Luke 1 — Chinese TTVR (現代台語譯本羅馬字版)

1Só͘ chun-kèng ê Thê-o-hui-lô sian-siⁿ: Tī goán tiong-kan só͘ hoat-seng ê tāi-chì, í-keng ū chin chōe lâng chéng-lí koh phian-siá;

2chiah-ê tāi-chì sī chiàu hiah-ê tùi khí-thâu chiū chhin-ba̍k khòaⁿ--kìⁿ ê lâng kap thoân-tō ê lâng só͘ thoân-siū hō͘ goán--ê.

3Chiah-ê lóng-chóng ê tāi-chì, góa ū tùi thâu kàu bé siông-sè chhâ-khó, chiah siūⁿ-kóng tio̍h ūi-tio̍h lí chiàu sūn-sū siá--chhut-lâi,

4hō͘ lí thang bêng-pe̍k só͘ ha̍k-si̍p ê tō-lí sī khak-si̍t.

5Hi-lu̍t chòe Iû-thài -ông ê sî, ū chi̍t ê A-pí-ngá pan ê chè-si, miâ kiò-chòe Sat-ka-lī-a; i ê bó͘ I-lī-sa-pe̍k mā-sī chè-si A-lûn ê hō͘-tāi.

6In nn̄g lâng oân-choân chun-siú Chú it-chhè ê kài-bēng kap kui-lē, hō͘ Siōng-tè khòaⁿ-chòe gī-lâng.

7In bô kiáⁿ, in-ūi I-lī-sa-pe̍k bōe siⁿ, in nn̄g lâng mā lóng í-keng chin lāu.

8Ū chi̍t ji̍t, Sat-ka-lī-a ti̍t-pan, tī Siōng-tè ê bīn-chêng chip-hêng chè-si ê chit-bū.

9Chiàu chè-si-chit ê kui-lē, i thiu-tio̍h chhiam ji̍p-khì Chú ê sèng-só͘ sio-hiuⁿ.

10I teh sio-hiuⁿ ê sî, kui tōa-tīn bîn-chiòng tī gōa-bīn teh kî-tó.

11Ū Chú ê chi̍t ê thiⁿ-sài hián-hiān, khiā tī hiuⁿ-tôaⁿ ê chiàⁿ-pêng.

12Sat-ka-lī-a chi̍t-ē khòaⁿ--tio̍h chin tio̍h-kiaⁿ, hui-siông put-an.

13Thiⁿ-sài kā i kóng, “ Sat-ka-lī-a, m̄-bián kiaⁿ, in-ūi Siōng-tè í-keng thiaⁿ-tio̍h lí ê kî-tó; lí ê bó͘ I-lī-sa-pe̍k ōe kā lí siⁿ chi̍t ê hāu-siⁿ. Lí tio̍h kā i hō-miâ kiò-chòe Iok-hān.

14Lí ōe hoaⁿ-hí khoài-lo̍k; chin chōe lâng mā ōe in-ūi i ê chhut-sì lâi hoaⁿ-hí,

15in-ūi i tī Chú ê bīn-chêng ōe chòe tōa-jîn-bu̍t. Po̍h-chiú kāu-chiú i lóng bōe-ēng-tit lim. I iáu tī bú-thai chiū hō͘ Sèng Sîn chhiong-móa.

16I ōe hō͘ chin chōe Í-sek-lia̍t ê kiáⁿ-sun kui-ǹg Chú — in ê Siōng-tè.

17I ōe ēng sian-ti Í-lī-a ê cheng-sîn kap lêng-le̍k lâi chòe Chú ê sian-hong. I ōe hō͘ pē-bú kap kiáⁿ-jî hô-hó, hō͘ pōe-ge̍k ê lâng choán-ǹg lâi tè gī-lâng ê ì-liām, hō͘ chú-bîn chún-pī hó-sè thang gêng-chiap Chú.”

