Acts 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Gō͘-sûn-choeh ê ji̍t kàu, bûn-tô͘ lóng chū-chi̍p tī chi̍t só͘-chāi.

2Hut-jiân ū siaⁿ tùi thiⁿ-téng lâi, chhin-chhiūⁿ thàu tōa-hong, chhiong-móa in teh chē ê kui-keng chhù.

3Koh ū chhin-chhiūⁿ hun-khui ê hé-chi̍h tùi in chhut-hiān, hioh tī ta̍k-ê lâng ê téng-bīn.

4In lóng siū Sèng Sîn chhiong-móa, chiàu Sèng Sîn hō͘ in ê châi-lêng khai-sí kóng pa̍t-chióng gú-giân.

5Hit-sî, ū chi̍t-kóa khiân-sêng ê Iû-thài -lâng tùi sè-kài ta̍k-kok lâi, tòa tī Iâ-lō͘-sat-léng.

6Thiaⁿ-tio̍h chit-ê siaⁿ hiáng, chèng-lâng chiū lóng chū-chi̍p óa--lâi. In-ūi ta̍k-ê lâng thiaⁿ-tio̍h bûn-tô͘ ēng in ê pún-tōe-ōe tùi in kóng-ōe, soah gāng--khì.

7In tio̍h-kiaⁿ koh kî-koài, kóng, “Lí khòaⁿ, chiah-ê teh kóng-ōe--ê kiám m̄-sī lóng Ka-lī-lī -lâng?

8Lán ná ōe thiaⁿ-tio̍h in lóng ēng lán ta̍k-ê lâng tòa ê só͘-chāi ê gú-giân teh kóng-ōe?

9Lán chiah-ê Phà-thê-a -lâng, Bí-tí-a -lâng, Í-lân -lâng, í-ki̍p tùi Bí-soh-put-ta̍t-bí-a, Iû-thài kap Ka-phà-to-ka, Pún-to͘ kap A-sè-a,

10Hut-lū-ka kap Pông-hui-lī-a, Ai-ki̍p kap óa-kūn Kó͘-lī-nāi ê Lī-pí-a tōe-khu lâi ê lâng, mā ū tùi Lô-má lâi ê chhut-gōa-lâng, lāi-bīn ū

11Iû-thài -lâng kap kái-chong ji̍p Iû-thài -kàu ê lâng, koh ū Khek-lí-te̍k -lâng kap A-la-pek -lâng, lán kèng-jiân thiaⁿ-tio̍h in lóng ēng lán chāi-tōe ê ōe kóng-khí Siōng-tè só͘ chòe úi-tāi ê tāi-chì.”

12Tāi-ke tio̍h-kiaⁿ koh gông-ngia̍h, mn̄g-lâi-mn̄g-khì, “Che sī sím-mi̍h tāi-chì?”

13Ū lâng thí-chhiò kóng, “Chiah-ê lâng sī lim sin-chiú teh chùi.”

14Chit-ê sî, Pí-tek kap cha̍p-it ê sù-tô͘ khiā--khí-lâi, tōa-siaⁿ tùi chèng-lâng kóng, “ Iû-thài -lâng kap só͘-ū tòa tī Iâ-lō͘-sat-léng ê lâng, lín tio̍h chai, chù-ì thiaⁿ góa ê ōe.

15Chiah-ê lâng m̄-sī chiàu lín só͘ siūⁿ teh chiú-chùi, chit-chūn chiah chá-khí-sî káu tiám.

16Kî-si̍t che chiū-sī sian-ti Iok-ní só͘ kóng--ê.

17Siōng-tè kóng: Tī chiong-boa̍t ê ji̍t-chí, Góa beh chiong góa ê Sîn piàⁿ lo̍h-khì hō͘ só͘-ū ê lâng. Lín ê kiáⁿ, cha-bó͘-kiáⁿ ōe kóng ū-giân; lín ê siàu-liân-lâng ōe khòaⁿ-kìⁿ īⁿ-siōng; lín ê lāu-lâng ōe choh-bāng.

18Koh tī hiah-ê ji̍t, góa mā beh chiong góa ê Sîn piàⁿ lo̍h-khì hō͘ góa ê po̍k-jîn kap lú-pī; in ōe kóng ū-giân.

19Góa beh tī thiⁿ-téng hián-chhut kî-sū, tī tōe-chiūⁿ kiâⁿ sîn-jiah, ū huih, hé, kap ian-bū.

20Tī Chú tōa koh êng-iāu ê Ji̍t lâi-lîm í-chêng, ji̍t-thâu ōe pìⁿ-chòe o͘-àm, ge̍h pìⁿ-chòe chhin-chhiūⁿ huih hiah-ni̍h âng.

21Hit-sî, só͘-ū kiû-kiò Chú ê miâ ê lâng lóng ōe tit-tio̍h kiù.

22“ Í-sek-lia̍t -lâng, lín tio̍h thiaⁿ chiah-ê ōe. Chiàu lín só͘ chai, Siōng-tè thong-kè Ná-sat-le̍k -lâng Iâ-so͘ tī lín tiong-kan kiâⁿ koân-lêng, kî-sū, kap sîn-jiah, lâi tùi lín chèng-bêng I sī Siōng-tè só͘ chí-phài--ê.

23Siōng-tè chiàu I ū-tēng ê chí-ì kap kè-ōe, chiong Iâ-so͘ kau hō͘ lín; lín ēng bô Lu̍t-hoat ê lâng ê chhiú chiong I tèng tī si̍p-jī-kè téng, kā I sat-hāi.

