Amos 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Lín tòa tī Sek-an bô-khòa-bô-lū, tòa tī Sat-má-lī-a-soaⁿ bô-hoân-bô-ló ê lâng, lín chhám ah! Lín siūⁿ-kóng ka-kī sī Í-sek-lia̍t jîn-bîn só͘ óa-khò, sī bān-kok ū bêng-bōng ê léng-tō-chiá.

2Lín tio̍h kè-khì Kah-nî khòaⁿ, koh khì tōa-siâⁿ Hap-má, jiân-āu lo̍h-khì Hui-lī-sū ê Ka-te̍k, khòaⁿ lín nn̄g kok kiám ū pí in khah kiông? Lín ê léng-thó͘ kiám ū pí in ê khah khoah?

3Lín siūⁿ-kóng ū kā chai-hō ê ji̍t sak-hn̄g-hn̄g, tian-tò hō͘ kiông-pō ê thóng-tī óa--lâi.

4Lín tó tī chhiūⁿ-gê ê bîn-chhn̂g, phēng tī the-í, chia̍h iûⁿ-kûn tiong siōng-hó ê iûⁿ-á, gû-tiâu lāi pûi koh nńg ê gû-á,

5siau-iâu chhiùⁿ-koa, chhin-chhiūⁿ Tāi-pi̍t tôaⁿ-khîm choh-si.

6Lín lim-chiú chi̍t-óaⁿ sòa chi̍t-óaⁿ, boah siōng-hó ê phang-iû; m̄-kú bô ūi-tio̍h Í-sek-lia̍t teh-beh húi-bia̍t pi-siong.

7Só͘-í lín ōe tāi-seng siū-lia̍h, siau-iâu iàn-lo̍k ōe kiat-sok.

8Chì-koân Siōng Chú — Bān-kun ê Thóng-sòe Siōng-tè kí ka-kī li̍p-sè kóng: Góa iàm-ò͘ⁿ Í-sek-lia̍t ê kiau-ngō͘, thó-ià in ê kiong-tiān; góa beh chiong in ê siâⁿ kap siâⁿ-lāi ê it-chhè kau hō͘ tùi-te̍k.

9Chi̍t keng chhù nā iáu chhun cha̍p ê ta-po͘-lâng, in mā lóng ōe sí.

10Sí-lâng ê chhin-chiâⁿ lâi thoa sin-si khì sio ê sî, ōe tùi chhù-lāi ê lâng kóng, “Iáu ū lâng kap lí chòe-hé--bô?” I ōe ìn kóng, “Bô!” Koh kóng, “M̄-thang chhut-siaⁿ! M̄-thang thê-khí Siōng Chú ê miâ.”

11In-ūi Siōng Chú hoat-chhut bēng-lēng, I ōe kā tōa keng chhù kòng-chhùi, kā sòe keng chhù kòng kah chhùi-kô͘-kô͘.

12Bé kiám ōe-tàng tī giâm-chio̍h téng phun-pháu? Lâng kiám ōe hō͘ gû tī hái--ni̍h keng-choh? Lín kèng-jiân hō͘ kong-pêng chiâⁿ-chòe to̍k-chhài, hō͘ kong-gī ê ké-chí chiâⁿ-chòe khó͘-chháu.

13Lín chiah-ê cheng-ho̍k Lô Tí-pa ê lâng khoa-iāu kóng, “Goán kiám m̄-sī khò ka-kī ê khùi-la̍t kong-chiàm Ka-lêng?”

14Siōng Chú — Bān-kun ê Thóng-sòe Siōng-tè án-ni kóng, “ Í-sek-lia̍t ah, góa beh heng-khí chi̍t kok kong-kek lín; in ōe ap-chè lín, tùi Hap-má ài-kháu kàu A-la-pa ê soaⁿ-kok.”

← Chapter 5 Jump to: Chapter 7 →