18Sat-ka-lī-a tùi thiⁿ-sài kóng, “Góa tio̍h án-chóaⁿ chiah ōe chai chit-ê tāi-chì? Góa í-keng lāu, góa ê bó͘ mā hiah chōe hè ah.”

19Thiⁿ-sài ìn kóng, “Góa sī teh sū-hāu Siōng-tè ê Ka-pek-lia̍t, siū phài lâi thoân-ōe, tùi lí pò chit-ê hó siau-sit.

20Lí ōe é-káu bōe kóng-ōe, it-ti̍t kàu chiah-ê tāi-chì èng-giām hit-ji̍t, in-ūi lí bô siong-sìn góa só͘ kóng sî kàu ōe si̍t-hiān chiah-ê ōe.”

21Hit-sî, bîn-chiòng teh thèng-hāu Sat-ka-lī-a, in chin kî-koài i ná ōe ji̍p-khì sèng-só͘ hiah-ni̍h kú.

22I chhut-lâi ê sî soah bōe-tàng tùi in kóng-ōe, in chiah chai i tī sèng-só͘ ū khòaⁿ-kìⁿ īⁿ-siōng. I bōe kóng-ōe, it-ti̍t tùi in pí-chhiú.

23Sat-ka-lī-a ho̍k-sāi ê ji̍t-kî kè-liáu chiū tńg-khì chhù--ni̍h.

24Kè bô jōa kú, i ê bó͘ I-lī-sa-pe̍k hoâi-īn, gō͘ ge̍h-ji̍t kú bô chhut-mn̂g.

25I-lī-sa-pe̍k kóng, “Chú chiah-ni̍h khòaⁿ-kò͘ góa, kā góa tû-khì tī lâng bīn-chêng ê kiàn-siàu.”

26I-lī-sa-pe̍k hoâi-īn tē-la̍k kò-ge̍h, thiⁿ-sài Ka-pek-lia̍t hōng Siōng-tè chhe-phài kàu Ka-lī-lī chi̍t ê siâⁿ, kiò-chòe Ná-sat-le̍k,

27khì kìⁿ chi̍t ê chāi-sek-lú, miâ kiò-chòe Má-lī-a. Chit-ê chāi-sek-lú í-keng kap Tāi-pi̍t -ke chi̍t ê kiò-chòe Iok-sek ê lâng tēng-hun.

28Thiⁿ-sài kàu Má-lī-a hia, tùi i kóng, “Pêng-an! Lí sī chèng hū-lú tiong-kan siōng ū hok-khì--ê; Chú kap lí tông-chāi!”

29Má-lī-a in-ūi chiah-ê ōe hui-siông put-an, sim-lāi it-ti̍t teh siūⁿ chit-ê chhéng-an sī sím-mi̍h ì-sù.

30Thiⁿ-sài tùi i kóng, “ Má-lī-a, m̄-bián kiaⁿ, in-ūi lí ū tit-tio̍h Siōng-tè sù-hok.

31Lí ōe hoâi-īn siⁿ chi̍t ê hāu-siⁿ, lí tio̍h kā I hō-miâ kiò-chòe Iâ-so͘.

32I ōe chòe tōa-jîn-bu̍t, lâng ōe chheng-ho͘ I chòe Chì-koân Siōng-tè ê Kiáⁿ. Chú Siōng-tè ōe chiong I chó͘-sian Tāi-pi̍t ê ông-ūi hō͘ I.

33I ōe éng-oán thóng-tī Ngá-kok ê kiáⁿ-sun; I ê ông-kok bû-kiông-chīn.”

34Má-lī-a tùi thiⁿ-sài kóng, “Góa iáu-bē chhut-kè, ná ōe ū chit-khoán tāi-chì?”

35Thiⁿ-sài ìn kóng, “Sèng Sîn beh lîm-kàu lí, Chì-koân Siōng-tè ê koân-lêng beh tì-ìm lí. In-ūi án-ni, hit-ê teh-beh chhut-sì ê eⁿ-á sī sèng--ê, lâng ōe chheng-ho͘ I chòe Siōng-tè ê Kiáⁿ.

