Acts 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Ū chi̍t ji̍t, ē-po͘-sî saⁿ tiám kî-tó ê sî-kan, Pí-tek kap Iok-hān chiūⁿ Sèng-tiān.

2Ū chi̍t ê chhut-sì kha chiū pái ê lâng, ta̍k-ji̍t hō͘ lâng kng-lâi hē tī Sèng-tiān hit-ê kiò-chòe “ Súi-mn̂g ” ê mn̂g-kháu, thang tùi ji̍p Sèng-tiān ê lâng kiû-khit.

3I chi̍t-ē khòaⁿ-tio̍h Pí-tek kap Iok-hān teh-beh ji̍p-khì Sèng-tiān, chiū kiû in siá-sì.

4Pí-tek kap Iok-hān chù-ba̍k kā i khòaⁿ, Pí-tek tùi i kóng, “Khòaⁿ goán!”

5I chiū chù-sîn khòaⁿ in, khòaⁿ ōe-tàng tùi in tit-tio̍h sím-mi̍h.

6Pí-tek tùi i kóng, “Kim gûn góa lóng bô, góa chiong góa só͘ ū--ê hō͘ lí. Góa hōng Ná-sat-le̍k -lâng Iâ-so͘ Ki-tok ê miâ bēng-lēng lí, khí-lâi kiâⁿ!”

7Jiân-āu Pí-tek khan i ê chiàⁿ-chhiú, kā i hû--khí-lâi. I ê kha kap kha-ba̍k sûi-sî ū la̍t,

8chiū thiàu khí-lâi khiā--teh, koh kiâⁿ, kap in chòe-hé chìn-ji̍p Sèng-tiān, ná kiâⁿ ná thiàu, ná o-ló Siōng-tè.

9Chèng-lâng khòaⁿ-tio̍h i ná kiâⁿ ná siōng-chàn Siōng-tè,

10koh jīn-tit i sī pêng-siông chē tī “ Súi-mn̂g ” ê mn̂g-kháu teh kiû-khit hit-ê lâng, chiū tùi tī i sin-chiūⁿ só͘ hoat-seng ê tāi-chì kám-kak chin kî-koài tio̍h-kiaⁿ.

11Tī Só͘-lô-bûn Cháu-lông, hit-ê tit-tio̍h i-hó ê lâng kā Pí-tek kap Iok-hān khiú-tiâu-tiâu, chèng-lâng tōa kî-koài, lóng cháu óa--lâi.

12Pí-tek khòaⁿ-tio̍h hiah-ê lâng, chiū kā in kóng, “ Í-sek-lia̍t -lâng, lín sī-án-chóaⁿ tùi chit-hāng tāi-chì kám-kak kî-koài? Sī-án-chóaⁿ chù-ba̍k khòaⁿ goán, siūⁿ-kóng goán sī khò ka-kī ê lêng-le̍k á-sī khiân-sêng hō͘ chit-ê lâng khí-lâi kiâⁿ?

13A-pek-la-hán, Í-sat, Ngá-kok ê Siōng-tè, chiū-sī lán chó͘-sian ê Siōng-tè, í-keng hō͘ I ê po̍k-jîn Iâ-so͘ tit-tio̍h êng-kng. Chit-ūi Iâ-so͘ lín kā I kau hō͘ koaⁿ-hú; Pí-lia̍p-to koat-tēng beh pàng I ê sî, lín tong-tiûⁿ kū-choa̍t.

14Lín kū-choa̍t hit-ūi Sèng koh Kong-gī--ê, iau-kiû Pí-lia̍p-to pàng chi̍t ê sat-jîn-hoān hō͘ lín.

15Lín thâi-sí oa̍h-miā ê Goân-thâu, chiū-sī Siōng-tè hō͘ I tùi sí-lâng tiong koh-oa̍h Hit-ūi. Goán sī chit-ê tāi-chì ê kiàn-chèng-jîn.

16Tùi sìn-khò chit-ê miâ, chiū-sī Iâ-so͘ ê miâ, lín só͘ khòaⁿ--kìⁿ só͘ bat chit-ê kha-pái ê lâng, ū tit-tio̍h khùi-la̍t. Tùi Iâ-so͘ só͘ sù ê sìn-sim, chit-ê lâng oân-choân hó--khí-lâi. Chit-hāng tāi-chì lín tāi-ke lóng ū khòaⁿ--tio̍h.

17“Hiaⁿ-tī, taⁿ góa chai, lín kap lín ê léng-tō-chiá án-ni chòe sī in-ūi m̄ chai.

18Siōng-tè ū thong-kè chèng sian-ti ê chhùi ū-giân I ê Ki-tok tio̍h siū-khó͘, chit-ê tāi-chì kó-jiân èng-giām lah.

19Só͘-í, tio̍h hóe-kái kui-ǹg Siōng-tè, thang hō͘ lín ê chōe tit-tio̍h chhat-siau.

20Án-ni, Chú chiū ōe sù lín keng-sin ê ji̍t-chí, koh chhe-khián chá chiū kéng hó-sè ê Ki-tok Iâ-so͘ lâi.

21Chiàu Siōng-tè thong-kè kó͘-chá sèng sian-ti ê chhùi só͘ soan-pò͘--ê, I it-tēng tio̍h tiàm tī thiⁿ-téng ti̍t-kàu bān-mi̍h ho̍k-heng ê sî.

22Mô͘-se bat kóng, ‘Chú — lín ê Siōng-tè beh tùi lín tông-pau ê tiong-kan kā lín jīm-bēng chi̍t ūi chhin-chhiūⁿ góa chit-khoán ê sian-ti. I kā lín kóng ê ōe, lín lóng tio̍h thiaⁿ-thàn.

23M̄ thiaⁿ chit-ūi sian-ti ê ōe ê lâng, ōe tùi chú-bîn tiong lóng kā in tû-bia̍t.’

24Tùi Sat-bó-ní kàu í-āu só͘-ū thoân sìn-sit ê sian-ti lóng ū kóng-khí chiah-ê ji̍t-chí.

25Lín sī sian-ti ê kiáⁿ-sun, mā-sī Siōng-tè kap lín ê chó͘-sian só͘ li̍p ê iok ê kè-sêng-jîn. I bat tùi A-pek-la-hán kóng, ‘Tōe-chiūⁿ bān-cho̍k lóng ōe in-ūi lí ê hō͘-tāi tit-tio̍h hok-khì.’

26Siōng-tè jīm-bēng I ê Po̍k-jîn, seng chhe I lâi lín chia, kā lín sù-hok, hō͘ lín ta̍k-ê lâng oa̍t tò-tńg lī-khui siâ-ok.”

← Chapter 2 Jump to: Chapter 4 →