John 12 — Chinese TTVR (現代台語譯本羅馬字版)

1Pôaⁿ-kè-choeh ê la̍k ji̍t chêng, Iâ-so͘ khì Pek-tāi-nî, chiū-sī Iâ-so͘ hō͘ hit-ê tùi sí koh-oa̍h ê Lia̍p-sat-lō͘ tòa ê só͘-chāi.

2Ū lâng tī hia ūi-tio̍h Iâ-so͘ chún-pī àm-tǹg. Má-tāi teh chiau-thāi; Lia̍p-sat-lō͘ sī kap Iâ-so͘ kâng-toh ê chi̍t ê.

3Má-lī-a the̍h chi̍t koàn sûn ê ko-kùi ná-ta̍t phang-iû lâi boah Iâ-so͘ ê kha, koh ēng ka-kī ê thâu-mn̂g kā I chhit; iû ê phang-bī hō͘ kui chhù-lāi phang-kòng-kòng.

4Iâ-so͘ ê chi̍t ê bûn-tô͘, chiū-sī āu-lâi chhut-bōe Iâ-so͘ hit-ê Í-su-ka-lio̍k ê Iû-tāi, kóng,

5“Ná m̄ the̍h chit-ê phang-iû khì bōe saⁿ-pah ê gûn-á lâi chín-chè sàn-chhiah-lâng?”

6I án-ni kóng m̄-sī i koan-sim sàn-chhiah-lâng, sī in-ūi i sī chha̍t, koh siông-siông thau-the̍h i teh koán-lí ê kong-khóaⁿ.

7Iâ-so͘ kóng, “M̄-thang kā i tòng! Chit-ê phang-iû sī i ūi-tio̍h góa bâi-chòng ê ji̍t chún-pī--ê.

8Put-sî ū sàn-chhiah-lâng kap lín chòe-hé, put-kò góa bōe put-sî kap lín chòe-hé.”

9Ū chi̍t tōa-kûn Iû-thài -lâng thiaⁿ-tio̍h Iâ-so͘ tī Pek-tāi-nî chiū khì hia; in m̄-nā ūi-tio̍h beh khòaⁿ Iâ-so͘, mā siūⁿ-beh khòaⁿ Iâ-so͘ hō͘ i tùi sí koh-oa̍h hit-ê Lia̍p-sat-lō͘.

10Só͘-í, chiah-ê chè-si-tiúⁿ kè-bô͘ liân Lia̍p-sat-lō͘ ia̍h beh kā i thâi,

11in-ūi ū chin chōe Iû-thài -lâng ūi-tio̍h Lia̍p-sat-lō͘ ê iân-kò͘ lī-khui in khì sìn Iâ-so͘.

12Keh-ji̍t, lâi kè-choeh ê chi̍t tōa-kûn lâng thiaⁿ-tio̍h Iâ-so͘ beh lâi Iâ-lō͘-sat-léng,

13chiū gia̍h chang-chhiū-ki chhut-khì gêng-chiap, hoah kóng: Hô-sàn-ná! Hōng Chú ê miâ lâi Hit-ūi eng-kai siū chheng-chàn! Í-sek-lia̍t ê Ông eng-kai siū chheng-chàn!

14Iâ-so͘ khòaⁿ-tio̍h chi̍t chiah lû-á-kiáⁿ, chiū khan-lâi khiâ. Chiàu Sèng-keng só͘ kì-chài:

15Sek-an ê hū-jîn-lâng ah, m̄-bián kiaⁿ! Khòaⁿ, lín ê Ông khiâ lû-á-kiáⁿ teh lâi lah!

16I ê bûn-tô͘ goân-lâi bōe liáu-kái chit-hāng tāi-chì, m̄-kú Iâ-so͘ tit-tio̍h êng-kng ê sî, in chiah siūⁿ-tio̍h Sèng-keng só͘ kì-chài chit-hāng tāi-chì sī teh chí Iâ-so͘; tāi-chì mā chiàu án-ni hoat-seng tī I sin-chiūⁿ.