36Lí khòaⁿ, lí ê chhin-chiâⁿ I-lī-sa-pe̍k, i sui-jiân nî-lāu, mā í-keng hoâi-īn beh siⁿ chi̍t ê hāu-siⁿ. Lâng kóng i bōe siⁿ, m̄-kú i í-keng ū-sin la̍k ge̍h-ji̍t.

37In-ūi Siōng-tè bô chi̍t hāng tāi-chì chòe bōe kàu.”

38Má-lī-a kóng, “Góa sī Chú ê lú-pī, goān chiàu lí ê ōe tī góa sin-chiūⁿ si̍t-hiān.” Thiⁿ-sài chiū lī-khui i.

39Kè bô jōa kú, Má-lī-a chhut-hoat, kóaⁿ-kín khì Iû-tāi soaⁿ-tōe ê chi̍t ê siâⁿ.

40I ji̍p-khì Sat-ka-lī-a ê chhù, kā I-lī-sa-pe̍k chhéng-an.

41I-lī-sa-pe̍k thiaⁿ-tio̍h Má-lī-a ê chhéng-an, pak-tó͘ lāi ê eⁿ-á chiū tiô-thiàu. I-lī-sa-pe̍k hō͘ Sèng Sîn chhiong-móa,

42tōa-siaⁿ kóng, “Hū-jîn-lâng tiong lí siōng siū chiok-hok! Lí pak-tó͘ lāi ê gín-á mā siū chiok-hok!

43Góa ê Chú ê lāu-bú lâi hóng-būn góa, góa ná ōe-kham--tit?

44In-ūi góa chi̍t-ē thiaⁿ-tio̍h lí chhéng-an ê siaⁿ, pak-tó͘ lāi ê eⁿ-á chiū hoaⁿ-hí tiô-thiàu.

45Siong-sìn Chú kóng ê ōe it-tēng ōe si̍t-hiān hit-ê hū-jîn-lâng chin ū hok-khì!”

46Má-lī-a kóng: Góa ê sim chun Chú chòe tōa;

47Góa ê sîn in-ūi Siōng-tè — góa ê Kiù-chú lâi hoaⁿ-hí.

48In-ūi Chú ū khòaⁿ-kò͘ I pi-bî ê lú-pī. Tùi taⁿ í-āu, bān sè-tāi ê lâng lóng ōe kóng góa ū hok-khì,

49in-ūi Choân-lêng ê Siōng-tè ūi-tio̍h góa chòe úi-tāi ê tāi-chì; I ê miâ sī sèng.

50Tùi kèng-ùi I ê lâng, I lîn-bín in kàu sè-sè-tāi-tāi.

51I chhun-chhut koân-lêng ê chhiú, kóaⁿ-sòaⁿ sim kiau-ngō͘ ê lâng.

52I chiong chiáng-koân--ê tùi pó-chō thoa--lo̍h-lâi, pi-bî ê lâng kā in ko-seng.

53Iau-gō ê lâng, I ēng hó-mi̍h hō͘ in pá-chiok; hó-gia̍h ê lâng, I kóaⁿ in khang-chhiú chhut--khì.

54I hû-chō͘ I ê po̍k-jîn Í-sek-lia̍t, ōe-kì-tit kā in lîn-bín;

55chiàu I tùi lán chó͘-sian ê èng-ún, lîn-bín A-pek-la-hán kap i ê kiáⁿ-sun kàu éng-oán.

56Má-lī-a kap I-lī-sa-pe̍k chòe-hé tòa chha-put-to saⁿ kò-ge̍h, jiân-āu tńg-khì in tau.

57I-lī-sa-pe̍k seng-sán ê ji̍t-kî í-keng kàu, chiū siⁿ chi̍t ê hāu-siⁿ.

58Chhù-piⁿ kap chhin-cho̍k thiaⁿ-kóng Chú ū tōa-tōa lîn-bín i, chiū kap i chòe-hé hoaⁿ-hí.

