Amos 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Tòa tī Sat-má-lī-a-soaⁿ Pa-san ê gû-bú, tio̍h chù-ì thiaⁿ. Lín khi-hū sàn-chhiah-lâng, ap-chè kan-khó͘-lâng, tùi lín tiōng-hu kóng, “Chiú phâng--lâi, lán lâi lim.”

2Chì-koân ê Siōng Chú kí ka-kī ê sèng-miâ li̍p-sè, kóng, “Khòaⁿ leh, ji̍t-chí teh-beh kàu, lâng beh ēng kau-á kā lín kau--khì, ēng tiò-hî-kau kā só͘ chhun--ê thoa--khì.

3Lín ta̍k-ê lâng ōe hō͘ lâng thoa-khì siâⁿ-chhiûⁿ ê phòa-khiah, tùi hia tàn--chhut-khì.” Siōng Chú án-ni soan-kò.

4Chòe lín khì Pek-te̍k-lī hoān-chōe, chhut-chāi lín khì Kiat-kah ke-thiⁿ lín ê chōe; ta̍k chá-khí hiàn lín ê chè-mi̍h, múi saⁿ ji̍t hiàn lín só͘ tit--tio̍h ê cha̍p-hūn-chi̍t;

5koh hiàn ū-kàⁿ ê piáⁿ chòe siā-un-chè, tōa-siaⁿ tián lín kam-sim hiàn ê chè. Í-sek-lia̍t -lâng ah, che kiám m̄-sī lín kah-ì chòe--ê? Chì-koân ê Siōng Chú án-ni soan-kò.

6Góa hō͘ lín tī ta̍k-ê siâⁿ chhùi-khí bô mi̍h thang pō͘, tī lín khiā-khí ê só͘-chāi lóng bô mi̍h thang chia̍h; lín iáu-kú m̄ kui-ǹg góa. Siōng Chú án-ni soan-kò.

7Siu-koah chêng saⁿ ge̍h-ji̍t kú, góa bô lo̍h-hō͘ hō͘ lín; góa hō͘ chit-chng ū hō͘, hit-chng bô hō͘; góa hō͘ chit-khu hn̂g ū hō͘, hit-khu hn̂g bô hō͘ soah ta--khì.

8Án-ni, nn̄g saⁿ ê chng-siā ê lâng phiân-lâi-phiân-khì, phiân kàu lēng-gōa chi̍t ê chng-siā chhē chúi lim, mā bōe chí chhùi-ta; lín iáu-kú m̄ kui-ǹg góa. Siōng Chú án-ni soan-kò.

9Góa ēng hé-sio-hong, ēng pīⁿ-hāi kong-kek lín, phò-hoāi lín ê chhân-hn̂g kap phû-tô-hn̂g; bû-hoa-kó-chhiū kap kaⁿ-ná-chhiū mā hō͘ tōa-chiah chháu-meh chia̍h-liáu-liáu; lín iáu-kú m̄ kui-ǹg góa. Siōng Chú án-ni soan-kò.

10Góa kàng un-e̍k tī lín tiong-kan, chhin-chhiūⁿ chá-chêng kàng tī Ai-ki̍p; góa tī chiàn-tiûⁿ thâi-sí lín ê siàu-liân-lâng, koh lín ê chiàn-bé mā hō͘ lâng chhiúⁿ--khì; iâⁿ-lāi si-thé ê chhàu-bī chhèng kàu lín ê phīⁿ-khang; lín iáu-kú m̄ kui-ǹg góa. Siōng Chú án-ni soan-kò.

11Góa húi-bia̍t lín, chhin-chhiūⁿ í-chêng húi-bia̍t Só͘-to-má Gô-mô͘-la; lín chhin-chhiūⁿ tùi hé-tiong khiú--chhut-lâi ê chi̍t tè chhâ; lín iáu-kú m̄ kui-ǹg góa. Siōng Chú án-ni soan-kò.

12Í-sek-lia̍t ah, góa beh án-ni tùi-thāi lín. Í-sek-lia̍t ah, kì-jiân góa beh án-ni chòe, lín tio̍h chún-pī hó-sè lâi kìⁿ lín ê Siōng-tè.

13Khòaⁿ leh, chō-soaⁿ chō-hong, chiong I ê sim-ì chí-sī lâng, hō͘ o͘-àm pìⁿ-chòe kng-bêng, kha ta̍h tī tōe koân ê só͘-chāi Hit-ūi, I ê chheng-ho͘ sī Siōng Chú — Bān-kun ê Thóng-sòe Siōng-tè.

← Chapter 3 Jump to: Chapter 5 →