Acts 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Pí-tek kap Iok-hān tùi kûn-chiòng teh kóng-ōe ê sî, ū chè-si, Sèng-tiān ê siú-ōe-koaⁿ, kap Sat-to͘-kai-phài ê lâng lâi.

2In hui-siông siū-khì, in-ūi chit nn̄g ê sù-tô͘ teh kà-sī chèng-lâng, kun-kù Iâ-so͘ ê koh-oa̍h soan-káng sí-lâng koh-oa̍h ê sū.

3In chiū lia̍h chit nn̄g ê sù-tô͘, kā in khu-liû kàu keh-ji̍t, in-ūi thiⁿ í-keng àm.

4Thiaⁿ-tio̍h sìn-sit--ê ū chin chōe lâng sìn, ta-po͘-lâng ê jîn-sò͘ chha-put-to ū gō͘-chheng.

5Keh-ji̍t, Iû-thài -lâng ê léng-siù, tiúⁿ-ló, kap keng-ha̍k-kàu-su chū-chi̍p tī Iâ-lō͘-sat-léng.

6Tōa-chè-si A-ná kap Kai-a-hoat, Iok-hān, A-le̍k-san-tāi, kap tōa-chè-si ê ka-cho̍k mā lóng tī hia.

7In kiò sù-tô͘ lâi khiā tī in tiong-kan, mn̄g kóng, “Lín khò sím-mi̍h koân-lêng, hōng sím-mi̍h miâ, chòe chit-hāng tāi-chì?”

8Hit-sî Pí-tek siū Sèng Sîn chhiong-móa, ìn kóng, “Kok-ūi bîn-kan ê léng-siù kap tiúⁿ-ló,

9goán kin-á-ji̍t nā-sī ūi-tio̍h hō͘ chit-ê kha-pái ê lâng tit-tio̍h i-hó chit-hāng hó-sū siū chhâ-mn̄g,

10lín tāi-ke kap só͘-ū Í-sek-lia̍t -lâng lóng tio̍h chai, chit-ê lâng oân-choân ióng-kiāⁿ khiā tī lín bīn-chêng, sī khò Ná-sat-le̍k -lâng Iâ-so͘ Ki-tok ê miâ. Chit-ūi Iâ-so͘, lín kā I tèng si̍p-jī-kè, m̄-kú Siōng-tè hō͘ I tùi sí-lâng tiong koh-oa̍h.

11I chiū-sī Sèng-keng só͘ kóng: Lín chiah-ê khí-chhù sai-hū só͘ khì-sak ê chio̍h, í-keng chiâⁿ-chòe siōng tiōng-iàu ê ki-chio̍h.

12Iâ-so͘ í-gōa lóng bô chín-kiù, in-ūi tī thiⁿ-ē jîn-kan, Siōng-tè bô sù pa̍t-ê miâ hō͘ lán thang óa-khò lâi tit-kiù.”

13Gī-hōe ê gī-oân khòaⁿ-tio̍h Pí-tek kap Iok-hān hiah-ni̍h ióng-kám, chai in sī bô tha̍k-chheh ê phó͘-thong-lâng, chiū chin tio̍h-kiaⁿ, koh jīn-tit in bat kap Iâ-so͘ chòe-hé,

14mā khòaⁿ-tio̍h hit-ê tit-tio̍h i-hó ê lâng khiā tī in sin-piⁿ, chiū bô ōe thang hoán-pok.

15Gī-oân chiū kiò in lī-khui gī-hōe, jiân-āu chham-siông

16kóng, “Lán tio̍h án-chóaⁿ lâi tùi-hù chiah-ê lâng? In só͘ kiâⁿ chit-ê kî-īⁿ ê sîn-jiah, tòa tī Iâ-lō͘-sat-léng ê lâng lóng chai, lán bô hoat-tō͘ hó͘-jīn.

17M̄-kú ūi-tio̍h beh pī-bián chit-ê tāi-chì tī bîn-kan ná thoân ná khoah, lán tio̍h kéng-kò in tùi sím-mi̍h-lâng to m̄-thang koh hōng Iâ-so͘ ê miâ káng-lūn.”

18Āu-lâi, in kiò hit nn̄g ê sù-tô͘ lâi, bēng-lēng in bōe-ēng-tit koh hōng Iâ-so͘ ê miâ káng-lūn á-sī kà-sī.

