Acts 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Pó-lô kap Se-la keng-kè Àm-hui-pho-lí kap A-pho-lô-nî-a, lâi kàu Thiap-sat-lô-nî-ka, tī hia ū Iû-thài -lâng ê hōe-tn̂g.

2Pó-lô chiàu si̍p-koàn ji̍p-khì hōe-tn̂g, liân-sòa saⁿ ê An-hioh-ji̍t, ín-iōng Sèng-keng kap lâng piān-lūn.

3I káng-kái koh chèng-bêng Ki-tok it-tēng tio̍h siū-hāi, jiân-āu tùi sí-lâng tiong koh-oa̍h. I kóng, “Góa tùi lín soan-iông ê chit-ūi Iâ-so͘ chiū-sī Ki-tok.”

4In tiong-kan ū lâng siū sòe-ho̍k lâi sìn, chiū khì tè Pó-lô kap Se-la; kî-tiong ū chi̍t tōa-tīn kèng-ùi Siōng-tè ê Hi-la̍h -lâng, koh ū bōe chió kùi-hu-jîn.

5M̄-kú Iû-thài -lâng khí oàn-tò͘, chiū chio chi̍t-kóa koe-thâu ê húi-lūi, ká-kûn kiat-tóng, jiáu-loān choân-chhī, kong-kek Iâ-sun ê chhù, chhē Pó-lô kap Se-la, beh kā in lia̍h-khì kau hō͘ bîn-chiòng.

6In chhē bô, chiū chiong Iâ-sun kap chi̍t-kóa sìn-tô͘ thoa-khì kìⁿ tōe-hng-koaⁿ, hoah kóng, “Chiah-ê kā thian-hā péng-lìn-tńg ê lâng mā lâi kàu lán chia lo͘h!

7Iâ-sun kèng-jiân kā in siu-liû. In ûi-pōe Lô-má hông-tè Khái-sat ê hoat-lēng, kóng lēng-gōa ū chi̍t ê ông kiò-chòe Iâ-so͘.”

8Kûn-chiòng kap tōe-hng-koaⁿ thiaⁿ-tio̍h chiah-ê ōe tio̍h-kip put-an.

9Koaⁿ-oân tùi Iâ-sun kap kî-tha ê lâng siu chîⁿ kau-pó liáu-āu pàng in chhut--khì.

10Hit-àm, sìn-tô͘ thàu-mî sàng Pó-lô kap Se-la khì Pì-lí-a. In chi̍t-ē kàu-ūi chiū ji̍p-khì Iû-thài -lâng ê hōe-tn̂g.

11Chiah-ê Iû-thài -lâng pí Thiap-sat-lô-nî-ka ê Iû-thài -lâng khah khai-bêng, hui-siông jia̍t-sim niá-siū tō-lí, ta̍k-ji̍t chhâ-khó Sèng-keng, khòaⁿ Pó-lô só͘ kóng--ê ū khak-si̍t--bô.

12In tiong-kan ū chin chōe chun-kùi ê Hi-la̍h hū-jîn-lâng kap ta-po͘-lâng sìn.

13M̄-kú Thiap-sat-lô-nî-ka ê Iû-thài -lâng chi̍t-ē chai-iáⁿ Pó-lô mā tī Pì-lí-a teh thoân Siōng-tè ê tō, chiū khì hia siàn-tōng kûn-chiòng, ín-khí jiáu-loān.

14Sìn-tô͘ sûi-sî sàng Pó-lô khì hái-piⁿ; Se-la kap Thê-mô͘-thài lâu tī hia.

15In chi̍t-lō͘ hō͘-sàng Pó-lô kàu Ngá-tián. Pó-lô hoan-hù in kiò Se-la kap Thê-mô͘-thài chīn-liōng kóaⁿ-kín khì kap i hōe-ha̍p, jiân-āu in chiū lī-khui.

16Pó-lô tī Ngá-tián teh thèng-hāu Se-la kap Thê-mô͘-thài ê tiong-kan, khòaⁿ-tio̍h móa-siâⁿ lóng sī ngó͘-siōng, sim chin kan-khó͘.

17I tī hōe-tn̂g kap Iû-thài -lâng í-ki̍p kèng-ùi Siōng-tè ê Gōa-pang-lâng tâm-lūn, mā ta̍k-ji̍t tī chhī-tiong-sim kap só͘ tú--tio̍h ê lâng tâm-lūn.

18Ū chi̍t-kóa I-phek-khiu-ló͘ kap Su-to-a ha̍k-phài ê tiat-ha̍k-ka lâi kap i piān-lūn. Ū lâng kóng, “Chit-ê ài kóng-ōe--ê teh o͘-pe̍h kóng sím-mi̍h?” Ū lâng kóng, “I chhin-chhiūⁿ teh thoân gōa-kok ê kúi-sîn.” In án-ni kóng sī in-ūi Pó-lô thoân Iâ-so͘ kap I koh-oa̍h ê hok-im.

