John 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1“Góa sī chin ê phû-tô-chhiū, góa ê Pē sī chèng phû-tô--ê.

2Liân tī góa koh bô kiat ké-chí ê ki, I chiū kā i chián--khí-lâi; ū kiat ké-chí ê ki, I chiū kā i siu-chián, hō͘ i kiat khah chōe ké-chí.

3Góa tùi lín kóng ê ōe í-keng hō͘ lín chheng-khì lah.

4Lín tio̍h put-sî kap góa kiat-liân, góa chiū put-sî kap lín kiat-liân. Ki bô liân tī phû-tô-chhiū, ka-kī bōe kiat ké-chí; lín nā bô kap góa kiat-liân mā-sī án-ni.

5“Góa sī phû-tô-chhiū, lín sī ki. Kap góa kiat-liân, góa mā kap i kiat-liân--ê, ōe kiat chin chōe ké-chí, in-ūi bô góa, lín bōe-tàng chòe sím-mi̍h.

6Lâng nā bô kap góa kiat-liân, ōe chhin-chhiūⁿ ta--khì ê ki hō͘ lâng hiat chhut-khì gōa-bīn, khioh kui-tui, hiat-lo̍h hé sio.

7Lín nā kap góa kiat-liân, góa ê ōe tī lín lāi-bīn, lín bô-lūn ài sím-mi̍h, kiû chiū kā lín si̍t-hiān.

8Lín nā kiat chin chōe ké-chí, piáu-sī lín sī góa ê bûn-tô͘, góa ê Pē ōe in-ūi án-ni tit-tio̍h êng-kng.

9Chhin-chhiūⁿ Pē ū thiàⁿ góa, góa mā ū thiàⁿ lín, lín tio̍h put-sî tiàm tī góa ê thiàⁿ lāi-bīn.

10Lín nā chun-siú góa ê bēng-lēng, lín ōe put-sî tiàm tī góa ê thiàⁿ lāi-bīn, chhin-chhiūⁿ góa ū chun-siú góa ê Pē ê bēng-lēng, put-sî tiàm tī I ê thiàⁿ lāi-bīn.

11“Góa kā lín kóng chiah-ê tāi-chì, sī beh hō͘ góa ê hoaⁿ-hí tī lín lāi-bīn, koh hō͘ lín ê hoaⁿ-hí móa-móa.

12Chhin-chhiūⁿ góa ū thiàⁿ lín, lín tio̍h saⁿ-thiàⁿ; che sī góa ê bēng-lēng.

13Lâng ūi-tio̍h pêng-iú hi-seng sìⁿ-miā, bô pí che khah-tōa ê thiàⁿ.

14Lín nā chun-siú góa ê bēng-lēng chiū-sī góa ê pêng-iú.

15Góa bô koh kiò lín chòe po̍k-jîn, in-ūi po̍k-jîn m̄ chai chú-lâng teh chòe sím-mi̍h; taⁿ góa í-keng kiò lín chòe pêng-iú, in-ūi góa tùi góa ê Pē só͘ thiaⁿ--tio̍h-ê lóng ū kā lín kóng lah.

16M̄-sī lín kéng-soán góa, sī góa kéng-soán lín, koh jīm-bēng lín, hō͘ lín khì kiat ké-chí, hō͘ lín ê ké-chí ōe-tàng éng-oán pó-chûn. Án-ni, lín hōng góa ê miâ bô-lūn tùi Pē kiû sím-mi̍h, I ōe hō͘ lín.

17Che sī góa hō͘ lín ê bēng-lēng: Lín tio̍h pí-chhú saⁿ-thiàⁿ.”

18“Sè-kan-lâng nā oàn-hūn lín, tio̍h chai in oàn-hūn lín í-chêng seng oàn-hūn góa lah.

19Lín nā sio̍k chit sè-kan, sè-kan-lâng ōe khòaⁿ lín chòe ka-kī ê lâng kā lín thiàⁿ. Put-kò góa í-keng tùi sè-kan kā lín kéng-soán--chhut-lâi, lín m̄-sī sio̍k chit sè-kan, in-ūi án-ni sè-kan-lâng oàn-hūn lín.

20Tio̍h ōe-kì-tit góa kā lín kóng ê ōe, ‘Po̍k-jîn bōe pí chú-lâng khah tōa.’ Sè-kan-lâng nā pek-hāi góa, mā ōe pek-hāi lín; in nā chun-siú góa ê ōe, mā ōe chun-siú lín ê ōe.

21Put-kò ūi-tio̍h góa ê iân-kò͘, in ōe tùi lín chòe chiah-ê lóng-chóng ê tāi-chì, in-ūi in m̄ bat chhe góa lâi Hit-ūi.

22Góa nā bô lâi, bô kā in kóng, in chiū bô chōe; put-kò in hiān-chāi bô hoat-tō͘ ūi-tio̍h ka-kī ê chōe piān-kái.

23Oàn-hūn góa ê lâng mā oàn-hūn góa ê Pē.

24Góa tī in tiong-kan nā bô chòe pa̍t-lâng m̄-bat chòe ê tāi-chì, in chiū bô chōe; hiān-chāi in ū khòaⁿ-tio̍h góa ê só͘-chòe, iáu-kú oàn-hūn góa kap góa ê Pē.

25Che sī beh si̍t-hiān in ê Lu̍t-hoat só͘ kì-chài ê ōe, ‘In bô-iân-bô-kò͘ oàn-hūn góa.’

26“Góa beh tùi Pē hia chhe chi̍t ūi Ùi-chō͘-chiá lâi lín chia, I chiū-sī tùi Pē hia lâi hit-ūi khé-sī chin-lí ê Sîn, I lâi ê sî ōe ūi-tio̍h góa choh-chèng.

27Lín mā tio̍h ūi-tio̍h góa choh-chèng, in-ūi lín tùi khai-sí chiū kap góa chòe-hé.”

← Chapter 14 Jump to: Chapter 16 →

推荐阅读

注释 John 注释书 → 灵修 John 灵修指南 → 购买此圣经 TTVR (現代台語譯本羅馬字版) 研读本圣经 →