24Siōng-tè kā I kái-tû sí ê thòng-khó͘, hō͘ I koh-oa̍h, in-ūi sí bô hoat-tō͘ kā I khòng-chè.

25Tāi-pi̍t bat chí I kóng: Góa khòaⁿ-kìⁿ Chú put-sî tī góa ê bīn-chêng, I tī góa ê chiàⁿ-pêng, hō͘ góa bōe tōng-iâu;

26in-ūi án-ni, góa ê sim hoaⁿ-hí, góa ê chi̍h khoài-lo̍k; góa chit-ê ōe hiú-nōa ê jio̍k-thé ōe khò ǹg-bāng lâi oa̍h.

27In-ūi lí bōe kā góa pàng-sak tī Im-hú, mā bōe hō͘ lí ê Sèng-chiá hiú-nōa.

28Lí í-keng chí-sī góa oa̍h-miā ê tō-lō͘, hō͘ góa tī lí ê bīn-chêng chhiong-móa hoaⁿ-hí.

29“Kok-ūi hiaⁿ-tī, koan-hē sian-chó͘ Tāi-pi̍t ê sū, góa hó-táⁿ kā lín kóng. I í-keng sí, koh bâi-chòng lah, i ê bōng kin-á-ji̍t iáu tī lán chia.

30I sī sian-ti, chai Siōng-tè ū tùi i giâm-siok èng-ún, beh tùi i ê kiáⁿ-sun jīm-bēng chi̍t ê choh-ông lâi chē i ê pó-chō.

31Tāi-pi̍t seng khòaⁿ-chhut chit-ê tāi-chì, koan-hē Ki-tok ê koh-oa̍h ū kóng: I bô siū pàng-sak tī Im-hú; I ê jio̍k-thé mā bô hiú-nōa.

32Chit-ūi Iâ-so͘, Siōng-tè í-keng ū hō͘ I koh-oa̍h. Goán lóng sī chit-hāng sū ê kiàn-chèng-jîn.

33I í-keng siū ko-seng kàu Siōng-tè ê chiàⁿ-pêng, koh tùi Pē niá-siū só͘ èng-ún ê Sèng Sîn, I hiān-chāi chiong chit-ūi Sèng Sîn piàⁿ lo̍h-lâi hō͘ goán, chiū-sī lín hiān-chāi só͘ khòaⁿ--kìⁿ koh thiaⁿ--kìⁿ-ê.

34Tāi-pi̍t m̄-bat chiūⁿ-thiⁿ, m̄-kú i kóng: Chú tùi góa ê Chú kóng: Lí chē góa ê chiàⁿ-pêng,

35thèng-hāu góa hō͘ lí ê tùi-te̍k khut-ho̍k tī lí kha-ē.

36“Só͘-í, Í-sek-lia̍t choân-ke tio̍h khak-si̍t chai, lín kā I tèng si̍p-jī-kè chit-ūi Iâ-so͘, Siōng-tè í-keng jīm-bēng I chòe Chú, chòe Ki-tok lah!”

37Chèng-lâng thiaⁿ-tio̍h chiah-ê ōe, sim chhin-chhiūⁿ hō͘ chhì chha̍k--tio̍h, tùi Pí-tek kap kî-tha ê sù-tô͘ kóng, “Kok-ūi hiaⁿ-tī, goán eng-kai chòe sím-mi̍h?”

38Pí-tek tùi in kóng, “Tio̍h hóe-kái, ta̍k-ê lâng lóng tio̍h hōng Iâ-so͘ Ki-tok ê miâ siū sóe-lé, hō͘ lín ê chōe tit-tio̍h sià-bián, chiū ōe niá-siū Siōng-tè só͘ sù ê Sèng Sîn.

39In-ūi chit-ê èng-ún sī beh hō͘ lín kap lín ê kiáⁿ-sun, í-ki̍p it-chhè tī hn̄g ê só͘-chāi ê lâng, chiū-sī lán ê Chú Siōng-tè só͘ ho͘-tiàu lâi kui I ê lâng.”

40Pí-tek koh ēng chin chōe ōe chhut-la̍t chòe kiàn-chèng, khoàn-bián in, kóng, “Tio̍h kiù ka-kī thoat-lī chit-ê siâ-ok ê sè-tāi.”

41Tùi án-ni, niá-siū i ê sìn-sit ê lâng lóng siū sóe-lé; hit-ji̍t sìn-tô͘ tāi-iok ke-thiⁿ saⁿ-chheng lâng.

42In choân-sim niá-siū sù-tô͘ ê kà-sī, chham-ú thoân-khè seng-oa̍h, peh-piáⁿ, kî-tó.

43Sù-tô͘ kiâⁿ chin chōe kî-sū sîn-jiah, ín-khí chèng-lâng kèng-ùi ê sim.

44Só͘-ū ê sìn-tô͘ lóng chòe-hé seng-oa̍h, só͘-ū ê mi̍h kong-ke ēng,

45koh bōe ka-sán châi-bu̍t, chiàu ta̍k-ê lâng ê su-iàu pun hō͘ tāi-ke.

46In ta̍k-ji̍t tâng-sim-ha̍p-ì tī Sèng-tiān chū-hōe, koh tī chi̍t-ke chi̍t-ke peh-piáⁿ, ēng hoaⁿ-hí sêng-sim chòe-hé lim-chia̍h,

47siōng-chàn Siōng-tè, koh tit-tio̍h chèng-lâng hoaⁿ-hí chiap-la̍p. Chú chiong tit-kiù ê lâng ji̍t-ji̍t ke-thiⁿ hō͘ in.

← Chapter 1 Jump to: Chapter 3 →