19In chiū kā Pó-lô thoa kàu A-lio̍k Pa-kó͘ gī-tiûⁿ, tùi i kóng, “Lí teh káng-lūn ê sin ha̍k-soat ōe-tàng hō͘ goán chai bōe?

20Ū chi̍t-kóa tāi-chì goán thiaⁿ-liáu koài-koài, goán ài chai sī sím-mi̍h ì-sù.”

21Goân-lâi só͘-ū Ngá-tián -lâng kap tòa tī hia ê gōa-kok-lâng ēng chin chōe sî-kan tâm-lūn kap thiaⁿ sin-kî ê sū.

22Pó-lô khiā tī A-lio̍k Pa-kó͘ gī-tiûⁿ ê tiong-ng, kóng, “Kok-ūi Ngá-tián -lâng, góa khòaⁿ-chhut lín tī ta̍k hong-bīn ū kiông-lia̍t ê chong-kàu jia̍t-sêng.

23Góa tī siâⁿ-lāi teh kiâⁿ, koan-chhat lín kèng-pài ê só͘-chāi, mā ū khòaⁿ-tio̍h chi̍t chō tôaⁿ, téng-bīn siá: ‘Hiàn hō͘ m̄-bat ê sîn’. Lín só͘ teh kèng-pài m̄-bat ê sîn, hiān-chāi góa pò lín chai.

24Chit-ūi chhòng-chō ú-tiū kap kî-tiong bān-mi̍h ê Siōng-tè sī thiⁿ-tōe ê Chú, bô tòa tī lâng ê chhiú khí ê biō-sī,

25mā bô khiàm-ēng lâng ê chhiú só͘ hiàn ê mi̍h, kî-si̍t I lóng bô su-iàu, I ka-kī tian-tò chiong sìⁿ-miā, kap khùi, í-ki̍p bān-mi̍h sù hō͘ jîn-lūi.

26I tùi chi̍t ê lâng chō-chhut ta̍k chióng-cho̍k ê lâng, hō͘ in khiā-khí tī tōe-bīn-chiūⁿ ta̍k só͘-chāi, koh tāi-seng kā in tēng nî-hān kap khiā-khí ê tōe-kài.

27Siōng-tè án-ni chòe sī beh hō͘ in chhē I, in nā chhiau-chhē chiū ōe chhē--tio̍h, kî-si̍t I kap lán ta̍k-ê lâng saⁿ-lī bô hn̄g.

28In-ūi ‘lán khò I seng-oa̍h, hêng-tōng, chûn-chāi’; chhin-chhiūⁿ lín ê si-jîn ū-ê án-ni kóng, ‘In-ūi lán mā-sī I ê kiáⁿ-sun.’

29Kì-jiân lán sī Siōng-tè ê kiáⁿ-sun, bô eng-kai chiong I ê sîn-sèng khòaⁿ-chòe kap ngó͘-siōng kâng-khoán, sī khò lâng ê chhiú-gē, ēng kim, gûn, á-sī chio̍h-thâu tiau-khek--chhut-lâi--ê.

30Jîn-lūi iáu oa̍h tī bû-ti ê sî-tāi, Siōng-tè bô tui-kiù, m̄-kú hiān-chāi I bēng-lēng choân jîn-lūi tio̍h hóe-kái.

31In-ūi I í-keng koat-tēng ji̍t-chí, beh ēng I só͘ chí-tēng ê lâng chiàu kong-gī lâi sím-phòaⁿ choân sè-kài; I hō͘ chi̍t ê lâng tùi sí-lâng tiong koh-oa̍h, ēng chit-ê chòe pîn-kù, hō͘ choân jîn-lūi thang sìn.”

32In chi̍t-ē thiaⁿ-tio̍h sí-lâng koh-oa̍h ê sū, ū lâng kā i thí-chhiò, mā ū lâng kóng, “Koan-hē chit-ê sū goán ài koh thiaⁿ lí kóng.”

33Jiân-āu Pó-lô tùi in tiong-kan chhut--khì.

34Put-kò ū chi̍t-kóa lâng tè i khì, chiâⁿ-chòe sìn-tô͘, kî-tiong ū A-lio̍k Pa-kó͘ ê gī-oân Tō͘-nî-siu, koh ū chi̍t ê lú-sū kiò-chòe Tāi-má-lí, í-ki̍p chi̍t-kóa kap in chòe-hé ê lâng.

← Chapter 16 Jump to: Chapter 18 →