19M̄-kú Pí-tek kap Iok-hān ìn kóng, “Thiaⁿ-thàn lín chiah tio̍h á-sī thiaⁿ-thàn Siōng-tè chiah tio̍h, tī Siōng-tè bīn-chêng lín ka-kī phòaⁿ-toàn.

20Goán só͘ khòaⁿ--tio̍h só͘ thiaⁿ--tio̍h-ê, bōe-tàng bô kóng.”

21Hiah-ê gī-oân m̄ chai tio̍h án-chóaⁿ kā in chhú-hoa̍t, chiū giâm-giâm kā in kéng-kò, liáu-āu pàng in khì, in-ūi bîn-chiòng lóng teh ūi-tio̍h só͘ hoat-seng ê tāi-chì kui êng-kng hō͘ Siōng-tè.

22Tùi chit-ê sîn-jiah tit-tio̍h i-hó hit-ê lâng í-keng sì-cha̍p gōa hè.

23Pí-tek kap Iok-hān siū tháu-pàng, chiū tò-khì tâng-phōaⁿ hia, chiong chè-si-tiúⁿ kap tiúⁿ-ló kā in kóng ê ōe lóng tùi in pò-kò.

24In thiaⁿ-liáu chiū tâng-sim tōa-siaⁿ tùi Siōng-tè kî-tó kóng, “Chhòng-chō thiⁿ, tōe, hái, kap kî-tiong bān-mi̍h ê Chú-cháiⁿ,

25lí bat thong-kè Sèng Sîn ēng lí ê po̍k-jîn goán ê chó͘-sian Tāi-pi̍t ê chhùi kóng: Gōa-pang sī-án-chóaⁿ háng-hoah? Bān-bîn sī-án-chóaⁿ kè-bô͘ bô hāu-kó ê sū?

26Tōe-chiūⁿ ê kun-ông lóng pâi-tīn beh kau-chiàn; thóng-tī-chiá liân-ha̍p--khí-lâi, beh kong-kek Chú kap I soán-li̍p ê Ki-tok.

27Hi-lu̍t kap Pâng-siu Pí-lia̍p-to kó-jiân tī chit-ê siâⁿ-lāi kap Gōa-pang-lâng í-ki̍p Í-sek-lia̍t -lâng liân-ha̍p lâi kong-kek lí só͘ soán-li̍p sèng ê po̍k-jîn Iâ-so͘.

28In chū-chi̍p beh chòe lí ê koân-lêng kap lí ê chí-ì ū-tēng ōe hoat-seng it-chhè ê sū.

29Taⁿ Chú ah, in teh kā goán khióng-hat, kiû lí kàm-chhat, hō͘ lí ê po̍k-jîn koh-khah ū ióng-khì thang soan-káng lí ê sìn-sit.

30Kiû lí chhun-chhiú i-tī, koh thong-kè lí sèng ê po̍k-jîn Iâ-so͘ ê miâ hō͘ goán kiâⁿ sîn-jiah kî-sū.”

31Kî-tó soah, chū-hōe ê só͘-chāi iô-tāng; in lóng siū Sèng Sîn chhiong-móa, ióng-kám soan-káng Siōng-tè ê sìn-sit.

32Choân-thé sìn-tô͘ lóng tâng-sim-ha̍p-ì, bô chi̍t ê lâng kóng i ê châi-bu̍t sī ka-kī ê; só͘-ū ê mi̍h-kiāⁿ kong-ke ēng.

33Sù-tô͘ ēng tōa lêng-le̍k kiàn-chèng Chú Iâ-so͘ ê koh-oa̍h, chèng-lâng lóng tit-tio̍h tōa un-tián.

34In tiong-kan bô lâng ū khiàm-kheh, in-ūi ū chhân-hn̂g chhù-the̍h ê lâng lóng bōe--chhut-khì,

35só͘ tit--tio̍h ê chîⁿ the̍h-lâi kau hō͘ sù-tô͘, chiàu ta̍k-ê lâng ê su-iàu hun-phòe.

36Ū chi̍t ê chhut-sì tī Sài-phó͘-lō͘-su ê Lī-bī -lâng Iok-sek, sù-tô͘ kā i kiò-chòe Pa-ná-pa, ì-sù chiū-sī An-ùi-chiá.

37I bōe ka-kī ê chhân-hn̂g, chîⁿ the̍h-lâi kau hō͘ sù-tô͘.

← Chapter 3 Jump to: Chapter 5 →