Amos 1

Chinese TTVR (現代台語譯本羅馬字版)

Jump to: Chapter 2 →

1Ē-bīn sī Thê-ko-a chi̍t ê kò͘-iûⁿ-lâng A-mô͘-sū ê ōe. O͘-se-a chòe Iû-tāi -ông, Iok-hôa-si ê kiáⁿ Iâ-lô-pho-an Jī-sè chòe Í-sek-lia̍t -ông ê nî-kan, chiū-sī tōa tōe-tāng chêng nn̄g nî, Siōng-tè kā A-mô͘-sū khé-sī iú-koan Í-sek-lia̍t ê sū.

2A-mô͘-sū kóng: “Siōng Chú tùi Sek-an chhin-chhiūⁿ sai teh háu, tùi Iâ-lō͘-sat-léng chhin-chhiūⁿ lûi teh tân; kò͘-iûⁿ-lâng ê chháu-po͘ ta--khì, Ka-bi̍t ê soaⁿ-téng lóng ko͘-tâ.”

3Siōng Chú án-ni kóng, “ Tāi-má-sū-kek -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in ge̍k-thāi Ki-lia̍t -lâng, chhin-chhiūⁿ ēng thih-khí-pang géng ngó͘-kok.

4Só͘-í, góa beh pàng-hé sio Hap-sih ê ông-kiong, sio-húi Piān Hap-ta̍t ê kiong-tiān.

5Góa beh lòng-tn̄g Tāi-má-sū-kek -siâⁿ ê mn̂g-chhòaⁿ, beh siau-bia̍t A-bûn pêng-goân ê chū-bîn, í-ki̍p Pek I-tiân ê thóng-tī-chiá, chiong Sū-lī-a -lâng lia̍h-khì Kiat-ní.” Siōng Chú án-ni soan-kò.

6Siōng Chú án-ni kóng, “ Ka-sat -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in lia̍h só͘-ū ê chū-bîn, bōe hō͘ Í-tong -lâng chòe lô͘-châi.

7Só͘-í, góa beh pàng-hé sio Ka-sat ê siâⁿ-chhiûⁿ, sio-húi i ê kiong-tiān.

8Góa beh siau-bia̍t A-si̍t-tu̍t ê chū-bîn, í-ki̍p A-si̍t-ki-lûn ê thóng-tī-chiá; góa beh chhun-chhiú kong-kek Í-kek-lûn, ti̍t-kàu só͘ chhun ê Hui-lī-sū -lâng lóng bia̍t-bông.” Chì-koân ê Siōng Chú án-ni soan-kò.

9Siōng Chú án-ni kóng, “ Thài-ní -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in lia̍h kui-cho̍k ê chū-bîn, bōe hō͘ Í-tong -lâng chòe lô͘-châi, bô chun-siú kap iú-pang só͘ tēng ê bêng-iok.

10Só͘-í, góa beh pàng-hé sio Thài-ní ê siâⁿ-chhiûⁿ, sio-húi i ê kiong-tiān.”

11Siōng Chú án-ni kóng, “ Í-tong -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in ēng to-kiàm tui-sat ka-kī ê hiaⁿ-tī, chi̍t-tiám-á to bô lîn-bín ê sim, in hoat sèng-tē bô-thêng, khí siū-khì bô-soah.

12Só͘-í, góa beh pàng-hé sio Thê-bān, sio-húi Pho-su-la ê kiong-tiān.”

13Siōng Chú án-ni kóng, “ A-bûn -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; ūi-tio̍h beh khok-tián in ê léng-thó͘, in phòa-khui Ki-lia̍t ū-sin ê hū-jîn-lâng.

14Só͘-í, tī chiàn-cheng háng-hoah ê ji̍t, tī kông-hong-tāi-chok ê sî, góa beh pàng-hé sio La-pa ê siâⁿ-chhiûⁿ, sio-húi i ê kiong-tiān;

15In ê ông ōe siū hòng-tio̍k, ông kap i ê koaⁿ-oân chòe-hé siū-lia̍h.” Siōng Chú án-ni soan-kò.

Jump to: Chapter 2 →