Amos 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Siōng Chú án-ni kóng, “ Mô͘-ap -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in chiong Í-tong -ông ê kut-thâu sio kah pìⁿ hé-hu.

2Góa beh pàng-hé sio Mô͘-ap, sio-húi Ka-lio̍k ê kiong-tiān; Mô͘-ap ōe tī hōa-hōa-háu hoah-hiàm pûn sàu-kak ê tiong-kan sí-bông.

3Góa ōe chiong Mô͘-ap ê thóng-tī-chiá chhú-sí, thâi-sí ông kap i só͘-ū ê koaⁿ-oân.” Siōng Chú án-ni soan-kò.

4Siōng Chú án-ni kóng, “ Iû-tāi -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in kū-choa̍t Siōng Chú ê lu̍t-hoat, bô siú I ê kui-lē; in tè in ê chó͘-sian pài ké-sîn, siū ín-iú kiâⁿ bê-lō͘.

5Só͘-í góa beh pàng-hé sio Iû-tāi, sio-húi Iâ-lō͘-sat-léng ê kiong-tiān.”

6Siōng Chú án-ni kóng, “ Í-sek-lia̍t -lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in ūi-tio̍h gûn chhut-bōe gī-lâng, ūi-tio̍h chi̍t siang ôe bōe sàn-chhiah-lâng.

7In thún-ta̍h sàn-chhiah-lâng ê thâu-khak, chhin-chhiūⁿ teh ta̍h thô͘-hún; in pak-toa̍t khùn-khó͘-lâng ê koân-lī; lāu-pē kap kiáⁿ kong-ke chi̍t ê siàu-lú, tì-kàu siat-to̍k góa ê sèng-miâ.

8In tī ta̍k-ê chè-tôaⁿ piⁿ, ēng sàn-chhiah-lâng the̍h-lâi tí-ah ê gōa-saⁿ chòe chhn̂g-kun; tī in ê Siōng-tè ê tiān, lim pak-siah tit--tio̍h ê chîⁿ bóe ê chiú.

9Góa bat tī in bīn-chêng tû-bia̍t A-mô͘-lī -lâng; hiah-ê lâng koân-tōa chhin-chhiūⁿ pek-hiuⁿ-chhiū, ióng-chòng chhin-chhiūⁿ siōng-chhiū; chóng-sī góa húi-tiāu in téng-bīn ê ké-chí, chām-tn̄g in ē-bīn ê kun.

10Góa mā ū tòa lín tùi Ai-ki̍p -tōe chhut--lâi, sì-cha̍p nî kú chhōa lín keng-kè khòng-iá, hō͘ lín tit-tio̍h A-mô͘-lī -lâng ê tōe chòe sán-gia̍p.

11Góa tùi lín ê kiáⁿ-sun tiong-kan kéng-soán sian-ti, koh tùi lín ê siàu-liân-lâng tiong-kan soán-li̍p Ná-sè-ní-lâng. Í-sek-lia̍t -lâng ah, kiám m̄-sī án-ni?” Siōng Chú án-ni soan-kò.

12“M̄-kú lín hō͘ Ná-sè-ní-lâng lim-chiú, kìm-chí sian-ti thoân-ta̍t Siōng-tè ê ōe.

13Só͘-í, góa beh kā lín chhi̍h tī thô͘-kha, chhin-chhiūⁿ chài-móa be̍h-khún ê chhia kā lín teh kah bōe tín-tāng.

14Tô-miā--ê cháu bōe lī, ióng-chòng--ê sit-khì khùi-la̍t, ióng-sū mā bōe-tàng kiù ka-kī;

15siā-chìⁿ--ê khiā bōe chāi, kha kín--ê cháu bōe hù, khiâ-bé--ê mā bōe-tàng kiù ka-kī ê sìⁿ-miā.

16Tī hit-ji̍t, liân siōng ióng-kám ê chiàn-sū mā ōe pàng-sak bú-khì tô-cháu.” Siōng Chú án-ni soan-kò.

← Chapter 1 Jump to: Chapter 3 →