Luke 9 — Chinese TTVR (現代台語譯本羅馬字版)

1Iâ-so͘ tiàu-chi̍p cha̍p-jī sù-tô͘, hō͘ in ū lêng-le̍k kap koân-pèng thang chè-ap lóng-chóng ê kúi, koh i-hó chin chōe pīⁿ-chèng.

2Jiân-āu I chhe in chhut-khì soan-káng Siōng-tè-kok ê hok-im, koh i-tī pīⁿ-lâng.

3I kau-tài in, kóng, “Chhut-mn̂g ê sî sím-mi̍h lóng m̄-thang tòa: M̄-thang tòa koáiⁿ-á; m̄-thang tòa lú-hêng-tē; m̄-thang tòa chia̍h-mi̍h; m̄-thang tòa chîⁿ; mā m̄-thang ū nn̄g niá lāi-saⁿ.

4Lín bô-lūn ji̍p-khì tó chi̍t keng chhù, tio̍h tòa tī hia, iā tùi hia lī-khui.

5In nā m̄ chiap-la̍p lín, lín lī-khui hit-ê siâⁿ ê sî, tio̍h chiong kha--ni̍h ê thô͘-hún pōaⁿ-tiāu, piáu-sī tùi in kéng-kò.”

6In chhut--khì, chi̍t-chng kè chi̍t-chng thoân hok-im, koh tī ta̍k só͘-chāi i-hó pīⁿ-lâng.

7Ka-lī-lī hun-hong ê ông Hi-lu̍t thiaⁿ-tio̍h só͘ hoat-seng it-chhè ê tāi-chì, sim-lāi hui-siông put-an, in-ūi ū lâng kóng Si-sóe-chiá Iok-hān í-keng tùi sí-lâng tiong koh-oa̍h;

8mā ū lâng kóng Í-lī-a ū chhut-hiān; koh ū lâng kóng kó͘-chá ê chi̍t ê sian-ti ū koh-oa̍h.

9Hi-lu̍t kóng, “ Iok-hān, góa í-keng kā i chām-thâu lah, án-ni góa thiaⁿ lín teh kóng chit-ê tàu-tóe sī sím-mi̍h-lâng?” I chiū ài-beh kìⁿ Iâ-so͘.

10Sù-tô͘ tńg-lâi Iâ-so͘ hia, chiong in só͘ chòe ê tāi-chì lóng kā I pò-kò. Iâ-so͘ chiū kan-ta chhōa in thè-khì chi̍t ê kiò-chòe Pek-sài-tāi ê siâⁿ.

11Kûn-chiòng chi̍t-ē chai chiū tè I khì. Iâ-so͘ hoan-gêng in, kóng Siōng-tè-kok ê sū hō͘ in thiaⁿ, koh i-hó hiah-ê su-iàu i-tī ê lâng.

12Ji̍t beh àm ê sî, cha̍p-jī sù-tô͘ lâi kā Iâ-so͘ kóng, “Chhiáⁿ kā kûn-chiòng kái-sàn, thang hō͘ in khì hù-kūn ê chng-siā chhē chia̍h-mi̍h kap tòa ê só͘-chāi, in-ūi lán tī chia phian-phiah bô lâng tòa.”

13Iâ-so͘ kā in kóng, “Lín hō͘ in chia̍h.” In kóng, “Lán chí-ū gō͘ ê piáⁿ, nn̄g bé hî, nā bô khì bóe ná ū-kàu thang hō͘ chiah chōe lâng chia̍h?”

14Tī hia chha-put-to ū gō͘-chheng ê ta-po͘-lâng. Iâ-so͘ chiū tùi bûn-tô͘ kóng, “Kiò in hun-cho͘ chē--lo̍h-khì, ta̍k-cho͘ chha-put-to gō͘-cha̍p ê lâng.”

15In chiàu án-ni chòe, kiò chèng-lâng lóng chē--lo̍h-khì.

16Iâ-so͘ the̍h hit gō͘ ê piáⁿ kap nn̄g bé hî, ǹg thiⁿ kám-siā, peh-khui, the̍h hō͘ bûn-tô͘ khì pun hō͘ kûn-chiòng.

17Tāi-ke lóng chia̍h, chia̍h kàu pá. Bûn-tô͘ chiong só͘ chhun ê chhùi-sut-á lóng khioh--khí-lâi, lóng-chóng móa cha̍p-jī nâ.

18Ū chi̍t piàn, Iâ-so͘ ka-kī chi̍t ê teh kî-tó ê sî, bûn-tô͘ lâi chhē I. I mn̄g in kóng, “Chèng-lâng kóng góa sī sím-mi̍h-lâng?”

19In ìn kóng, “Ū lâng kóng lí sī Si-sóe-chiá Iok-hān; m̄-kú ū lâng kóng sī Í-lī-a; mā ū lâng kóng sī kó͘-chá ê chi̍t ê sian-ti koh-oa̍h.”