17Iâ-so͘ kiò Lia̍p-sat-lō͘ chhut bōng hō͘ i tùi sí koh-oa̍h hit-sî, kap Iâ-so͘ chòe-hé tī hia hit-kûn lâng ū kè-sio̍k teh chòe kiàn-chèng.

18Chèng-lâng mā chhut-khì gêng-chiap Iâ-so͘, in-ūi in ū thiaⁿ-tio̍h I kiâⁿ chit-ê sîn-jiah.

19Hoat-lī-sài-phài ê lâng chiū hō͘-siōng kóng, “Lán khah chòe mā bô-chhái-kang. Lín khòaⁿ, choân sè-kài lóng tè I khì lah!”

20Choeh-kî tiong khì Iâ-lō͘-sat-léng tiâu-pài--ê ū kúi-nā ê Hi-la̍h -lâng.

21Chiah-ê lâng lâi kìⁿ Ka-lī-lī ê Pek-sài-tāi -lâng Hui-le̍k, kā i kóng, “Sian-siⁿ, goán ài kìⁿ Iâ-so͘.”

22Hui-le̍k khì kā An-tek-lia̍t kóng, An-tek-lia̍t kap Hui-le̍k chiū chòe-hé khì kā Iâ-so͘ kóng.

23Iâ-so͘ ìn kóng, “Jîn-chú tit-tio̍h êng-kng ê sî kàu lah.

24Góa si̍t-si̍t-chāi-chāi kā lín kóng, chi̍t lia̍p be̍h-á nā bô lo̍h tōe sí, iû-goân sī chi̍t lia̍p nā-tiāⁿ; nā sí, chiū kiat chin chōe be̍h-á.

25Thiàⁿ-sioh ka-kī ê sìⁿ-miā--ê, ōe sòng-sit sìⁿ-miā; tī chit sè-kan kam-goān hi-seng ka-kī ê sìⁿ-miā--ê, ōe pó-siú sìⁿ-miā ti̍t-kàu éng-oán-oa̍h.

26Lâng nā beh ho̍k-sāi góa, tio̍h tè góa; góa tī tó-ūi, ho̍k-sāi góa ê lâng mā ōe tī hia. Lâng nā ho̍k-sāi góa, góa ê Pē ōe kā i chun-tiōng.”

27“Chit-chūn, góa ê sim loān-chhau-chhau, góa beh kóng sím-mi̍h? Kiám beh kóng ‘Pē ah, kiù góa thoat-chhut chit-ê sî-khek’? M̄-sī. Góa sī ūi-tio̍h chit-ê sî-khek chiah lâi.

28Pē ah, goān lí êng-iāu lí ê miâ.” Jiân-āu ū siaⁿ tùi thiⁿ-téng lâi, kóng, “Góa í-keng ū êng-iāu góa ê miâ, beh koh-chài êng-iāu.”

29Khiā tī hia ê kûn-chiòng thiaⁿ-tio̍h chit-ê siaⁿ, siūⁿ-kóng “Lûi teh tân”; mā ū lâng kóng “Thiⁿ-sài ū tùi I kóng-ōe”.

30Iâ-so͘ ìn kóng, “Chit-ê siaⁿ m̄-sī ūi-tio̍h góa, sī beh hō͘ lín thiaⁿ--ê.

31Hiān-chāi sī chit-ê sè-kan siū sím-phòaⁿ ê sî; hiān-chāi chit sè-kan ê thóng-tī-chiá teh-beh siū thui-hoan.

32Góa tùi tōe-chiūⁿ siū kú-khí ê sî, ōe khip-ín bān-bîn kui-óa góa.”

33Iâ-so͘ án-ni kóng sī piáu-bêng I teh-beh án-chóaⁿ sí.

