16智慧人行事小心，遠離禍端；戇檔人魯夫又硬頸。

17當遽發閼个人做事糊塗；心懷詭計个人盡得人惱。

18戇直个人自家承受戇檔个結果；通達个人得到智識做佢个冕旒。

19壞人在好人面前低頭；邪惡人降服在正直人門口。

20窮苦人連鄰舍都惱佢；好額人朋友緊來緊多。

21藐視鄰舍个有罪；憐憫窮苦个有福。

22想做壞事个，敢毋會陷入迷途？想愛行善个，得到仁慈㧯忠誠。

23煞猛工作，帶來財富，歸日空談，致到窮苦。

24智慧人个財富做佢等个冕旒；戇檔人个愚戇結局還係愚戇。

25誠實个見證救人生命；虛假个見證會傷害人。

26敬畏上主个就有倚靠；佢个子女也有避難所。

27敬畏上主係生命个泉源，會使人離開死亡个羅網。

28人民多係君王个光榮；人民少象徵王室衰敗。

29無隨便發譴，大有聰明；忒容易發閼，加添戇檔。

30心平氣和身體康健；嫉妒害人身心敗壞。

31欺負窮苦人係侮辱創造主；憐憫艱苦个人就係尊敬主。

32邪惡人在患難中定著會逕倒；正直人臨終个時還有好倚靠。

33智慧在聰明人个心中安居，在戇檔人心中無顯明出來。

34正義使國家強盛；罪惡使民族蒙羞。

35明理个僕人蒙君王褒獎；行事見笑个定著受責罰。

← Chapter 13 Jump to: Chapter 15 →