20Iâ-so͘ koh mn̄g in kóng, “Lín leh, lín kóng góa sī sím-mi̍h-lâng?” Pí-tek ìn kóng, “Lí sī Siōng-tè siat-li̍p ê Ki-tok!”

21Iâ-so͘ bēng-lēng in m̄-thang tùi lâng kóng-khí chit-ê tāi-chì.

22I kóng, “Jîn-chú it-tēng tio̍h siū chin chōe khó͘-lān, hō͘ tiúⁿ-ló, chè-si-tiúⁿ, kap keng-ha̍k-kàu-su kū-choa̍t, koh hō͘ lâng hāi-sí, tē-saⁿ ji̍t Siōng-tè ōe hō͘ I koh-oa̍h.”

23Iâ-so͘ koh tùi chèng-lâng kóng, “Beh tè góa ê lâng, tio̍h hó͘-tēng ka-kī, ta̍k-ji̍t giâ ka-kī ê si̍p-jī-kè lâi tè góa.

24In-ūi beh kiù ka-kī ê sìⁿ-miā--ê, ōe sòng-sit sìⁿ-miā; ūi-tio̍h góa ê iân-kò͘ sòng-sit ka-kī ê sìⁿ-miā--ê, i ōe kiù-tio̍h sìⁿ-miā.

25Lâng tit-tio̍h choân sè-kài soah sòng-sit ka-kī, á-sī húi-bia̍t ka-kī, ū sím-mi̍h lī-ek?

26Tùi góa kap góa ê ōe kám-kak kiàn-siàu ê lâng, Jîn-chú tī I ka-kī kap Pē í-ki̍p sèng thiⁿ-sài ê êng-kng tiong lâi-lîm ê sî, mā ōe in-ūi chit-ê lâng kám-kak kiàn-siàu.

27Góa si̍t-chāi kā lín kóng, khiā tī chia ê lâng, ū-ê iáu-bē sí í-chêng ōe khòaⁿ-kìⁿ Siōng-tè-kok.”

28Chiah-ê ōe kóng-liáu, chha-put-to poeh ji̍t āu, Iâ-so͘ chhōa Pí-tek, Iok-hān, kap Ngá-kok chiūⁿ-soaⁿ khì kî-tó.

29I teh kî-tó ê sî, bīn-māu kái-piàn, I ê saⁿ piàn kah pe̍h-siak-siak.

30Hut-jiân-kan, ū nn̄g ê lâng, chiū-sī Mô͘-se kap Í-lī-a, lâi kap Iâ-so͘ kóng-ōe.

31In tī êng-kng tiong chhut-hiān, tâm-lūn Iâ-so͘ teh-beh tī Iâ-lō͘-sat-léng sí lâi oân-sêng sú-bēng ê sū.

32Pí-tek kap i ê tâng-phōaⁿ thiám kah khùn--khì. In chi̍t-ē chhíⁿ, khòaⁿ-kìⁿ Iâ-so͘ ê êng-kng í-ki̍p kap I khiā chòe-hé hit nn̄g ê lâng.

33In teh-beh lī-khui Iâ-so͘ ê sî, Pí-tek kā Iâ-so͘ kóng, “Lāu-su, lán tī chia chin hó, goán lâi tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a.” I m̄ chai ka-kī teh kóng sím-mi̍h.

34I teh kóng chiah-ê ōe ê sî, ū chi̍t phìⁿ hûn lâi, kā in tà--teh; in hō͘ hûn pau-ûi ê sî, khí kiaⁿ-hiâⁿ.

35Ū siaⁿ tùi hûn chhut--lâi, kóng, “Chit-ê sī góa ê Kiáⁿ, góa só͘ kéng-soán--ê, lín tio̍h thiaⁿ-thàn I.”

36Hit-ê siaⁿ kóng-liáu, kan-ta chhun Iâ-so͘ chi̍t ê tī hia. Ū chi̍t tōaⁿ sî-kan, bûn-tô͘ lóng tiām-tiām, bô kā lâng kóng-khí in só͘ khòaⁿ--kìⁿ ê tāi-chì.

37Keh-ji̍t, in tùi soaⁿ-téng lo̍h--lâi ê sî, ū kui tōa-tīn lâng lâi gêng-chiap Iâ-so͘.

38Hit-sî, kûn-chiòng ê tiong-kan ū chi̍t ê lâng hoah kóng, “Sian-siⁿ, góa chit-ê hāu-siⁿ kiû lí kā i khòaⁿ--chi̍t-ē, i sī góa ê ko͘-kiáⁿ.

39Kúi chi̍t-ē hū-sin, i sûi-sî loān hoah. Kúi hō͘ i thiu-chhoah, phū pe̍h-pho-nōa, koh kā i siong-hāi, lóng m̄ pàng i soah.

40Góa ū chhiáⁿ lí ê bûn-tô͘ kā kúi kóaⁿ--chhut-khì, in lóng bô hoat-tō͘.”