34Kûn-chiòng ìn I kóng, “Goán thiaⁿ-tio̍h Lu̍t-hoat ū kì-chài, Ki-tok éng-oán chûn-chāi. Lí ná ōe kóng Jîn-chú tio̍h siū kú-khí? Chit-ê Jîn-chú sī sím-mi̍h-lâng?”

35Iâ-so͘ tùi in kóng, “Kng iáu ōe tī lín tiong-kan chi̍t-sî-á kú. Lín tio̍h thàn ū kng ê sî kè-sio̍k kiâⁿ, chiah bōe hō͘ o͘-àm jia-khàm. Tī o͘-àm tiong teh kiâⁿ ê lâng m̄ chai ōe kiâⁿ-khì tó-ūi.

36Thàn ū kng ê sî, lín tio̍h sìn kng, hō͘ lín thang chiâⁿ-chòe kng-bêng ê lâng.” Chiah-ê ōe kóng soah, Iâ-so͘ lī-khui in, bih--khí-lâi.

37Sui-jiân Iâ-so͘ tī in bīn-chêng ū kiâⁿ hiah chōe sîn-jiah, in iáu m̄ sìn I.

38Che sī beh èng-giām sian-ti Í-sài-a ê ōe, kóng: Chú ah, sím-mi̍h-lâng sìn goán só͘ thoân ê sìn-sit? Chú ê koân-lêng ū tùi sím-mi̍h-lâng hián-sī?

39In bōe-tàng siong-sìn ê goân-in, Í-sài-a ū koh án-ni kóng:

40Siōng-tè hō͘ in ê ba̍k-chiu bōe khòaⁿ--kìⁿ, hō͘ in ê sim ngī, chiah bián in ê ba̍k-chiu khòaⁿ--kìⁿ, in ê sim bêng-pe̍k, lâi kui-ǹg góa, góa chiū kā in i-hó.

41Í-sài-a án-ni kóng, sī in-ūi i ū khòaⁿ-kìⁿ Iâ-so͘ ê êng-iāu, chiah kóng koan-hē I ê tāi-chì.

42Sui-jiân sī án-ni, iáu-kú ū chin chōe Iû-thài -lâng ê léng-siù sìn Iâ-so͘; put-kò in-ūi in kiaⁿ Hoat-lī-sài-lâng, m̄-káⁿ kong-khai sêng-jīn, chiah bián siū kek-chhut hōe-tn̂g.

43In ài lâng ê chheng-chàn iâⁿ-kè Siōng-tè ê chheng-chàn.

44Iâ-so͘ tōa-siaⁿ hoah, “Sìn góa ê lâng m̄-sī sìn góa, sī sìn chhe góa lâi Hit-ūi.

45Khòaⁿ-kìⁿ góa chiū-sī khòaⁿ-kìⁿ chhe góa lâi Hit-ūi.

46Góa choh-kng lâi kàu chit sè-kan, sī beh hō͘ sìn góa ê lâng lóng bōe tiàm tī o͘-àm.

47Thiaⁿ góa ê ōe bô chun-siú ê lâng, góa bōe kā i sím-phòaⁿ. In-ūi góa m̄-sī lâi beh sím-phòaⁿ sè-kan-lâng, sī beh chín-kiù sè-kan-lâng.

48Kū-choa̍t góa, m̄ chiap-siū góa ê ōe ê lâng, ū chi̍t ê sím-phòaⁿ-chiá ōe kā i sím-phòaⁿ. Tī Boa̍t-ji̍t, góa só͘ kóng ê ōe ōe kā i sím-phòaⁿ.

49In-ūi góa m̄-sī chiàu ka-kī ê ì-sù kóng, sī chiàu chhe góa lâi ê Pē hō͘ góa ê bēng-lēng chiah kóng sím-mi̍h, thoân sím-mi̍h.

50Góa chai I ê bēng-lēng ōe hō͘ lâng tit-tio̍h éng-oán ê oa̍h-miā. Só͘-í, góa kóng--ê lóng sī chiàu Pē kā góa kóng--ê.”