59Gín-á chhut-sì tē-poeh ji̍t, in lâi beh kā i kat-lé, koh chiàu in lāu-pē ê miâ kiò i chòe Sat-ka-lī-a.

60Chóng-sī i ê lāu-bú kóng, “M̄-thang! Tio̍h kā i hō-miâ kiò-chòe Iok-hān.”

61In tùi i kóng, “Lín chhin-cho̍k tiong bô lâng hō chit-ê miâ.”

62In chiū ēng chhiú pí, mn̄g gín-á ê lāu-pē khòaⁿ beh kā i hō sím-mi̍h miâ.

63Sat-ka-lī-a kā in thó chi̍t tè siá-jī-pán, siá kóng, “I ê miâ sī Iok-hān.” Tāi-ke lóng tio̍h-kiaⁿ.

64Sat-ka-lī-a sûi-sî khui-chhùi kóng-ōe, chheng-chàn Siōng-tè.

65Chhù-piⁿ-keh-piah lóng chin tio̍h-kiaⁿ; choân Iû-thài ê soaⁿ-tōe lóng teh tâm-lūn chit-hāng tāi-chì.

66Thiaⁿ-tio̍h chit-hāng tāi-chì ê lâng siūⁿ-kóng, “Chit-ê eⁿ-á chiong-lâi ōe chiâⁿ-chòe sím-mi̍h khoán lâng?” In-ūi ū Chú ê koân-lêng kap i tông-chāi.

67Iok-hān ê lāu-pē Sat-ka-lī-a hō͘ Sèng Sîn chhiong-móa, ū-giân kóng:

68Tio̍h chheng-chàn Chú — Í-sek-lia̍t ê Siōng-tè! In-ūi I ū khòaⁿ-kò͘ koh kiù-sio̍k I ê chú-bîn.

69I tùi I ê po̍k-jîn Tāi-pi̍t ê ke, kā lán siat-li̍p chi̍t ūi ū tōa khùi-la̍t ê Chín-kiù-chiá.

70Chiàu I tī kó͘-chá thong-kè I sèng sian-ti ê chhùi èng-ún kóng:

71I beh chín-kiù lán thoat-lī lán ê tùi-te̍k, thoat-lī it-chhè oàn-hūn lán ê lâng ê chhiú.

72I èng-ún beh lîn-bín lán ê chó͘-sian, koh ōe-kì-tit I só͘ li̍p sîn-sèng ê iok,

73chiū-sī I tùi lán ê chó͘-sian A-pek-la-hán só͘ li̍p ê iok. I beh kiù lán thoat-lī tùi-te̍k ê chhiú, hō͘ lán bô kiaⁿ-hiâⁿ, chi̍t-sì-lâng tī I ê bīn-chêng ēng sèng-kiat kong-gī ho̍k-sāi I.

76Sòe-kiáⁿ ah, lí ōe hō͘ lâng chheng-ho͘ chòe Chì-koân Siōng-tè ê sian-ti; in-ūi lí ōe chòe Chú ê sian-hong lâi chún-pī I beh kiâⁿ ê lō͘,

77hō͘ I ê chú-bîn in-ūi chōe tit-tio̍h sià-bián, thang bêng-pe̍k Siōng-tè ê chín-kiù.

78In-ūi lán ê Siōng-tè un-jiû chû-pi; I hō͘ chheng-chá ê ji̍t-thâu tùi thiⁿ-téng chiò lán,

79chiò lán chiah-ê tiàm tī o͘-àm kap sí-bông ìm-ńg-ē ê lâng, ín-chhōa lán ê kha kiâⁿ-ji̍p hô-pêng ê lō͘.

80Chit-ê gín-á chiām-chiām tōa-hàn, sim-lêng ji̍t-ji̍t ióng-chòng. I tòa khòng-iá, it-ti̍t kàu i tī Í-sek-lia̍t -lâng ê tiong-kan kong-khai chhut-hiān hit-ji̍t.