41Iâ-so͘ ìn kóng, “Ài ah, m̄-sìn koh hú-pāi ê sè-tāi! Góa tio̍h kap lín tòa jōa kú? Góa tio̍h jím-nāi lín jōa kú? Kā lí ê hāu-siⁿ chhōa-lâi chia.”

42I hō͘ lâng chhōa--lâi ê sî, kúi kā i siak-tó, hō͘ i thiu-chhoah. Iâ-so͘ chiū chek-pī siâ-sîn, i-hó hit-ê gín-á, chiong i kau hō͘ lāu-pē.

43Chèng-lâng tùi Siōng-tè úi-tāi ê koân-lêng kám-kak chin tio̍h-kiaⁿ. Chèng-lâng tùi Iâ-so͘ só͘ chòe it-chhè ê tāi-chì iáu-teh tio̍h-kiaⁿ ê sî, Iâ-so͘ tùi I ê bûn-tô͘ kóng,

44“Chiah-ê ōe lín tio̍h chù-ì thiaⁿ: Jîn-chú teh-beh hō͘ lâng chhut-bōe kau tī lâng ê chhiú-thâu.”

45Put-kò bûn-tô͘ bô bêng-pe̍k chit-kù ōe, in-ūi ì-sù ū tùi in khàm--khí-lâi hō͘ in bōe liáu-kái, in mā m̄-káⁿ mn̄g Iâ-so͘ chit-kù ōe ê ì-sù.

46Bûn-tô͘ hō͘-siōng cheng-lūn sím-mi̍h-lâng siōng tōa.

47Iâ-so͘ chai in sim-lāi teh cheng-lūn sím-mi̍h, chiū khan chi̍t ê gín-á lâi khiā tī I sin-piⁿ,

48jiân-āu kā in kóng, “Bô-lūn sím-mi̍h-lâng ūi-tio̍h góa ê miâ chiap-la̍p chit-ê gín-á, chiū-sī chiap-la̍p góa; chiap-la̍p góa--ê chiū-sī chiap-la̍p chhe góa lâi Hit-ūi. Lín chèng-lâng tiong-kan siōng-sòe--ê chiū-sī siōng tōa.”

49Iok-hān kóng, “Lāu-su, goán ū khòaⁿ-tio̍h chi̍t ê lâng hōng lí ê miâ kóaⁿ-kúi, goán kā i chó͘-tòng, in-ūi i bô kap goán tè lí.”

50Iâ-so͘ kā i kóng, “M̄-thang kā i chó͘-tòng, in-ūi bô hoán-tùi lín--ê chiū-sī ūi lín.”

51Iâ-so͘ siū chiap chiūⁿ-thiⁿ ê ji̍t-chí teh-beh kàu, chiū koat-ì beh khì Iâ-lō͘-sat-léng.

52I chhe-phài sù-chiá tāi-seng khì. In ji̍p-khì Sat-má-lī-a -lâng ê chng-thâu, ūi-tio̍h Iâ-so͘ chún-pī.

53Hit só͘-chāi ê lâng bô hoan-gêng Iâ-so͘, in-ūi I beh khì Iâ-lō͘-sat-léng.

54I ê bûn-tô͘ Ngá-kok kap Iok-hān khòaⁿ--tio̍h, chiū kóng, “Chú ah, goán tùi thiⁿ-téng kiò hé lo̍h-lâi kā in húi-bia̍t hó--bô?”

55Iâ-so͘ oa̍t--kè-lâi, kā in chek-pī.

56In chiū khì pa̍t-ê chng-thâu.

57In tī lō͘-tiong ê sî, ū chi̍t ê lâng tùi Iâ-so͘ kóng, “Lí bô-lūn khì tó-ūi, góa lóng beh tè lí.”

58Iâ-so͘ kā i kóng, “Hô͘-lî ū khang, khong-tiong ê chiáu ū siū, put-kò Jîn-chú liân khòa thâu-khak ê só͘-chāi to bô.”

59Iâ-so͘ koh tùi lēng-gōa chi̍t ê lâng kóng, “Lâi tè góa!” Hit-ê lâng ìn kóng, “Chú ah, thèng-hāu goán sī-tōa-lâng pah-hè-nî-lāu, góa chiū lâi tè lí. ”

60Iâ-so͘ ìn kóng, “Hō͘ sí-lâng khì bâi-chòng in ka-kī ê sí-lâng. Put-kò, lí tio̍h khì soan-káng Siōng-tè-kok ê hok-im.”

61Koh ū chi̍t ê lâng kóng, “Chú ah, góa beh tè lí; put-kò hō͘ góa tāi-seng tńg-khì chhù--ni̍h kap ke-lāi ê lâng saⁿ-sî.”

62Iâ-so͘ tùi i kóng, “Chhiú hōaⁿ tī lôe-bé iáu ti̍t-ti̍t oa̍t-thâu khòaⁿ āu-bīn ê lâng bô sek-ha̍p Siōng-tè-kok.”